Sūkta 8

एंद्र॑ सान॒सिं र॒यिं स॒जित्वा॑नं सदा॒सहं॑ । वर्षि॑ष्ठमू॒तये॑ भर ॥

éndra sānasím rayím sajítvānam sadāsáham ǀ várṣiṣṭhamūtáye bhara ǁ

नि येन॑ मुष्टिह॒त्यया॒ नि वृ॒त्रा रु॒णधा॑महै । त्वोता॑सो॒ न्यर्व॑ता ॥

ní yéna muṣṭihatyáyā ní vṛtrā́ ruṇádhāmahai ǀ tvótāso nyárvatā ǁ

इंद्र॒ त्वोता॑स॒ आ व॒यं वज्रं॑ घ॒ना द॑दीमहि । जये॑म॒ सं यु॒धि स्पृधः॑ ॥

índra tvótāsa ā́ vayám vájram ghanā́ dadīmahi ǀ jáyema sám yudhí spṛ́dhaḥ ǁ

व॒यं शूरे॑भि॒रस्तृ॑भि॒रिंद्र॒ त्वया॑ यु॒जा व॒यं । सा॒स॒ह्याम॑ पृतन्य॒तः ॥

vayám śū́rebhirástṛbhiríndra tváyā yujā́ vayám ǀ sāsahyā́ma pṛtanyatáḥ ǁ

म॒हाँ इंद्रः॑ प॒रश्च॒ नु म॑हि॒त्वम॑स्तु व॒ज्रिणे॑ । द्यौर्न प्र॑थि॒ना शवः॑ ॥

mahā́m̐ índraḥ paráśca nú mahitvámastu vajríṇe ǀ dyáurná prathinā́ śávaḥ ǁ

स॒मो॒हे वा॒ य आश॑त॒ नर॑स्तो॒कस्य॒ सनि॑तौ । विप्रा॑सो वा धिया॒यवः॑ ॥

samohé vā yá ā́śata nárastokásya sánitau ǀ víprāso vā dhiyāyávaḥ ǁ

यः कु॒क्षिः सो॑म॒पात॑मः समु॒द्र इ॑व॒ पिन्व॑ते । उ॒र्वीरापो॒ न का॒कुदः॑ ॥

yáḥ kukṣíḥ somapā́tamaḥ samudrá iva pínvate ǀ urvī́rā́po ná kākúdaḥ ǁ

ए॒वा ह्य॑स्य सू॒नृता॑ विर॒प्शी गोम॑ती म॒ही । प॒क्वा शाखा॒ न दा॒शुषे॑ ॥

evā́ hyásya sūnṛ́tā virapśī́ gómatī mahī́ ǀ pakvā́ śā́khā ná dāśúṣe ǁ

ए॒वा हि ते॒ विभू॑तय ऊ॒तय॑ इंद्र॒ माव॑ते । स॒द्यश्चि॒त्संति॑ दा॒शुषे॑ ॥

evā́ hí te víbhūtaya ūtáya indra mā́vate ǀ sadyáścitsánti dāśúṣe ǁ

ए॒वा ह्य॑स्य॒ काम्या॒ स्तोम॑ उ॒क्थं च॒ शंस्या॑ । इंद्रा॑य॒ सोम॑पीतये ॥

evā́ hyásya kā́myā stóma ukthám ca śáṃsyā ǀ índrāya sómapītaye ǁ