Sūkta 9

इंद्रेहि॒ मत्स्यंध॑सो॒ विश्वे॑भिः सोम॒पर्व॑भिः । म॒हाँ अ॑भि॒ष्टिरोज॑सा ॥

índréhi mátsyándhaso víśvebhiḥ somapárvabhiḥ ǀ mahā́m̐ abhiṣṭírójasā ǁ

एमे॑नं सृजता सु॒ते मं॒दिमिंद्रा॑य मं॒दिने॑ । चक्रिं॒ विश्वा॑नि॒ चक्र॑ये ॥

émenam sṛjatā suté mandímíndrāya mandíne ǀ cákrim víśvāni cákraye ǁ

मत्स्वा॑ सुशिप्र मं॒दिभिः॒ स्तोमे॑भिर्विश्वचर्षणे । सचै॒षु सव॑ने॒ष्वा ॥

mátsvā suśipra mandíbhiḥ stómebhirviśvacarṣaṇe ǀ sácaiṣú sávaneṣvā́ ǁ

असृ॑ग्रमिंद्र ते॒ गिरः॒ प्रति॒ त्वामुद॑हासत । अजो॑षा वृष॒भं पतिं॑ ॥

ásṛgramindra te gíraḥ práti tvā́múdahāsata ǀ ájoṣā vṛṣabhám pátim ǁ

सं चो॑दय चि॒त्रम॒र्वाग्राध॑ इंद्र॒ वरे॑ण्यं । अस॒दित्ते॑ वि॒भु प्र॒भु ॥

sám codaya citrámarvā́grā́dha indra váreṇyam ǀ ásadítte vibhú prabhú ǁ

अ॒स्मान्त्सु तत्र॑ चोद॒येंद्र॑ रा॒ये रभ॑स्वतः । तुवि॑द्युम्न॒ यश॑स्वतः ॥

asmā́ntsú tátra codayéndra rāyé rábhasvataḥ ǀ túvidyumna yáśasvataḥ ǁ

सं गोम॑दिंद्र॒ वाज॑वद॒स्मे पृ॒थु श्रवो॑ बृ॒हत् । वि॒श्वायु॑र्धे॒ह्यक्षि॑तं ॥

sám gómadindra vā́javadasmé pṛthú śrávo bṛhát ǀ viśvā́yurdhehyákṣitam ǁ

अ॒स्मे धे॑हि॒ श्रवो॑ बृ॒हद्द्यु॒म्नं स॑हस्र॒सात॑मं । इंद्र॒ ता र॒थिनी॒रिषः॑ ॥

asmé dhehi śrávo bṛháddyumnám sahasrasā́tamam ǀ índra tā́ rathínīríṣaḥ ǁ

वसो॒रिंद्रं॒ वसु॑पतिं गी॒र्भिर्गृ॒णंत॑ ऋ॒ग्मियं॑ । होम॒ गंता॑रमू॒तये॑ ॥

vásoríndram vásupatim gīrbhírgṛṇánta ṛgmíyam ǀ hóma gántāramūtáye ǁ

सु॒तेसु॑ते॒ न्यो॑कसे बृ॒हद्बृ॑ह॒त एद॒रिः । इंद्रा॑य शू॒षम॑र्चति ॥

sutésute nyókase bṛhádbṛhatá édaríḥ ǀ índrāya śūṣámarcati ǁ