ಇಂದ್ರನ ಪರಾಕ್ರಮ ಮತ್ತು ಸ್ವಾರಾಜ್ಯದ ವಿಜಯ

ಇ॒ತ್ಥಾ ಹಿ ಸೋಮ॒ ಇನ್ಮದೇ॑ ಬ್ರ॒ಹ್ಮಾ ಚ॒ಕಾರ॒ ವರ್ಧ॑ನಂ । ಶವಿ॑ಷ್ಠ ವಜ್ರಿ॒ನ್ನೋಜ॑ಸಾ ಪೃಥಿ॒ವ್ಯಾ ನಿಃ ಶ॑ಶಾ॒ ಅಹಿ॒ಮರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

इ॒त्था हि सोम॒ इन्मदे॑ ब्र॒ह्मा च॒कार॒ वर्ध॑नं । शवि॑ष्ठ वज्रि॒न्नोज॑सा पृथि॒व्या निः श॑शा॒ अहि॒मर्च॒न्ननु॑ स्व॒राज्यं॑ ॥

ಸ ತ್ವಾ॑ಮದ॒ದ್ವೃಷಾ॒ ಮದಃ॒ ಸೋಮಃ॑ ಶ್ಯೇ॒ನಾಭೃ॑ತಃ ಸು॒ತಃ । ಯೇನಾ॑ ವೃ॒ತ್ರಂ ನಿರ॒ದ್ಭ್ಯೋ ಜ॒ಘಂಥ॑ ವಜ್ರಿ॒ನ್ನೋಜ॒ಸಾರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

स त्वा॑मद॒द्वृषा॒ मदः॒ सोमः॑ श्ये॒नाभृ॑तः सु॒तः । येना॑ वृ॒त्रं निर॒द्भ्यो ज॒घंथ॑ वज्रि॒न्नोज॒सार्च॒न्ननु॑ स्व॒राज्यं॑ ॥

ಪ್ರೇಹ್ಯ॒ಭೀ॑ಹಿ ಧೃಷ್ಣು॒ಹಿ ನ ತೇ॒ ವಜ್ರೋ॒ ನಿ ಯಂ॑ಸತೇ । ಇಂದ್ರ॑ ನೃ॒ಮ್ಣಂ ಹಿ ತೇ॒ ಶವೋ॒ ಹನೋ॑ ವೃ॒ತ್ರಂ ಜಯಾ॑ ಅ॒ಪೋಽರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

प्रेह्य॒भी॑हि धृष्णु॒हि न ते॒ वज्रो॒ नि यं॑सते । इंद्र॑ नृ॒म्णं हि ते॒ शवो॒ हनो॑ वृ॒त्रं जया॑ अ॒पोऽर्च॒न्ननु॑ स्व॒राज्यं॑ ॥

ನಿರಿಂ॑ದ್ರ॒ ಭೂಮ್ಯಾ॒ ಅಧಿ॑ ವೃ॒ತ್ರಂ ಜ॑ಘಂಥ॒ ನಿರ್ದಿ॒ವಃ । ಸೃ॒ಜಾ ಮ॒ರುತ್ವ॑ತೀ॒ರವ॑ ಜೀ॒ವಧ॑ನ್ಯಾ ಇ॒ಮಾ ಅ॒ಪೋಽರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

निरिं॑द्र॒ भूम्या॒ अधि॑ वृ॒त्रं ज॑घंथ॒ निर्दि॒वः । सृ॒जा म॒रुत्व॑ती॒रव॑ जी॒वध॑न्या इ॒मा अ॒पोऽर्च॒न्ननु॑ स्व॒राज्यं॑ ॥

ಇಂದ್ರೋ॑ ವೃ॒ತ್ರಸ್ಯ॒ ದೋಧ॑ತಃ॒ ಸಾನುಂ॒ ವಜ್ರೇ॑ಣ ಹೀಳಿ॒ತಃ । ಅ॒ಭಿ॒ಕ್ರಮ್ಯಾವ॑ ಜಿಘ್ನತೇ॒ಽಪಃ ಸರ್ಮಾ॑ಯ ಚೋ॒ದಯ॒ನ್ನರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

इंद्रो॑ वृ॒त्रस्य॒ दोध॑तः॒ सानुं॒ वज्रे॑ण हीळि॒तः । अ॒भि॒क्रम्याव॑ जिघ्नते॒ऽपः सर्मा॑य चो॒दय॒न्नर्च॒न्ननु॑ स्व॒राज्यं॑ ॥

ಅಧಿ॒ ಸಾನೌ॒ ನಿ ಜಿ॑ಘ್ನತೇ॒ ವಜ್ರೇ॑ಣ ಶ॒ತಪ॑ರ್ವಣಾ । ಮಂ॒ದಾ॒ನ ಇಂದ್ರೋ॒ ಅಂಧ॑ಸಃ॒ ಸಖಿ॑ಭ್ಯೋ ಗಾ॒ತುಮಿ॑ಚ್ಛ॒ತ್ಯರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

अधि॒ सानौ॒ नि जि॑घ्नते॒ वज्रे॑ण श॒तप॑र्वणा । मं॒दा॒न इंद्रो॒ अंध॑सः॒ सखि॑भ्यो गा॒तुमि॑च्छ॒त्यर्च॒न्ननु॑ स्व॒राज्यं॑ ॥

ಇಂದ್ರ॒ ತುಭ್ಯ॒ಮಿದ॑ದ್ರಿ॒ವೋಽನು॑ತ್ತಂ ವಜ್ರಿನ್ವೀ॒ರ್ಯಂ॑ । ಯದ್ಧ॒ ತ್ಯಂ ಮಾ॒ಯಿನಂ॑ ಮೃ॒ಗಂ ತಮು॒ ತ್ವಂ ಮಾ॒ಯಯಾ॑ವಧೀ॒ರರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

इंद्र॒ तुभ्य॒मिद॑द्रि॒वोऽनु॑त्तं वज्रिन्वी॒र्यं॑ । यद्ध॒ त्यं मा॒यिनं॑ मृ॒गं तमु॒ त्वं मा॒यया॑वधी॒रर्च॒न्ननु॑ स्व॒राज्यं॑ ॥

ವಿ ತೇ॒ ವಜ್ರಾ॑ಸೋ ಅಸ್ಥಿರನ್ನವ॒ತಿಂ ನಾ॒ವ್ಯಾ॒೩॒॑ ಅನು॑ । ಮ॒ಹತ್ತ॑ ಇಂದ್ರ ವೀ॒ರ್ಯಂ॑ ಬಾ॒ಹ್ವೋಸ್ತೇ॒ ಬಲಂ॑ ಹಿ॒ತಮರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

वि ते॒ वज्रा॑सो अस्थिरन्नव॒तिं ना॒व्या॒३॒॑ अनु॑ । म॒हत्त॑ इंद्र वी॒र्यं॑ बा॒ह्वोस्ते॒ बलं॑ हि॒तमर्च॒न्ननु॑ स्व॒राज्यं॑ ॥

ಸ॒ಹಸ್ರಂ॑ ಸಾ॒ಕಮ॑ರ್ಚತ॒ ಪರಿ॑ ಷ್ಟೋಭತ ವಿಂಶ॒ತಿಃ । ಶ॒ತೈನ॒ಮನ್ವ॑ನೋನವು॒ರಿಂದ್ರಾ॑ಯ॒ ಬ್ರಹ್ಮೋದ್ಯ॑ತ॒ಮರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

स॒हस्रं॑ सा॒कम॑र्चत॒ परि॑ ष्टोभत विंश॒तिः । श॒तैन॒मन्व॑नोनवु॒रिंद्रा॑य॒ ब्रह्मोद्य॑त॒मर्च॒न्ननु॑ स्व॒राज्यं॑ ॥

ಇಂದ್ರೋ॑ ವೃ॒ತ್ರಸ್ಯ॒ ತವಿ॑ಷೀಂ॒ ನಿರ॑ಹ॒ನ್ತ್ಸಹ॑ಸಾ॒ ಸಹಃ॑ । ಮ॒ಹತ್ತದ॑ಸ್ಯ॒ ಪೌಂಸ್ಯಂ॑ ವೃ॒ತ್ರಂ ಜ॑ಘ॒ನ್ವಾಁ ಅ॑ಸೃಜ॒ದರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

इंद्रो॑ वृ॒त्रस्य॒ तवि॑षीं॒ निर॑ह॒न्त्सह॑सा॒ सहः॑ । म॒हत्तद॑स्य॒ पौंस्यं॑ वृ॒त्रं ज॑घ॒न्वाँ अ॑सृज॒दर्च॒न्ननु॑ स्व॒राज्यं॑ ॥

ಇ॒ಮೇ ಚಿ॒ತ್ತವ॑ ಮ॒ನ್ಯವೇ॒ ವೇಪೇ॑ತೇ ಭಿ॒ಯಸಾ॑ ಮ॒ಹೀ । ಯದಿಂ॑ದ್ರ ವಜ್ರಿ॒ನ್ನೋಜ॑ಸಾ ವೃ॒ತ್ರಂ ಮ॒ರುತ್ವಾಁ॒ ಅವ॑ಧೀ॒ರರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

इ॒मे चि॒त्तव॑ म॒न्यवे॒ वेपे॑ते भि॒यसा॑ म॒ही । यदिं॑द्र वज्रि॒न्नोज॑सा वृ॒त्रं म॒रुत्वाँ॒ अव॑धी॒रर्च॒न्ननु॑ स्व॒राज्यं॑ ॥

ನ ವೇಪ॑ಸಾ॒ ನ ತ॑ನ್ಯ॒ತೇಂದ್ರಂ॑ ವೃ॒ತ್ರೋ ವಿ ಬೀ॑ಭಯತ್ । ಅ॒ಭ್ಯೇ॑ನಂ॒ ವಜ್ರ॑ ಆಯ॒ಸಃ ಸ॒ಹಸ್ರ॑ಭೃಷ್ಟಿರಾಯ॒ತಾರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

न वेप॑सा॒ न त॑न्य॒तेंद्रं॑ वृ॒त्रो वि बी॑भयत् । अ॒भ्ये॑नं॒ वज्र॑ आय॒सः स॒हस्र॑भृष्टिराय॒तार्च॒न्ननु॑ स्व॒राज्यं॑ ॥

ಯದ್ವೃ॒ತ್ರಂ ತವ॑ ಚಾ॒ಶನಿಂ॒ ವಜ್ರೇ॑ಣ ಸ॒ಮಯೋ॑ಧಯಃ । ಅಹಿ॑ಮಿಂದ್ರ॒ ಜಿಘಾಂ॑ಸತೋ ದಿ॒ವಿ ತೇ॑ ಬದ್ಬಧೇ॒ ಶವೋಽರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

यद्वृ॒त्रं तव॑ चा॒शनिं॒ वज्रे॑ण स॒मयो॑धयः । अहि॑मिंद्र॒ जिघां॑सतो दि॒वि ते॑ बद्बधे॒ शवोऽर्च॒न्ननु॑ स्व॒राज्यं॑ ॥

ಅ॒ಭಿ॒ಷ್ಟ॒ನೇ ತೇ॑ ಅದ್ರಿವೋ॒ ಯತ್ಸ್ಥಾ ಜಗ॑ಚ್ಚ ರೇಜತೇ । ತ್ವಷ್ಟಾ॑ ಚಿ॒ತ್ತವ॑ ಮ॒ನ್ಯವ॒ ಇಂದ್ರ॑ ವೇವಿ॒ಜ್ಯತೇ॑ ಭಿ॒ಯಾರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

अ॒भि॒ष्ट॒ने ते॑ अद्रिवो॒ यत्स्था जग॑च्च रेजते । त्वष्टा॑ चि॒त्तव॑ म॒न्यव॒ इंद्र॑ वेवि॒ज्यते॑ भि॒यार्च॒न्ननु॑ स्व॒राज्यं॑ ॥

ನ॒ಹಿ ನು ಯಾದ॑ಧೀ॒ಮಸೀಂದ್ರಂ॒ ಕೋ ವೀ॒ರ್ಯಾ॑ ಪ॒ರಃ । ತಸ್ಮಿ॑ನ್ನೃ॒ಮ್ಣಮು॒ತ ಕ್ರತುಂ॑ ದೇ॒ವಾ ಓಜಾಂ॑ಸಿ॒ ಸಂ ದ॑ಧು॒ರರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

न॒हि नु याद॑धी॒मसींद्रं॒ को वी॒र्या॑ प॒रः । तस्मि॑न्नृ॒म्णमु॒त क्रतुं॑ दे॒वा ओजां॑सि॒ सं द॑धु॒रर्च॒न्ननु॑ स्व॒राज्यं॑ ॥

ಯಾಮಥ॑ರ್ವಾ॒ ಮನು॑ಷ್ಪಿ॒ತಾ ದ॒ಧ್ಯಙ್ ಧಿಯ॒ಮತ್ನ॑ತ । ತಸ್ಮಿ॒ನ್ಬ್ರಹ್ಮಾ॑ಣಿ ಪೂ॒ರ್ವಥೇಂದ್ರ॑ ಉ॒ಕ್ಥಾ ಸಮ॑ಗ್ಮ॒ತಾರ್ಚ॒ನ್ನನು॑ ಸ್ವ॒ರಾಜ್ಯಂ॑ ॥

यामथ॑र्वा॒ मनु॑ष्पि॒ता द॒ध्यङ् धिय॒मत्न॑त । तस्मि॒न्ब्रह्मा॑णि पू॒र्वथेंद्र॑ उ॒क्था सम॑ग्म॒तार्च॒न्ननु॑ स्व॒राज्यं॑ ॥