ಅಗ್ನಿಯ ದಿವ್ಯ ತೇಜಸ್ಸು ಮತ್ತು ರಕ್ಷಣೆ - ಋಗ್ವೇದ ಮಂಡಲ ೧, ಸೂಕ್ತ ೭೯

ಹಿರ॑ಣ್ಯಕೇಶೋ॒ ರಜ॑ಸೋ ವಿಸಾ॒ರೇಽಹಿ॒ರ್ಧುನಿ॒ರ್ವಾತ॑ ಇವ॒ ಧ್ರಜೀ॑ಮಾನ್ । ಶುಚಿ॑ಭ್ರಾಜಾ ಉ॒ಷಸೋ॒ ನವೇ॑ದಾ॒ ಯಶ॑ಸ್ವತೀರಪ॒ಸ್ಯುವೋ॒ ನ ಸ॒ತ್ಯಾಃ ॥

हिर॑ण्यकेशो॒ रज॑सो विसा॒रेऽहि॒र्धुनि॒र्वात॑ इव॒ ध्रजी॑मान् । शुचि॑भ्राजा उ॒षसो॒ नवे॑दा॒ यश॑स्वतीरप॒स्युवो॒ न स॒त्याः ॥

ಆ ತೇ॑ ಸುಪ॒ರ್ಣಾ ಅ॑ಮಿನಂತಁ॒ ಏವೈಃ॑ ಕೃ॒ಷ್ಣೋ ನೋ॑ನಾವ ವೃಷ॒ಭೋ ಯದೀ॒ದಂ । ಶಿ॒ವಾಭಿ॒ರ್ನ ಸ್ಮಯ॑ಮಾನಾಭಿ॒ರಾಗಾ॒ತ್ಪತಂ॑ತಿ॒ ಮಿಹಃ॑ ಸ್ತ॒ನಯಂ॑ತ್ಯ॒ಭ್ರಾ ॥

आ ते॑ सुप॒र्णा अ॑मिनंतँ॒ एवैः॑ कृ॒ष्णो नो॑नाव वृष॒भो यदी॒दं । शि॒वाभि॒र्न स्मय॑मानाभि॒रागा॒त्पतं॑ति॒ मिहः॑ स्त॒नयं॑त्य॒भ्रा ॥

ಯದೀ॑ಮೃ॒ತಸ್ಯ॒ ಪಯ॑ಸಾ॒ ಪಿಯಾ॑ನೋ॒ ನಯ॑ನ್ನೃ॒ತಸ್ಯ॑ ಪ॒ಥಿಭೀ॒ ರಜಿ॑ಷ್ಠೈಃ । ಅ॒ರ್ಯ॒ಮಾ ಮಿ॒ತ್ರೋ ವರು॑ಣಃ॒ ಪರಿ॑ಜ್ಮಾ॒ ತ್ವಚಂ॑ ಪೃಂಚಂ॒ತ್ಯುಪ॑ರಸ್ಯ॒ ಯೋನೌ॑ ॥

यदी॑मृ॒तस्य॒ पय॑सा॒ पिया॑नो॒ नय॑न्नृ॒तस्य॑ प॒थिभी॒ रजि॑ष्ठैः । अ॒र्य॒मा मि॒त्रो वरु॑णः॒ परि॑ज्मा॒ त्वचं॑ पृंचं॒त्युप॑रस्य॒ योनौ॑ ॥

ಅಗ್ನೇ॒ ವಾಜ॑ಸ್ಯ॒ ಗೋಮ॑ತ॒ ಈಶಾ॑ನಃ ಸಹಸೋ ಯಹೋ । ಅ॒ಸ್ಮೇ ಧೇ॑ಹಿ ಜಾತವೇದೋ॒ ಮಹಿ॒ ಶ್ರವಃ॑ ॥

अग्ने॒ वाज॑स्य॒ गोम॑त॒ ईशा॑नः सहसो यहो । अ॒स्मे धे॑हि जातवेदो॒ महि॒ श्रवः॑ ॥

ಸ ಇ॑ಧಾ॒ನೋ ವಸು॑ಷ್ಕ॒ವಿರ॒ಗ್ನಿರೀ॒ಳೇನ್ಯೋ॑ ಗಿ॒ರಾ । ರೇ॒ವದ॒ಸ್ಮಭ್ಯಂ॑ ಪುರ್ವಣೀಕ ದೀದಿಹಿ ॥

स इ॑धा॒नो वसु॑ष्क॒विर॒ग्निरी॒ळेन्यो॑ गि॒रा । रे॒वद॒स्मभ्यं॑ पुर्वणीक दीदिहि ॥

ಕ್ಷ॒ಪೋ ರಾ॑ಜನ್ನು॒ತ ತ್ಮನಾಗ್ನೇ॒ ವಸ್ತೋ॑ರು॒ತೋಷಸಃ॑ । ಸ ತಿ॑ಗ್ಮಜಂಭ ರ॒ಕ್ಷಸೋ॑ ದಹ॒ ಪ್ರತಿ॑ ॥

क्ष॒पो रा॑जन्नु॒त त्मनाग्ने॒ वस्तो॑रु॒तोषसः॑ । स ति॑ग्मजंभ र॒क्षसो॑ दह॒ प्रति॑ ॥

ಅವಾ॑ ನೋ ಅಗ್ನ ಊ॒ತಿಭಿ॑ರ್ಗಾಯ॒ತ್ರಸ್ಯ॒ ಪ್ರಭ॑ರ್ಮಣಿ । ವಿಶ್ವಾ॑ಸು ಧೀ॒ಷು ವಂ॑ದ್ಯ ॥

अवा॑ नो अग्न ऊ॒तिभि॑र्गाय॒त्रस्य॒ प्रभ॑र्मणि । विश्वा॑सु धी॒षु वं॑द्य ॥

ಆ ನೋ॑ ಅಗ್ನೇ ರ॒ಯಿಂ ಭ॑ರ ಸತ್ರಾ॒ಸಾಹಂ॒ ವರೇ॑ಣ್ಯಂ । ವಿಶ್ವಾ॑ಸು ಪೃ॒ತ್ಸು ದು॒ಷ್ಟರಂ॑ ॥

आ नो॑ अग्ने र॒यिं भ॑र सत्रा॒साहं॒ वरे॑ण्यं । विश्वा॑सु पृ॒त्सु दु॒ष्टरं॑ ॥

ಆ ನೋ॑ ಅಗ್ನೇ ಸುಚೇ॒ತುನಾ॑ ರ॒ಯಿಂ ವಿ॒ಶ್ವಾಯು॑ಪೋಷಸಂ । ಮಾ॒ರ್ಡೀ॒ಕಂ ಧೇ॑ಹಿ ಜೀ॒ವಸೇ॑ ॥

आ नो॑ अग्ने सुचे॒तुना॑ र॒यिं वि॒श्वायु॑पोषसं । मा॒र्डी॒कं धे॑हि जी॒वसे॑ ॥

ಪ್ರ ಪೂ॒ತಾಸ್ತಿ॒ಗ್ಮಶೋ॑ಚಿಷೇ॒ ವಾಚೋ॑ ಗೋತಮಾ॒ಗ್ನಯೇ॑ । ಭರ॑ಸ್ವ ಸುಮ್ನ॒ಯುರ್ಗಿರಃ॑ ॥

प्र पू॒तास्ति॒ग्मशो॑चिषे॒ वाचो॑ गोतमा॒ग्नये॑ । भर॑स्व सुम्न॒युर्गिरः॑ ॥

ಯೋ ನೋ॑ ಅಗ್ನೇಽಭಿ॒ದಾಸ॒ತ್ಯಂತಿ॑ ದೂ॒ರೇ ಪ॑ದೀ॒ಷ್ಟ ಸಃ । ಅ॒ಸ್ಮಾಕ॒ಮಿದ್ವೃ॒ಧೇ ಭ॑ವ ॥

यो नो॑ अग्नेऽभि॒दास॒त्यंति॑ दू॒रे प॑दी॒ष्ट सः । अ॒स्माक॒मिद्वृ॒धे भ॑व ॥

ಸ॒ಹ॒ಸ್ರಾ॒ಕ್ಷೋ ವಿಚ॑ರ್ಷಣಿರ॒ಗ್ನೀ ರಕ್ಷಾಂ॑ಸಿ ಸೇಧತಿ । ಹೋತಾ॑ ಗೃಣೀತ ಉ॒ಕ್ಥ್ಯಃ॑ ॥

स॒ह॒स्रा॒क्षो विच॑र्षणिर॒ग्नी रक्षां॑सि सेधति । होता॑ गृणीत उ॒क्थ्यः॑ ॥