ಅಗ್ನಿಯ ದಿವ್ಯ ಜನ್ಮ ಮತ್ತು ಪ್ರಕಾಶ: ಋಗ್ವೇದ ಮಂಡಲ 1, ಸೂಕ್ತ 95

ದ್ವೇ ವಿರೂ॑ಪೇ ಚರತಃ॒ ಸ್ವರ್ಥೇ॑ ಅ॒ನ್ಯಾನ್ಯಾ॑ ವ॒ತ್ಸಮುಪ॑ ಧಾಪಯೇತೇ । ಹರಿ॑ರ॒ನ್ಯಸ್ಯಾಂ॒ ಭವ॑ತಿ ಸ್ವ॒ಧಾವಾಂ॑ಛು॒ಕ್ರೋ ಅ॒ನ್ಯಸ್ಯಾಂ॑ ದದೃಶೇ ಸು॒ವರ್ಚಾಃ॑ ॥

द्वे विरू॑पे चरतः॒ स्वर्थे॑ अ॒न्यान्या॑ व॒त्समुप॑ धापयेते । हरि॑र॒न्यस्यां॒ भव॑ति स्व॒धावां॑छु॒क्रो अ॒न्यस्यां॑ ददृशे सु॒वर्चाः॑ ॥

ದಶೇ॒ಮಂ ತ್ವಷ್ಟು॑ರ್ಜನಯಂತ॒ ಗರ್ಭ॒ಮತಂ॑ದ್ರಾಸೋ ಯುವ॒ತಯೋ॒ ವಿಭೃ॑ತ್ರಂ । ತಿ॒ಗ್ಮಾನೀ॑ಕಂ॒ ಸ್ವಯ॑ಶಸಂ॒ ಜನೇ॑ಷು ವಿ॒ರೋಚ॑ಮಾನಂ॒ ಪರಿ॑ ಷೀಂ ನಯಂತಿ ॥

दशे॒मं त्वष्टु॑र्जनयंत॒ गर्भ॒मतं॑द्रासो युव॒तयो॒ विभृ॑त्रं । ति॒ग्मानी॑कं॒ स्वय॑शसं॒ जने॑षु वि॒रोच॑मानं॒ परि॑ षीं नयंति ॥

ತ್ರೀಣಿ॒ ಜಾನಾ॒ ಪರಿ॑ ಭೂಷಂತ್ಯಸ್ಯ ಸಮು॒ದ್ರ ಏಕಂ॑ ದಿ॒ವ್ಯೇಕ॑ಮ॒ಪ್ಸು । ಪೂರ್ವಾ॒ಮನು॒ ಪ್ರ ದಿಶಂ॒ ಪಾರ್ಥಿ॑ವಾನಾಮೃ॒ತೂನ್ಪ್ರ॒ಶಾಸ॒ದ್ವಿ ದ॑ಧಾವನು॒ಷ್ಠು ॥

त्रीणि॒ जाना॒ परि॑ भूषंत्यस्य समु॒द्र एकं॑ दि॒व्येक॑म॒प्सु । पूर्वा॒मनु॒ प्र दिशं॒ पार्थि॑वानामृ॒तून्प्र॒शास॒द्वि द॑धावनु॒ष्ठु ॥

ಕ ಇ॒ಮಂ ವೋ॑ ನಿ॒ಣ್ಯಮಾ ಚಿ॑ಕೇತ ವ॒ತ್ಸೋ ಮಾ॒ತೄರ್ಜ॑ನಯತ ಸ್ವ॒ಧಾಭಿಃ॑ । ಬ॒ಹ್ವೀ॒ನಾಂ ಗರ್ಭೋ॑ ಅ॒ಪಸಾ॑ಮು॒ಪಸ್ಥಾ॑ನ್ಮ॒ಹಾನ್ಕ॒ವಿರ್ನಿಶ್ಚ॑ರತಿ ಸ್ವ॒ಧಾವಾ॑ನ್ ॥

क इ॒मं वो॑ नि॒ण्यमा चि॑केत व॒त्सो मा॒तॄर्ज॑नयत स्व॒धाभिः॑ । ब॒ह्वी॒नां गर्भो॑ अ॒पसा॑मु॒पस्था॑न्म॒हान्क॒विर्निश्च॑रति स्व॒धावा॑न् ॥

ಆ॒ವಿಷ್ಟ್ಯೋ॑ ವರ್ಧತೇ॒ ಚಾರು॑ರಾಸು ಜಿ॒ಹ್ಮಾನಾ॑ಮೂ॒ರ್ಧ್ವಃ ಸ್ವಯ॑ಶಾ ಉ॒ಪಸ್ಥೇ॑ । ಉ॒ಭೇ ತ್ವಷ್ಟು॑ರ್ಬಿಭ್ಯತು॒ರ್ಜಾಯ॑ಮಾನಾತ್ಪ್ರತೀ॒ಚೀ ಸಿಂ॒ಹಂ ಪ್ರತಿ॑ ಜೋಷಯೇತೇ ॥

आ॒विष्ट्यो॑ वर्धते॒ चारु॑रासु जि॒ह्माना॑मू॒र्ध्वः स्वय॑शा उ॒पस्थे॑ । उ॒भे त्वष्टु॑र्बिभ्यतु॒र्जाय॑मानात्प्रती॒ची सिं॒हं प्रति॑ जोषयेते ॥

ಉ॒ಭೇ ಭ॒ದ್ರೇ ಜೋ॑ಷಯೇತೇ॒ ನ ಮೇನೇ॒ ಗಾವೋ॒ ನ ವಾ॒ಶ್ರಾ ಉಪ॑ ತಸ್ಥು॒ರೇವೈಃ॑ । ಸ ದಕ್ಷಾ॑ಣಾಂ॒ ದಕ್ಷ॑ಪತಿರ್ಬಭೂವಾಂ॒ಜಂತಿ॒ ಯಂ ದ॑ಕ್ಷಿಣ॒ತೋ ಹ॒ವಿರ್ಭಿಃ॑ ॥

उ॒भे भ॒द्रे जो॑षयेते॒ न मेने॒ गावो॒ न वा॒श्रा उप॑ तस्थु॒रेवैः॑ । स दक्षा॑णां॒ दक्ष॑पतिर्बभूवां॒जंति॒ यं द॑क्षिण॒तो ह॒विर्भिः॑ ॥

ಉದ್ಯಂ॑ಯಮೀತಿ ಸವಿ॒ತೇವ॑ ಬಾ॒ಹೂ ಉ॒ಭೇ ಸಿಚೌ॑ ಯತತೇ ಭೀ॒ಮ ಋಂ॒ಜನ್ । ಉಚ್ಛು॒ಕ್ರಮತ್ಕ॑ಮಜತೇ ಸಿ॒ಮಸ್ಮಾ॒ನ್ನವಾ॑ ಮಾ॒ತೃಭ್ಯೋ॒ ವಸ॑ನಾ ಜಹಾತಿ ॥

उद्यं॑यमीति सवि॒तेव॑ बा॒हू उ॒भे सिचौ॑ यतते भी॒म ऋं॒जन् । उच्छु॒क्रमत्क॑मजते सि॒मस्मा॒न्नवा॑ मा॒तृभ्यो॒ वस॑ना जहाति ॥

ತ್ವೇ॒ಷಂ ರೂ॒ಪಂ ಕೃ॑ಣುತ॒ ಉತ್ತ॑ರಂ॒ ಯತ್ಸಂ॑ಪೃಂಚಾ॒ನಃ ಸದ॑ನೇ॒ ಗೋಭಿ॑ರ॒ದ್ಭಿಃ । ಕ॒ವಿರ್ಬು॒ಧ್ನಂ ಪರಿ॑ ಮರ್ಮೃಜ್ಯತೇ॒ ಧೀಃ ಸಾ ದೇ॒ವತಾ॑ತಾ॒ ಸಮಿ॑ತಿರ್ಬಭೂವ ॥

त्वे॒षं रू॒पं कृ॑णुत॒ उत्त॑रं॒ यत्सं॑पृंचा॒नः सद॑ने॒ गोभि॑र॒द्भिः । क॒विर्बु॒ध्नं परि॑ मर्मृज्यते॒ धीः सा दे॒वता॑ता॒ समि॑तिर्बभूव ॥

ಉ॒ರು ತೇ॒ ಜ್ರಯಃ॒ ಪರ್ಯೇ॑ತಿ ಬು॒ಧ್ನಂ ವಿ॒ರೋಚ॑ಮಾನಂ ಮಹಿ॒ಷಸ್ಯ॒ ಧಾಮ॑ । ವಿಶ್ವೇ॑ಭಿರಗ್ನೇ॒ ಸ್ವಯ॑ಶೋಭಿರಿ॒ದ್ಧೋಽದ॑ಬ್ಧೇಭಿಃ ಪಾ॒ಯುಭಿಃ॑ ಪಾಹ್ಯ॒ಸ್ಮಾನ್ ॥

उ॒रु ते॒ ज्रयः॒ पर्ये॑ति बु॒ध्नं वि॒रोच॑मानं महि॒षस्य॒ धाम॑ । विश्वे॑भिरग्ने॒ स्वय॑शोभिरि॒द्धोऽद॑ब्धेभिः पा॒युभिः॑ पाह्य॒स्मान् ॥

ಧನ್ವ॒ನ್ತ್ಸ್ರೋತಃ॑ ಕೃಣುತೇ ಗಾ॒ತುಮೂ॒ರ್ಮಿಂ ಶು॒ಕ್ರೈರೂ॒ರ್ಮಿಭಿ॑ರ॒ಭಿ ನ॑ಕ್ಷತಿ॒ ಕ್ಷಾಂ । ವಿಶ್ವಾ॒ ಸನಾ॑ನಿ ಜ॒ಠರೇ॑ಷು ಧತ್ತೇ॒ಽಂತರ್ನವಾ॑ಸು ಚರತಿ ಪ್ರ॒ಸೂಷು॑ ॥

धन्व॒न्त्स्रोतः॑ कृणुते गा॒तुमू॒र्मिं शु॒क्रैरू॒र्मिभि॑र॒भि न॑क्षति॒ क्षां । विश्वा॒ सना॑नि ज॒ठरे॑षु धत्ते॒ऽंतर्नवा॑सु चरति प्र॒सूषु॑ ॥

ಏ॒ವಾ ನೋ॑ ಅಗ್ನೇ ಸ॒ಮಿಧಾ॑ ವೃಧಾ॒ನೋ ರೇ॒ವತ್ಪಾ॑ವಕ॒ ಶ್ರವ॑ಸೇ॒ ವಿ ಭಾ॑ಹಿ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹಂತಾ॒ಮದಿ॑ತಿಃ॒ ಸಿಂಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥

ए॒वा नो॑ अग्ने स॒मिधा॑ वृधा॒नो रे॒वत्पा॑वक॒ श्रव॑से॒ वि भा॑हि । तन्नो॑ मि॒त्रो वरु॑णो मामहंता॒मदि॑तिः॒ सिंधुः॑ पृथि॒वी उ॒त द्यौः ॥