ಅಶ್ವಿನ್‌ ದೇವತೆಗಳ ಆಹ್ವಾನ - ದಿವ್ಯ ಬೆಳಕು ಮತ್ತು ಅಮೃತದತ್ತ ಪಯಣ

ಅ॒ಯಂ ವಾಂ॒ ಮಧು॑ಮತ್ತಮಃ ಸು॒ತಃ ಸೋಮ॑ ಋತಾವೃಧಾ । ತಮ॑ಶ್ವಿನಾ ಪಿಬತಂ ತಿ॒ರೋಅ॑ಹ್ನ್ಯಂ ಧ॒ತ್ತಂ ರತ್ನಾ॑ನಿ ದಾ॒ಶುಷೇ॑ ॥

अ॒यं वां॒ मधु॑मत्तमः सु॒तः सोम॑ ऋतावृधा । तम॑श्विना पिबतं ति॒रोअ॑ह्न्यं ध॒त्तं रत्ना॑नि दा॒शुषे॑ ॥

ತ್ರಿ॒ವಂ॒ಧು॒ರೇಣ॑ ತ್ರಿ॒ವೃತಾ॑ ಸು॒ಪೇಶ॑ಸಾ॒ ರಥೇ॒ನಾ ಯಾ॑ತಮಶ್ವಿನಾ । ಕಣ್ವಾ॑ಸೋ ವಾಂ॒ ಬ್ರಹ್ಮ॑ ಕೃಣ್ವಂತ್ಯಧ್ವ॒ರೇ ತೇಷಾಂ॒ ಸು ಶೃ॑ಣುತಂ॒ ಹವಂ॑ ॥

त्रि॒वं॒धु॒रेण॑ त्रि॒वृता॑ सु॒पेश॑सा॒ रथे॒ना या॑तमश्विना । कण्वा॑सो वां॒ ब्रह्म॑ कृण्वंत्यध्व॒रे तेषां॒ सु शृ॑णुतं॒ हवं॑ ॥

ಅಶ್ವಿ॑ನಾ॒ ಮಧು॑ಮತ್ತಮಂ ಪಾ॒ತಂ ಸೋಮ॑ಮೃತಾವೃಧಾ । ಅಥಾ॒ದ್ಯ ದ॑ಸ್ರಾ॒ ವಸು॒ ಬಿಭ್ರ॑ತಾ॒ ರಥೇ॑ ದಾ॒ಶ್ವಾಂಸ॒ಮುಪ॑ ಗಚ್ಛತಂ ॥

अश्वि॑ना॒ मधु॑मत्तमं पा॒तं सोम॑मृतावृधा । अथा॒द्य द॑स्रा॒ वसु॒ बिभ्र॑ता॒ रथे॑ दा॒श्वांस॒मुप॑ गच्छतं ॥

ತ್ರಿ॒ಷ॒ಧ॒ಸ್ಥೇ ಬ॒ರ್ಹಿಷಿ॑ ವಿಶ್ವವೇದಸಾ॒ ಮಧ್ವಾ॑ ಯ॒ಜ್ಞಂ ಮಿ॑ಮಿಕ್ಷತಂ । ಕಣ್ವಾ॑ಸೋ ವಾಂ ಸು॒ತಸೋ॑ಮಾ ಅ॒ಭಿದ್ಯ॑ವೋ ಯು॒ವಾಂ ಹ॑ವಂತೇ ಅಶ್ವಿನಾ ॥

त्रि॒ष॒ध॒स्थे ब॒र्हिषि॑ विश्ववेदसा॒ मध्वा॑ य॒ज्ञं मि॑मिक्षतं । कण्वा॑सो वां सु॒तसो॑मा अ॒भिद्य॑वो यु॒वां ह॑वंते अश्विना ॥

ಯಾಭಿಃ॒ ಕಣ್ವ॑ಮ॒ಭಿಷ್ಟಿ॑ಭಿಃ॒ ಪ್ರಾವ॑ತಂ ಯು॒ವಮ॑ಶ್ವಿನಾ । ತಾಭಿಃ॒ ಷ್ವ೧॒॑ಸ್ಮಾಁ ಅ॑ವತಂ ಶುಭಸ್ಪತೀ ಪಾ॒ತಂ ಸೋಮ॑ಮೃತಾವೃಧಾ ॥

याभिः॒ कण्व॑म॒भिष्टि॑भिः॒ प्राव॑तं यु॒वम॑श्विना । ताभिः॒ ष्व१॒॑स्माँ अ॑वतं शुभस्पती पा॒तं सोम॑मृतावृधा ॥

ಸು॒ದಾಸೇ॑ ದಸ್ರಾ॒ ವಸು॒ ಬಿಭ್ರ॑ತಾ॒ ರಥೇ॒ ಪೃಕ್ಷೋ॑ ವಹತಮಶ್ವಿನಾ । ರ॒ಯಿಂ ಸ॑ಮು॒ದ್ರಾದು॒ತ ವಾ॑ ದಿ॒ವಸ್ಪರ್ಯ॒ಸ್ಮೇ ಧ॑ತ್ತಂ ಪುರು॒ಸ್ಪೃಹಂ॑ ॥

सु॒दासे॑ दस्रा॒ वसु॒ बिभ्र॑ता॒ रथे॒ पृक्षो॑ वहतमश्विना । र॒यिं स॑मु॒द्रादु॒त वा॑ दि॒वस्पर्य॒स्मे ध॑त्तं पुरु॒स्पृहं॑ ॥

ಯನ್ನಾ॑ಸತ್ಯಾ ಪರಾ॒ವತಿ॒ ಯದ್ವಾ॒ ಸ್ಥೋ ಅಧಿ॑ ತು॒ರ್ವಶೇ॑ । ಅತೋ॒ ರಥೇ॑ನ ಸು॒ವೃತಾ॑ ನ॒ ಆ ಗ॑ತಂ ಸಾ॒ಕಂ ಸೂರ್ಯ॑ಸ್ಯ ರ॒ಶ್ಮಿಭಿಃ॑ ॥

यन्ना॑सत्या परा॒वति॒ यद्वा॒ स्थो अधि॑ तु॒र्वशे॑ । अतो॒ रथे॑न सु॒वृता॑ न॒ आ ग॑तं सा॒कं सूर्य॑स्य र॒श्मिभिः॑ ॥

ಅ॒ರ್ವಾಂಚಾ॑ ವಾಂ॒ ಸಪ್ತ॑ಯೋಽಧ್ವರ॒ಶ್ರಿಯೋ॒ ವಹಂ॑ತು॒ ಸವ॒ನೇದುಪ॑ । ಇಷಂ॑ ಪೃಂ॒ಚಂತಾ॑ ಸು॒ಕೃತೇ॑ ಸು॒ದಾನ॑ವ॒ ಆ ಬ॒ರ್ಹಿಃ ಸೀ॑ದತಂ ನರಾ ॥

अ॒र्वांचा॑ वां॒ सप्त॑योऽध्वर॒श्रियो॒ वहं॑तु॒ सव॒नेदुप॑ । इषं॑ पृं॒चंता॑ सु॒कृते॑ सु॒दान॑व॒ आ ब॒र्हिः सी॑दतं नरा ॥

ತೇನ॑ ನಾಸ॒ತ್ಯಾ ಗ॑ತಂ॒ ರಥೇ॑ನ॒ ಸೂರ್ಯ॑ತ್ವಚಾ । ಯೇನ॒ ಶಶ್ವ॑ದೂ॒ಹಥು॑ರ್ದಾ॒ಶುಷೇ॒ ವಸು॒ ಮಧ್ವಃ॒ ಸೋಮ॑ಸ್ಯ ಪೀ॒ತಯೇ॑ ॥

तेन॑ नास॒त्या ग॑तं॒ रथे॑न॒ सूर्य॑त्वचा । येन॒ शश्व॑दू॒हथु॑र्दा॒शुषे॒ वसु॒ मध्वः॒ सोम॑स्य पी॒तये॑ ॥

ಉ॒ಕ್ಥೇಭಿ॑ರ॒ರ್ವಾಗವ॑ಸೇ ಪುರೂ॒ವಸೂ॑ ಅ॒ರ್ಕೈಶ್ಚ॒ ನಿ ಹ್ವ॑ಯಾಮಹೇ । ಶಶ್ವ॒ತ್ಕಣ್ವಾ॑ನಾಂ॒ ಸದ॑ಸಿ ಪ್ರಿ॒ಯೇ ಹಿ ಕಂ॒ ಸೋಮಂ॑ ಪ॒ಪಥು॑ರಶ್ವಿನಾ ॥

उ॒क्थेभि॑र॒र्वागव॑से पुरू॒वसू॑ अ॒र्कैश्च॒ नि ह्व॑यामहे । शश्व॒त्कण्वा॑नां॒ सद॑सि प्रि॒ये हि कं॒ सोमं॑ प॒पथु॑रश्विना ॥