ಉಷಸಃ ಸೂಕ್ತ - ದಿವ್ಯ ಅರುಣೋದಯ ಮತ್ತು ಜಾಗೃತಿಯ ಆಹ್ವಾನ

ಸ॒ಹ ವಾ॒ಮೇನ॑ ನ ಉಷೋ॒ ವ್ಯು॑ಚ್ಛಾ ದುಹಿತರ್ದಿವಃ । ಸ॒ಹ ದ್ಯು॒ಮ್ನೇನ॑ ಬೃಹ॒ತಾ ವಿ॑ಭಾವರಿ ರಾ॒ಯಾ ದೇ॑ವಿ॒ ದಾಸ್ವ॑ತೀ ॥

स॒ह वा॒मेन॑ न उषो॒ व्यु॑च्छा दुहितर्दिवः । स॒ह द्यु॒म्नेन॑ बृह॒ता वि॑भावरि रा॒या दे॑वि॒ दास्व॑ती ॥

ಅಶ್ವಾ॑ವತೀ॒ರ್ಗೋಮ॑ತೀರ್ವಿಶ್ವಸು॒ವಿದೋ॒ ಭೂರಿ॑ ಚ್ಯವಂತ॒ ವಸ್ತ॑ವೇ । ಉದೀ॑ರಯ॒ ಪ್ರತಿ॑ ಮಾ ಸೂ॒ನೃತಾ॑ ಉಷ॒ಶ್ಚೋದ॒ ರಾಧೋ॑ ಮ॒ಘೋನಾಂ॑ ॥

अश्वा॑वती॒र्गोम॑तीर्विश्वसु॒विदो॒ भूरि॑ च्यवंत॒ वस्त॑वे । उदी॑रय॒ प्रति॑ मा सू॒नृता॑ उष॒श्चोद॒ राधो॑ म॒घोनां॑ ॥

ಉ॒ವಾಸೋ॒ಷಾ ಉ॒ಚ್ಛಾಚ್ಚ॒ ನು ದೇ॒ವೀ ಜೀ॒ರಾ ರಥಾ॑ನಾಂ । ಯೇ ಅ॑ಸ್ಯಾ ಆ॒ಚರ॑ಣೇಷು ದಧ್ರಿ॒ರೇ ಸ॑ಮು॒ದ್ರೇ ನ ಶ್ರ॑ವ॒ಸ್ಯವಃ॑ ॥

उ॒वासो॒षा उ॒च्छाच्च॒ नु दे॒वी जी॒रा रथा॑नां । ये अ॑स्या आ॒चर॑णेषु दध्रि॒रे स॑मु॒द्रे न श्र॑व॒स्यवः॑ ॥

ಉಷೋ॒ ಯೇ ತೇ॒ ಪ್ರ ಯಾಮೇ॑ಷು ಯುಂ॒ಜತೇ॒ ಮನೋ॑ ದಾ॒ನಾಯ॑ ಸೂ॒ರಯಃ॑ । ಅತ್ರಾಹ॒ ತತ್ಕಣ್ವ॑ ಏಷಾಂ॒ ಕಣ್ವ॑ತಮೋ॒ ನಾಮ॑ ಗೃಣಾತಿ ನೃ॒ಣಾಂ ॥

उषो॒ ये ते॒ प्र यामे॑षु युं॒जते॒ मनो॑ दा॒नाय॑ सू॒रयः॑ । अत्राह॒ तत्कण्व॑ एषां॒ कण्व॑तमो॒ नाम॑ गृणाति नृ॒णां ॥

ಆ ಘಾ॒ ಯೋಷೇ॑ವ ಸೂ॒ನರ್ಯು॒ಷಾ ಯಾ॑ತಿ ಪ್ರಭುಂಜ॒ತೀ । ಜ॒ರಯಂ॑ತೀ॒ ವೃಜ॑ನಂ ಪ॒ದ್ವದೀ॑ಯತ॒ ಉತ್ಪಾ॑ತಯತಿ ಪ॒ಕ್ಷಿಣಃ॑ ॥

आ घा॒ योषे॑व सू॒नर्यु॒षा या॑ति प्रभुंज॒ती । ज॒रयं॑ती॒ वृज॑नं प॒द्वदी॑यत॒ उत्पा॑तयति प॒क्षिणः॑ ॥

ವಿ ಯಾ ಸೃ॒ಜತಿ॒ ಸಮ॑ನಂ॒ ವ್ಯ೧॒॑ರ್ಥಿನಃ॑ ಪ॒ದಂ ನ ವೇ॒ತ್ಯೋದ॑ತೀ । ವಯೋ॒ ನಕಿ॑ಷ್ಟೇ ಪಪ್ತಿ॒ವಾಂಸ॑ ಆಸತೇ॒ ವ್ಯು॑ಷ್ಟೌ ವಾಜಿನೀವತಿ ॥

वि या सृ॒जति॒ सम॑नं॒ व्य१॒॑र्थिनः॑ प॒दं न वे॒त्योद॑ती । वयो॒ नकि॑ष्टे पप्ति॒वांस॑ आसते॒ व्यु॑ष्टौ वाजिनीवति ॥

ಏ॒ಷಾಯು॑ಕ್ತ ಪರಾ॒ವತಃ॒ ಸೂರ್ಯ॑ಸ್ಯೋ॒ದಯ॑ನಾ॒ದಧಿ॑ । ಶ॒ತಂ ರಥೇ॑ಭಿಃ ಸು॒ಭಗೋ॒ಷಾ ಇ॒ಯಂ ವಿ ಯಾ॑ತ್ಯ॒ಭಿ ಮಾನು॑ಷಾನ್ ॥

ए॒षायु॑क्त परा॒वतः॒ सूर्य॑स्यो॒दय॑ना॒दधि॑ । श॒तं रथे॑भिः सु॒भगो॒षा इ॒यं वि या॑त्य॒भि मानु॑षान् ॥

ವಿಶ್ವ॑ಮಸ್ಯಾ ನಾನಾಮ॒ ಚಕ್ಷ॑ಸೇ॒ ಜಗ॒ಜ್ಜ್ಯೋತಿ॑ಷ್ಕೃಣೋತಿ ಸೂ॒ನರೀ॑ । ಅಪ॒ ದ್ವೇಷೋ॑ ಮ॒ಘೋನೀ॑ ದುಹಿ॒ತಾ ದಿ॒ವ ಉ॒ಷಾ ಉ॑ಚ್ಛ॒ದಪ॒ ಸ್ರಿಧಃ॑ ॥

विश्व॑मस्या नानाम॒ चक्ष॑से॒ जग॒ज्ज्योति॑ष्कृणोति सू॒नरी॑ । अप॒ द्वेषो॑ म॒घोनी॑ दुहि॒ता दि॒व उ॒षा उ॑च्छ॒दप॒ स्रिधः॑ ॥

ಉಷ॒ ಆ ಭಾ॑ಹಿ ಭಾ॒ನುನಾ॑ ಚಂ॒ದ್ರೇಣ॑ ದುಹಿತರ್ದಿವಃ । ಆ॒ವಹಂ॑ತೀ॒ ಭೂರ್ಯ॒ಸ್ಮಭ್ಯಂ॒ ಸೌಭ॑ಗಂ ವ್ಯು॒ಚ್ಛಂತೀ॒ ದಿವಿ॑ಷ್ಟಿಷು ॥

उष॒ आ भा॑हि भा॒नुना॑ चं॒द्रेण॑ दुहितर्दिवः । आ॒वहं॑ती॒ भूर्य॒स्मभ्यं॒ सौभ॑गं व्यु॒च्छंती॒ दिवि॑ष्टिषु ॥

ವಿಶ್ವ॑ಸ್ಯ॒ ಹಿ ಪ್ರಾಣ॑ನಂ॒ ಜೀವ॑ನಂ॒ ತ್ವೇ ವಿ ಯದು॒ಚ್ಛಸಿ॑ ಸೂನರಿ । ಸಾ ನೋ॒ ರಥೇ॑ನ ಬೃಹ॒ತಾ ವಿ॑ಭಾವರಿ ಶ್ರು॒ಧಿ ಚಿ॑ತ್ರಾಮಘೇ॒ ಹವಂ॑ ॥

विश्व॑स्य॒ हि प्राण॑नं॒ जीव॑नं॒ त्वे वि यदु॒च्छसि॑ सूनरि । सा नो॒ रथे॑न बृह॒ता वि॑भावरि श्रु॒धि चि॑त्रामघे॒ हवं॑ ॥

ಉಷೋ॒ ವಾಜಂ॒ ಹಿ ವಂಸ್ವ॒ ಯಶ್ಚಿ॒ತ್ರೋ ಮಾನು॑ಷೇ॒ ಜನೇ॑ । ತೇನಾ ವ॑ಹ ಸು॒ಕೃತೋ॑ ಅಧ್ವ॒ರಾಁ ಉಪ॒ ಯೇ ತ್ವಾ॑ ಗೃ॒ಣಂತಿ॒ ವಹ್ನ॑ಯಃ ॥

उषो॒ वाजं॒ हि वंस्व॒ यश्चि॒त्रो मानु॑षे॒ जने॑ । तेना व॑ह सु॒कृतो॑ अध्व॒राँ उप॒ ये त्वा॑ गृ॒णंति॒ वह्न॑यः ॥

ವಿಶ್ವಾ॑ನ್ದೇ॒ವಾಁ ಆ ವ॑ಹ॒ ಸೋಮ॑ಪೀತಯೇ॒ಽಂತರಿ॑ಕ್ಷಾದುಷ॒ಸ್ತ್ವಂ । ಸಾಸ್ಮಾಸು॑ ಧಾ॒ ಗೋಮ॒ದಶ್ವಾ॑ವದು॒ಕ್ಥ್ಯ೧॒॑ಮುಷೋ॒ ವಾಜಂ॑ ಸು॒ವೀರ್ಯಂ॑ ॥

विश्वा॑न्दे॒वाँ आ व॑ह॒ सोम॑पीतये॒ऽंतरि॑क्षादुष॒स्त्वं । सास्मासु॑ धा॒ गोम॒दश्वा॑वदु॒क्थ्य१॒॑मुषो॒ वाजं॑ सु॒वीर्यं॑ ॥

ಯಸ್ಯಾ॒ ರುಶಂ॑ತೋ ಅ॒ರ್ಚಯಃ॒ ಪ್ರತಿ॑ ಭ॒ದ್ರಾ ಅದೃ॑ಕ್ಷತ । ಸಾ ನೋ॑ ರ॒ಯಿಂ ವಿ॒ಶ್ವವಾ॑ರಂ ಸು॒ಪೇಶ॑ಸಮು॒ಷಾ ದ॑ದಾತು॒ ಸುಗ್ಮ್ಯಂ॑ ॥

यस्या॒ रुशं॑तो अ॒र्चयः॒ प्रति॑ भ॒द्रा अदृ॑क्षत । सा नो॑ र॒यिं वि॒श्ववा॑रं सु॒पेश॑समु॒षा द॑दातु॒ सुग्म्यं॑ ॥

ಯೇ ಚಿ॒ದ್ಧಿ ತ್ವಾಮೃಷ॑ಯಃ॒ ಪೂರ್ವ॑ ಊ॒ತಯೇ॑ ಜುಹೂ॒ರೇಽವ॑ಸೇ ಮಹಿ । ಸಾ ನಃ॒ ಸ್ತೋಮಾಁ॑ ಅ॒ಭಿ ಗೃ॑ಣೀಹಿ॒ ರಾಧ॒ಸೋಷಃ॑ ಶು॒ಕ್ರೇಣ॑ ಶೋ॒ಚಿಷಾ॑ ॥

ये चि॒द्धि त्वामृष॑यः॒ पूर्व॑ ऊ॒तये॑ जुहू॒रेऽव॑से महि । सा नः॒ स्तोमाँ॑ अ॒भि गृ॑णीहि॒ राध॒सोषः॑ शु॒क्रेण॑ शो॒चिषा॑ ॥

ಉಷೋ॒ ಯದ॒ದ್ಯ ಭಾ॒ನುನಾ॒ ವಿ ದ್ವಾರಾ॑ವೃ॒ಣವೋ॑ ದಿ॒ವಃ । ಪ್ರ ನೋ॑ ಯಚ್ಛತಾದವೃ॒ಕಂ ಪೃ॒ಥು ಚ್ಛ॒ರ್ದಿಃ ಪ್ರ ದೇ॑ವಿ॒ ಗೋಮ॑ತೀ॒ರಿಷಃ॑ ॥

उषो॒ यद॒द्य भा॒नुना॒ वि द्वारा॑वृ॒णवो॑ दि॒वः । प्र नो॑ यच्छतादवृ॒कं पृ॒थु च्छ॒र्दिः प्र दे॑वि॒ गोम॑ती॒रिषः॑ ॥

ಸಂ ನೋ॑ ರಾ॒ಯಾ ಬೃ॑ಹ॒ತಾ ವಿ॒ಶ್ವಪೇ॑ಶಸಾ ಮಿಮಿ॒ಕ್ಷ್ವಾ ಸಮಿಳಾ॑ಭಿ॒ರಾ । ಸಂ ದ್ಯು॒ಮ್ನೇನ॑ ವಿಶ್ವ॒ತುರೋ॑ಷೋ ಮಹಿ॒ ಸಂ ವಾಜೈ॑ರ್ವಾಜಿನೀವತಿ ॥

सं नो॑ रा॒या बृ॑ह॒ता वि॒श्वपे॑शसा मिमि॒क्ष्वा समिळा॑भि॒रा । सं द्यु॒म्नेन॑ विश्व॒तुरो॑षो महि॒ सं वाजै॑र्वाजिनीवति ॥