Sūkta 7

इंद्र॒मिद्गा॒थिनो॑ बृ॒हदिंद्र॑म॒र्केभि॑र॒र्किणः॑ । इंद्रं॒ वाणी॑रनूषत ॥

índramídgāthíno bṛhádíndramarkébhirarkíṇaḥ ǀ índram vā́ṇīranūṣata ǁ

इंद्र॒ इद्धर्योः॒ सचा॒ संमि॑श्ल॒ आ व॑चो॒युजा॑ । इंद्रो॑ व॒ज्री हि॑र॒ण्ययः॑ ॥

índra íddháryoḥ sácā sámmiśla ā́ vacoyújā ǀ índro vajrī́ hiraṇyáyaḥ ǁ

इंद्रो॑ दी॒र्घाय॒ चक्ष॑स॒ आ सूर्यं॑ रोहयद्दि॒वि । वि गोभि॒रद्रि॑मैरयत् ॥

índro dīrghā́ya cákṣasa ā́ sū́ryam rohayaddiví ǀ ví góbhirádrimairayat ǁ

इंद्र॒ वाजे॑षु नोऽव स॒हस्र॑प्रधनेषु च । उ॒ग्र उ॒ग्राभि॑रू॒तिभिः॑ ॥

índra vā́jeṣu no’va sahásrapradhaneṣu ca ǀ ugrá ugrā́bhirūtíbhiḥ ǁ

इंद्रं॑ व॒यं म॑हाध॒न इंद्र॒मर्भे॑ हवामहे । युजं॑ वृ॒त्रेषु॑ व॒ज्रिणं॑ ॥

índram vayám mahādhaná índramárbhe havāmahe ǀ yújam vṛtréṣu vajríṇam ǁ

स नो॑ वृषन्न॒मुं च॒रुं सत्रा॑दाव॒न्नपा॑ वृधि । अ॒स्मभ्य॒मप्र॑तिष्कुतः ॥

sá no vṛṣannamúm carúm sátrādāvannápā vṛdhi ǀ asmábhyamápratiṣkutaḥ ǁ

तुं॒जेतुं॑जे॒ य उत्त॑रे॒ स्तोमा॒ इंद्र॑स्य व॒ज्रिणः॑ । न विं॑धे अस्य सुष्टु॒तिं ॥

tuñjétuñje yá úttare stómā índrasya vajríṇaḥ ǀ ná vindhe asya suṣṭutím ǁ

वृषा॑ यू॒थेव॒ वंस॑गः कृ॒ष्टीरि॑य॒र्त्योज॑सा । ईशा॑नो॒ अप्र॑तिष्कुतः ॥

vṛ́ṣā yūthéva váṃsagaḥ kṛṣṭī́riyartyójasā ǀ ī́śāno ápratiṣkutaḥ ǁ

य एक॑श्चर्षणी॒नां वसू॑नामिर॒ज्यति॑ । इंद्रः॒ पंच॑ क्षिती॒नां ॥

yá ékaścarṣaṇīnā́m vásūnāmirajyáti ǀ índraḥ páñca kṣitīnā́m ǁ

इंद्रं॑ वो वि॒श्वत॒स्परि॒ हवा॑महे॒ जने॑भ्यः । अ॒स्माक॑मस्तु॒ केव॑लः ॥

índram vo viśvátaspári hávāmahe jánebhyaḥ ǀ asmā́kamastu kévalaḥ ǁ