ಇಂದ್ರನ ಶಕ್ತಿ ಹಾಗೂ ಸೋಮಯಾಗದ ಆಹ್ವಾನ

ಅಸಾ॑ವಿ॒ ಸೋಮ॑ ಇಂದ್ರ ತೇ॒ ಶವಿ॑ಷ್ಠ ಧೃಷ್ಣ॒ವಾ ಗ॑ಹಿ । ಆ ತ್ವಾ॑ ಪೃಣಕ್ತ್ವಿಂದ್ರಿ॒ಯಂ ರಜಃ॒ ಸೂರ್ಯೋ॒ ನ ರ॒ಶ್ಮಿಭಿಃ॑ ॥

असा॑वि॒ सोम॑ इंद्र ते॒ शवि॑ष्ठ धृष्ण॒वा ग॑हि । आ त्वा॑ पृणक्त्विंद्रि॒यं रजः॒ सूर्यो॒ न र॒श्मिभिः॑ ॥

ಇಂದ್ರ॒ಮಿದ್ಧರೀ॑ ವಹ॒ತೋಽಪ್ರ॑ತಿಧೃಷ್ಟಶವಸಂ । ಋಷೀ॑ಣಾಂ ಚ ಸ್ತು॒ತೀರುಪ॑ ಯ॒ಜ್ಞಂ ಚ॒ ಮಾನು॑ಷಾಣಾಂ ॥

इंद्र॒मिद्धरी॑ वह॒तोऽप्र॑तिधृष्टशवसं । ऋषी॑णां च स्तु॒तीरुप॑ य॒ज्ञं च॒ मानु॑षाणां ॥

ಆ ತಿ॑ಷ್ಠ ವೃತ್ರಹ॒ನ್ರಥಂ॑ ಯು॒ಕ್ತಾ ತೇ॒ ಬ್ರಹ್ಮ॑ಣಾ॒ ಹರೀ॑ । ಅ॒ರ್ವಾ॒ಚೀನಂ॒ ಸು ತೇ॒ ಮನೋ॒ ಗ್ರಾವಾ॑ ಕೃಣೋತು ವ॒ಗ್ನುನಾ॑ ॥

आ ति॑ष्ठ वृत्रह॒न्रथं॑ यु॒क्ता ते॒ ब्रह्म॑णा॒ हरी॑ । अ॒र्वा॒चीनं॒ सु ते॒ मनो॒ ग्रावा॑ कृणोतु व॒ग्नुना॑ ॥

ಇ॒ಮಮಿಂ॑ದ್ರ ಸು॒ತಂ ಪಿ॑ಬ॒ ಜ್ಯೇಷ್ಠ॒ಮಮ॑ರ್ತ್ಯಂ॒ ಮದಂ॑ । ಶು॒ಕ್ರಸ್ಯ॑ ತ್ವಾ॒ಭ್ಯ॑ಕ್ಷರಂ॒ಧಾರಾ॑ ಋ॒ತಸ್ಯ॒ ಸಾದ॑ನೇ ॥

इ॒ममिं॑द्र सु॒तं पि॑ब॒ ज्येष्ठ॒मम॑र्त्यं॒ मदं॑ । शु॒क्रस्य॑ त्वा॒भ्य॑क्षरं॒धारा॑ ऋ॒तस्य॒ साद॑ने ॥

ಇಂದ್ರಾ॑ಯ ನೂ॒ನಮ॑ರ್ಚತೋ॒ಕ್ಥಾನಿ॑ ಚ ಬ್ರವೀತನ । ಸು॒ತಾ ಅ॑ಮತ್ಸು॒ರಿಂದ॑ವೋ॒ ಜ್ಯೇಷ್ಠಂ॑ ನಮಸ್ಯತಾ॒ ಸಹಃ॑ ॥

इंद्रा॑य नू॒नम॑र्चतो॒क्थानि॑ च ब्रवीतन । सु॒ता अ॑मत्सु॒रिंद॑वो॒ ज्येष्ठं॑ नमस्यता॒ सहः॑ ॥

ನಕಿ॒ಷ್ಟ್ವದ್ರ॒ಥೀತ॑ರೋ॒ ಹರೀ॒ ಯದಿಂ॑ದ್ರ॒ ಯಚ್ಛ॑ಸೇ । ನಕಿ॒ಷ್ಟ್ವಾನು॑ ಮ॒ಜ್ಮನಾ॒ ನಕಿಃ॒ ಸ್ವಶ್ವ॑ ಆನಶೇ ॥

नकि॒ष्ट्वद्र॒थीत॑रो॒ हरी॒ यदिं॑द्र॒ यच्छ॑से । नकि॒ष्ट्वानु॑ म॒ज्मना॒ नकिः॒ स्वश्व॑ आनशे ॥

ಯ ಏಕ॒ ಇದ್ವಿ॒ದಯ॑ತೇ॒ ವಸು॒ ಮರ್ತಾ॑ಯ ದಾ॒ಶುಷೇ॑ । ಈಶಾ॑ನೋ॒ ಅಪ್ರ॑ತಿಷ್ಕುತ॒ ಇಂದ್ರೋ॑ ಅಂ॒ಗ ॥

य एक॒ इद्वि॒दय॑ते॒ वसु॒ मर्ता॑य दा॒शुषे॑ । ईशा॑नो॒ अप्र॑तिष्कुत॒ इंद्रो॑ अं॒ग ॥

ಕ॒ದಾ ಮರ್ತ॑ಮರಾ॒ಧಸಂ॑ ಪ॒ದಾ ಕ್ಷುಂಪ॑ಮಿವ ಸ್ಫುರತ್ । ಕ॒ದಾ ನಃ॑ ಶುಶ್ರವ॒ದ್ಗಿರ॒ ಇಂದ್ರೋ॑ ಅಂ॒ಗ ॥

क॒दा मर्त॑मरा॒धसं॑ प॒दा क्षुंप॑मिव स्फुरत् । क॒दा नः॑ शुश्रव॒द्गिर॒ इंद्रो॑ अं॒ग ॥

ಯಶ್ಚಿ॒ದ್ಧಿ ತ್ವಾ॑ ಬ॒ಹುಭ್ಯ॒ ಆ ಸು॒ತಾವಾಁ॑ ಆ॒ವಿವಾ॑ಸತಿ । ಉ॒ಗ್ರಂ ತತ್ಪ॑ತ್ಯತೇ॒ ಶವ॒ ಇಂದ್ರೋ॑ ಅಂ॒ಗ ॥

यश्चि॒द्धि त्वा॑ ब॒हुभ्य॒ आ सु॒तावाँ॑ आ॒विवा॑सति । उ॒ग्रं तत्प॑त्यते॒ शव॒ इंद्रो॑ अं॒ग ॥

ಸ್ವಾ॒ದೋರಿ॒ತ್ಥಾ ವಿ॑ಷೂ॒ವತೋ॒ ಮಧ್ವಃ॑ ಪಿಬಂತಿ ಗೌ॒ರ್ಯಃ॑ । ಯಾ ಇಂದ್ರೇ॑ಣ ಸ॒ಯಾವ॑ರೀ॒ರ್ವೃಷ್ಣಾ॒ ಮದಂ॑ತಿ ಶೋ॒ಭಸೇ॒ ವಸ್ವೀ॒ರನು॑ ಸ್ವ॒ರಾಜ್ಯಂ॑ ॥

स्वा॒दोरि॒त्था वि॑षू॒वतो॒ मध्वः॑ पिबंति गौ॒र्यः॑ । या इंद्रे॑ण स॒याव॑री॒र्वृष्णा॒ मदं॑ति शो॒भसे॒ वस्वी॒रनु॑ स्व॒राज्यं॑ ॥

ತಾ ಅ॑ಸ್ಯ ಪೃಶನಾ॒ಯುವಃ॒ ಸೋಮಂ॑ ಶ್ರೀಣಂತಿ॒ ಪೃಶ್ನ॑ಯಃ । ಪ್ರಿ॒ಯಾ ಇಂದ್ರ॑ಸ್ಯ ಧೇ॒ನವೋ॒ ವಜ್ರಂ॑ ಹಿನ್ವಂತಿ॒ ಸಾಯ॑ಕಂ॒ ವಸ್ವೀ॒ರನು॑ ಸ್ವ॒ರಾಜ್ಯಂ॑ ॥

ता अ॑स्य पृशना॒युवः॒ सोमं॑ श्रीणंति॒ पृश्न॑यः । प्रि॒या इंद्र॑स्य धे॒नवो॒ वज्रं॑ हिन्वंति॒ साय॑कं॒ वस्वी॒रनु॑ स्व॒राज्यं॑ ॥

ತಾ ಅ॑ಸ್ಯ॒ ನಮ॑ಸಾ॒ ಸಹಃ॑ ಸಪ॒ರ್ಯಂತಿ॒ ಪ್ರಚೇ॑ತಸಃ । ವ್ರ॒ತಾನ್ಯ॑ಸ್ಯ ಸಶ್ಚಿರೇ ಪು॒ರೂಣಿ॑ ಪೂ॒ರ್ವಚಿ॑ತ್ತಯೇ॒ ವಸ್ವೀ॒ರನು॑ ಸ್ವ॒ರಾಜ್ಯಂ॑ ॥

ता अ॑स्य॒ नम॑सा॒ सहः॑ सप॒र्यंति॒ प्रचे॑तसः । व्र॒तान्य॑स्य सश्चिरे पु॒रूणि॑ पू॒र्वचि॑त्तये॒ वस्वी॒रनु॑ स्व॒राज्यं॑ ॥

ಇಂದ್ರೋ॑ ದಧೀ॒ಚೋ ಅ॒ಸ್ಥಭಿ॑ರ್ವೃ॒ತ್ರಾಣ್ಯಪ್ರ॑ತಿಷ್ಕುತಃ । ಜ॒ಘಾನ॑ ನವ॒ತೀರ್ನವ॑ ॥

इंद्रो॑ दधी॒चो अ॒स्थभि॑र्वृ॒त्राण्यप्र॑तिष्कुतः । ज॒घान॑ नव॒तीर्नव॑ ॥

ಇ॒ಚ್ಛನ್ನಶ್ವ॑ಸ್ಯ॒ ಯಚ್ಛಿರಃ॒ ಪರ್ವ॑ತೇ॒ಷ್ವಪ॑ಶ್ರಿತಂ । ತದ್ವಿ॑ದಚ್ಛರ್ಯ॒ಣಾವ॑ತಿ ॥

इ॒च्छन्नश्व॑स्य॒ यच्छिरः॒ पर्व॑ते॒ष्वप॑श्रितं । तद्वि॑दच्छर्य॒णाव॑ति ॥

ಅತ್ರಾಹ॒ ಗೋರ॑ಮನ್ವತ॒ ನಾಮ॒ ತ್ವಷ್ಟು॑ರಪೀ॒ಚ್ಯಂ॑ । ಇ॒ತ್ಥಾ ಚಂ॒ದ್ರಮ॑ಸೋ ಗೃ॒ಹೇ ॥

अत्राह॒ गोर॑मन्वत॒ नाम॒ त्वष्टु॑रपी॒च्यं॑ । इ॒त्था चं॒द्रम॑सो गृ॒हे ॥

ಕೋ ಅ॒ದ್ಯ ಯುಂ॑ಕ್ತೇ ಧು॒ರಿ ಗಾ ಋ॒ತಸ್ಯ॒ ಶಿಮೀ॑ವತೋ ಭಾ॒ಮಿನೋ॑ ದುರ್ಹೃಣಾ॒ಯೂನ್ । ಆ॒ಸನ್ನಿ॑ಷೂನ್ಹೃ॒ತ್ಸ್ವಸೋ॑ ಮಯೋ॒ಭೂನ್ಯ ಏ॑ಷಾಂ ಭೃ॒ತ್ಯಾಮೃ॒ಣಧ॒ತ್ಸ ಜೀ॑ವಾತ್ ॥

को अ॒द्य युं॑क्ते धु॒रि गा ऋ॒तस्य॒ शिमी॑वतो भा॒मिनो॑ दुर्हृणा॒यून् । आ॒सन्नि॑षून्हृ॒त्स्वसो॑ मयो॒भून्य ए॑षां भृ॒त्यामृ॒णध॒त्स जी॑वात् ॥

ಕ ಈ॑ಷತೇ ತು॒ಜ್ಯತೇ॒ ಕೋ ಬಿ॑ಭಾಯ॒ ಕೋ ಮಂ॑ಸತೇ॒ ಸಂತ॒ಮಿಂದ್ರಂ॒ ಕೋ ಅಂತಿ॑ । ಕಸ್ತೋ॒ಕಾಯ॒ ಕ ಇಭಾ॑ಯೋ॒ತ ರಾ॒ಯೇಽಧಿ॑ ಬ್ರವತ್ತ॒ನ್ವೇ॒೩॒॑ ಕೋ ಜನಾ॑ಯ ॥

क ई॑षते तु॒ज्यते॒ को बि॑भाय॒ को मं॑सते॒ संत॒मिंद्रं॒ को अंति॑ । कस्तो॒काय॒ क इभा॑यो॒त रा॒येऽधि॑ ब्रवत्त॒न्वे॒३॒॑ को जना॑य ॥

ಕೋ ಅ॒ಗ್ನಿಮೀ॑ಟ್ಟೇ ಹ॒ವಿಷಾ॑ ಘೃ॒ತೇನ॑ ಸ್ರು॒ಚಾ ಯ॑ಜಾತಾ ಋ॒ತುಭಿ॑ರ್ಧ್ರು॒ವೇಭಿಃ॑ । ಕಸ್ಮೈ॑ ದೇ॒ವಾ ಆ ವ॑ಹಾನಾ॒ಶು ಹೋಮ॒ ಕೋ ಮಂ॑ಸತೇ ವೀ॒ತಿಹೋ॑ತ್ರಃ ಸುದೇ॒ವಃ ॥

को अ॒ग्निमी॑ट्टे ह॒विषा॑ घृ॒तेन॑ स्रु॒चा य॑जाता ऋ॒तुभि॑र्ध्रु॒वेभिः॑ । कस्मै॑ दे॒वा आ व॑हाना॒शु होम॒ को मं॑सते वी॒तिहो॑त्रः सुदे॒वः ॥

ತ್ವಮಂ॒ಗ ಪ್ರ ಶಂ॑ಸಿಷೋ ದೇ॒ವಃ ಶ॑ವಿಷ್ಠ॒ ಮರ್ತ್ಯಂ॑ । ನ ತ್ವದ॒ನ್ಯೋ ಮ॑ಘವನ್ನಸ್ತಿ ಮರ್ಡಿ॒ತೇಂದ್ರ॒ ಬ್ರವೀ॑ಮಿ ತೇ॒ ವಚಃ॑ ॥

त्वमं॒ग प्र शं॑सिषो दे॒वः श॑विष्ठ॒ मर्त्यं॑ । न त्वद॒न्यो म॑घवन्नस्ति मर्डि॒तेंद्र॒ ब्रवी॑मि ते॒ वचः॑ ॥

ಮಾ ತೇ॒ ರಾಧಾಂ॑ಸಿ॒ ಮಾ ತ॑ ಊ॒ತಯೋ॑ ವಸೋ॒ಽಸ್ಮಾನ್ಕದಾ॑ ಚ॒ನಾ ದ॑ಭನ್ । ವಿಶ್ವಾ॑ ಚ ನ ಉಪಮಿಮೀ॒ಹಿ ಮಾ॑ನುಷ॒ ವಸೂ॑ನಿ ಚರ್ಷ॒ಣಿಭ್ಯ॒ ಆ ॥

मा ते॒ राधां॑सि॒ मा त॑ ऊ॒तयो॑ वसो॒ऽस्मान्कदा॑ च॒ना द॑भन् । विश्वा॑ च न उपमिमी॒हि मा॑नुष॒ वसू॑नि चर्ष॒णिभ्य॒ आ ॥