Sūkta 79

हिर॑ण्यकेशो॒ रज॑सो विसा॒रेऽहि॒र्धुनि॒र्वात॑ इव॒ ध्रजी॑मान् । शुचि॑भ्राजा उ॒षसो॒ नवे॑दा॒ यश॑स्वतीरप॒स्युवो॒ न स॒त्याः ॥

híraṇyakeśo rájaso visāré’hirdhúnirvā́ta iva dhrájīmān ǀ śúcibhrājā uṣáso návedā yáśasvatīrapasyúvo ná satyā́ḥ ǁ

आ ते॑ सुप॒र्णा अ॑मिनंतँ॒ एवैः॑ कृ॒ष्णो नो॑नाव वृष॒भो यदी॒दं । शि॒वाभि॒र्न स्मय॑मानाभि॒रागा॒त्पतं॑ति॒ मिहः॑ स्त॒नयं॑त्य॒भ्रा ॥

ā́ te suparṇā́ aminantam̐ évaiḥ kṛṣṇó nonāva vṛṣabhó yádīdám ǀ śivā́bhirná smáyamānābhirā́gātpátanti míhaḥ stanáyantyabhrā́ ǁ

यदी॑मृ॒तस्य॒ पय॑सा॒ पिया॑नो॒ नय॑न्नृ॒तस्य॑ प॒थिभी॒ रजि॑ष्ठैः । अ॒र्य॒मा मि॒त्रो वरु॑णः॒ परि॑ज्मा॒ त्वचं॑ पृंचं॒त्युप॑रस्य॒ योनौ॑ ॥

yádīmṛtásya páyasā píyāno náyannṛtásya pathíbhī rájiṣṭhaiḥ ǀ aryamā́ mitró váruṇaḥ párijmā tvácam pṛñcantyúparasya yónau ǁ

अग्ने॒ वाज॑स्य॒ गोम॑त॒ ईशा॑नः सहसो यहो । अ॒स्मे धे॑हि जातवेदो॒ महि॒ श्रवः॑ ॥

ágne vā́jasya gómata ī́śānaḥ sahaso yaho ǀ asmé dhehi jātavedo máhi śrávaḥ ǁ

स इ॑धा॒नो वसु॑ष्क॒विर॒ग्निरी॒ळेन्यो॑ गि॒रा । रे॒वद॒स्मभ्यं॑ पुर्वणीक दीदिहि ॥

sá idhānó vásuṣkavíragnírīḷényo girā́ ǀ revádasmábhyam purvaṇīka dīdihi ǁ

क्ष॒पो रा॑जन्नु॒त त्मनाग्ने॒ वस्तो॑रु॒तोषसः॑ । स ति॑ग्मजंभ र॒क्षसो॑ दह॒ प्रति॑ ॥

kṣapó rājannutá tmánā́gne vástorutóṣásaḥ ǀ sá tigmajambha rakṣáso daha práti ǁ

अवा॑ नो अग्न ऊ॒तिभि॑र्गाय॒त्रस्य॒ प्रभ॑र्मणि । विश्वा॑सु धी॒षु वं॑द्य ॥

ávā no agna ūtíbhirgāyatrásya prábharmaṇi ǀ víśvāsu dhīṣú vandya ǁ

आ नो॑ अग्ने र॒यिं भ॑र सत्रा॒साहं॒ वरे॑ण्यं । विश्वा॑सु पृ॒त्सु दु॒ष्टरं॑ ॥

ā́ no agne rayím bhara satrāsā́ham váreṇyam ǀ víśvāsu pṛtsú duṣṭáram ǁ

आ नो॑ अग्ने सुचे॒तुना॑ र॒यिं वि॒श्वायु॑पोषसं । मा॒र्डी॒कं धे॑हि जी॒वसे॑ ॥

ā́ no agne sucetúnā rayím viśvā́yupoṣasam ǀ mārḍīkám dhehi jīváse ǁ

प्र पू॒तास्ति॒ग्मशो॑चिषे॒ वाचो॑ गोतमा॒ग्नये॑ । भर॑स्व सुम्न॒युर्गिरः॑ ॥

prá pūtā́stigmáśociṣe vā́co gotamāgnáye ǀ bhárasva sumnayúrgíraḥ ǁ

यो नो॑ अग्नेऽभि॒दास॒त्यंति॑ दू॒रे प॑दी॒ष्ट सः । अ॒स्माक॒मिद्वृ॒धे भ॑व ॥

yó no agne’bhidā́satyánti dūré padīṣṭá sáḥ ǀ asmā́kamídvṛdhé bhava ǁ

स॒ह॒स्रा॒क्षो विच॑र्षणिर॒ग्नी रक्षां॑सि सेधति । होता॑ गृणीत उ॒क्थ्यः॑ ॥

sahasrākṣó vícarṣaṇiragnī́ rákṣāṃsi sedhati ǀ hótā gṛṇīta ukthyáḥ ǁ