ಇಂದ್ರನಿಗೆ ಆಹ್ವಾನ ಮತ್ತು ಐಶ್ವರ್ಯದ ಪ್ರಾಪ್ತಿ - ಮಂಡಲ ೧, ಸೂಕ್ತ ೮

ಏಂದ್ರ॑ ಸಾನ॒ಸಿಂ ರ॒ಯಿಂ ಸ॒ಜಿತ್ವಾ॑ನಂ ಸದಾ॒ಸಹಂ॑ । ವರ್ಷಿ॑ಷ್ಠಮೂ॒ತಯೇ॑ ಭರ ॥

एंद्र॑ सान॒सिं र॒यिं स॒जित्वा॑नं सदा॒सहं॑ । वर्षि॑ष्ठमू॒तये॑ भर ॥

ನಿ ಯೇನ॑ ಮುಷ್ಟಿಹ॒ತ್ಯಯಾ॒ ನಿ ವೃ॒ತ್ರಾ ರು॒ಣಧಾ॑ಮಹೈ । ತ್ವೋತಾ॑ಸೋ॒ ನ್ಯರ್ವ॑ತಾ ॥

नि येन॑ मुष्टिह॒त्यया॒ नि वृ॒त्रा रु॒णधा॑महै । त्वोता॑सो॒ न्यर्व॑ता ॥

ಇಂದ್ರ॒ ತ್ವೋತಾ॑ಸ॒ ಆ ವ॒ಯಂ ವಜ್ರಂ॑ ಘ॒ನಾ ದ॑ದೀಮಹಿ । ಜಯೇ॑ಮ॒ ಸಂ ಯು॒ಧಿ ಸ್ಪೃಧಃ॑ ॥

इंद्र॒ त्वोता॑स॒ आ व॒यं वज्रं॑ घ॒ना द॑दीमहि । जये॑म॒ सं यु॒धि स्पृधः॑ ॥

ವ॒ಯಂ ಶೂರೇ॑ಭಿ॒ರಸ್ತೃ॑ಭಿ॒ರಿಂದ್ರ॒ ತ್ವಯಾ॑ ಯು॒ಜಾ ವ॒ಯಂ । ಸಾ॒ಸ॒ಹ್ಯಾಮ॑ ಪೃತನ್ಯ॒ತಃ ॥

व॒यं शूरे॑भि॒रस्तृ॑भि॒रिंद्र॒ त्वया॑ यु॒जा व॒यं । सा॒स॒ह्याम॑ पृतन्य॒तः ॥

ಮ॒ಹಾಁ ಇಂದ್ರಃ॑ ಪ॒ರಶ್ಚ॒ ನು ಮ॑ಹಿ॒ತ್ವಮ॑ಸ್ತು ವ॒ಜ್ರಿಣೇ॑ । ದ್ಯೌರ್ನ ಪ್ರ॑ಥಿ॒ನಾ ಶವಃ॑ ॥

म॒हाँ इंद्रः॑ प॒रश्च॒ नु म॑हि॒त्वम॑स्तु व॒ज्रिणे॑ । द्यौर्न प्र॑थि॒ना शवः॑ ॥

ಸ॒ಮೋ॒ಹೇ ವಾ॒ ಯ ಆಶ॑ತ॒ ನರ॑ಸ್ತೋ॒ಕಸ್ಯ॒ ಸನಿ॑ತೌ । ವಿಪ್ರಾ॑ಸೋ ವಾ ಧಿಯಾ॒ಯವಃ॑ ॥

स॒मो॒हे वा॒ य आश॑त॒ नर॑स्तो॒कस्य॒ सनि॑तौ । विप्रा॑सो वा धिया॒यवः॑ ॥

ಯಃ ಕು॒ಕ್ಷಿಃ ಸೋ॑ಮ॒ಪಾತ॑ಮಃ ಸಮು॒ದ್ರ ಇ॑ವ॒ ಪಿನ್ವ॑ತೇ । ಉ॒ರ್ವೀರಾಪೋ॒ ನ ಕಾ॒ಕುದಃ॑ ॥

यः कु॒क्षिः सो॑म॒पात॑मः समु॒द्र इ॑व॒ पिन्व॑ते । उ॒र्वीरापो॒ न का॒कुदः॑ ॥

ಏ॒ವಾ ಹ್ಯ॑ಸ್ಯ ಸೂ॒ನೃತಾ॑ ವಿರ॒ಪ್ಶೀ ಗೋಮ॑ತೀ ಮ॒ಹೀ । ಪ॒ಕ್ವಾ ಶಾಖಾ॒ ನ ದಾ॒ಶುಷೇ॑ ॥

ए॒वा ह्य॑स्य सू॒नृता॑ विर॒प्शी गोम॑ती म॒ही । प॒क्वा शाखा॒ न दा॒शुषे॑ ॥

ಏ॒ವಾ ಹಿ ತೇ॒ ವಿಭೂ॑ತಯ ಊ॒ತಯ॑ ಇಂದ್ರ॒ ಮಾವ॑ತೇ । ಸ॒ದ್ಯಶ್ಚಿ॒ತ್ಸಂತಿ॑ ದಾ॒ಶುಷೇ॑ ॥

ए॒वा हि ते॒ विभू॑तय ऊ॒तय॑ इंद्र॒ माव॑ते । स॒द्यश्चि॒त्संति॑ दा॒शुषे॑ ॥

ಏ॒ವಾ ಹ್ಯ॑ಸ್ಯ॒ ಕಾಮ್ಯಾ॒ ಸ್ತೋಮ॑ ಉ॒ಕ್ಥಂ ಚ॒ ಶಂಸ್ಯಾ॑ । ಇಂದ್ರಾ॑ಯ॒ ಸೋಮ॑ಪೀತಯೇ ॥

ए॒वा ह्य॑स्य॒ काम्या॒ स्तोम॑ उ॒क्थं च॒ शंस्या॑ । इंद्रा॑य॒ सोम॑पीतये ॥