मरुತ್ತುಗಳ ವೈಭವ ಮತ್ತು ಪ್ರಕೃತಿಯ ಶಕ್ತಿ - ಋಗ್ವೇದ ಮಂಡಲ ೧, ಸೂಕ್ತ ೮೫

ಪ್ರ ಯೇ ಶುಂಭಂ॑ತೇ॒ ಜನ॑ಯೋ॒ ನ ಸಪ್ತ॑ಯೋ॒ ಯಾಮ॑ನ್ರು॒ದ್ರಸ್ಯ॑ ಸೂ॒ನವಃ॑ ಸು॒ದಂಸ॑ಸಃ । ರೋದ॑ಸೀ॒ ಹಿ ಮ॒ರುತ॑ಶ್ಚಕ್ರಿ॒ರೇ ವೃ॒ಧೇ ಮದಂ॑ತಿ ವೀ॒ರಾ ವಿ॒ದಥೇ॑ಷು॒ ಘೃಷ್ವ॑ಯಃ ॥

प्र ये शुंभं॑ते॒ जन॑यो॒ न सप्त॑यो॒ याम॑न्रु॒द्रस्य॑ सू॒नवः॑ सु॒दंस॑सः । रोद॑सी॒ हि म॒रुत॑श्चक्रि॒रे वृ॒धे मदं॑ति वी॒रा वि॒दथे॑षु॒ घृष्व॑यः ॥

ತ ಉ॑ಕ್ಷಿ॒ತಾಸೋ॑ ಮಹಿ॒ಮಾನ॑ಮಾಶತ ದಿ॒ವಿ ರು॒ದ್ರಾಸೋ॒ ಅಧಿ॑ ಚಕ್ರಿರೇ॒ ಸದಃ॑ । ಅರ್ಚಂ॑ತೋ ಅ॒ರ್ಕಂ ಜ॒ನಯಂ॑ತ ಇಂದ್ರಿ॒ಯಮಧಿ॒ ಶ್ರಿಯೋ॑ ದಧಿರೇ॒ ಪೃಶ್ನಿ॑ಮಾತರಃ ॥

त उ॑क्षि॒तासो॑ महि॒मान॑माशत दि॒वि रु॒द्रासो॒ अधि॑ चक्रिरे॒ सदः॑ । अर्चं॑तो अ॒र्कं ज॒नयं॑त इंद्रि॒यमधि॒ श्रियो॑ दधिरे॒ पृश्नि॑मातरः ॥

ಗೋಮಾ॑ತರೋ॒ ಯಚ್ಛು॒ಭಯಂ॑ತೇ ಅಂ॒ಜಿಭಿ॑ಸ್ತ॒ನೂಷು॑ ಶು॒ಭ್ರಾ ದ॑ಧಿರೇ ವಿ॒ರುಕ್ಮ॑ತಃ । ಬಾಧಂ॑ತೇ॒ ವಿಶ್ವ॑ಮಭಿಮಾ॒ತಿನ॒ಮಪ॒ ವರ್ತ್ಮಾ॑ನ್ಯೇಷಾ॒ಮನು॑ ರೀಯತೇ ಘೃ॒ತಂ ॥

गोमा॑तरो॒ यच्छु॒भयं॑ते अं॒जिभि॑स्त॒नूषु॑ शु॒भ्रा द॑धिरे वि॒रुक्म॑तः । बाधं॑ते॒ विश्व॑मभिमा॒तिन॒मप॒ वर्त्मा॑न्येषा॒मनु॑ रीयते घृ॒तं ॥

ವಿ ಯೇ ಭ್ರಾಜಂ॑ತೇ॒ ಸುಮ॑ಖಾಸ ಋ॒ಷ್ಟಿಭಿಃ॑ ಪ್ರಚ್ಯಾ॒ವಯಂ॑ತೋ॒ ಅಚ್ಯು॑ತಾ ಚಿ॒ದೋಜ॑ಸಾ । ಮ॒ನೋ॒ಜುವೋ॒ ಯನ್ಮ॑ರುತೋ॒ ರಥೇ॒ಷ್ವಾ ವೃಷ॑ವ್ರಾತಾಸಃ॒ ಪೃಷ॑ತೀ॒ರಯು॑ಗ್ಧ್ವಂ ॥

वि ये भ्राजं॑ते॒ सुम॑खास ऋ॒ष्टिभिः॑ प्रच्या॒वयं॑तो॒ अच्यु॑ता चि॒दोज॑सा । म॒नो॒जुवो॒ यन्म॑रुतो॒ रथे॒ष्वा वृष॑व्रातासः॒ पृष॑ती॒रयु॑ग्ध्वं ॥

ಪ್ರ ಯದ್ರಥೇ॑ಷು॒ ಪೃಷ॑ತೀ॒ರಯು॑ಗ್ಧ್ವಂ॒ ವಾಜೇ॒ ಅದ್ರಿಂ॑ ಮರುತೋ ರಂ॒ಹಯಂ॑ತಃ । ಉ॒ತಾರು॒ಷಸ್ಯ॒ ವಿ ಷ್ಯಂ॑ತಿ॒ ಧಾರಾ॒ಶ್ಚರ್ಮೇ॑ವೋ॒ದಭಿ॒ರ್ವ್ಯುಂ॑ದಂತಿ॒ ಭೂಮ॑ ॥

प्र यद्रथे॑षु॒ पृष॑ती॒रयु॑ग्ध्वं॒ वाजे॒ अद्रिं॑ मरुतो रं॒हयं॑तः । उ॒तारु॒षस्य॒ वि ष्यं॑ति॒ धारा॒श्चर्मे॑वो॒दभि॒र्व्युं॑दंति॒ भूम॑ ॥

ಆ ವೋ॑ ವಹಂತು॒ ಸಪ್ತ॑ಯೋ ರಘು॒ಷ್ಯದೋ॑ ರಘು॒ಪತ್ವಾ॑ನಃ॒ ಪ್ರ ಜಿ॑ಗಾತ ಬಾ॒ಹುಭಿಃ॑ । ಸೀದ॒ತಾ ಬ॒ರ್ಹಿರು॒ರು ವಃ॒ ಸದ॑ಸ್ಕೃ॒ತಂ ಮಾ॒ದಯ॑ಧ್ವಂ ಮರುತೋ॒ ಮಧ್ವೋ॒ ಅಂಧ॑ಸಃ ॥

आ वो॑ वहंतु॒ सप्त॑यो रघु॒ष्यदो॑ रघु॒पत्वा॑नः॒ प्र जि॑गात बा॒हुभिः॑ । सीद॒ता ब॒र्हिरु॒रु वः॒ सद॑स्कृ॒तं मा॒दय॑ध्वं मरुतो॒ मध्वो॒ अंध॑सः ॥

ತೇ॑ಽವರ್ಧಂತ॒ ಸ್ವತ॑ವಸೋ ಮಹಿತ್ವ॒ನಾ ನಾಕಂ॑ ತ॒ಸ್ಥುರು॒ರು ಚ॑ಕ್ರಿರೇ॒ ಸದಃ॑ । ವಿಷ್ಣು॒ರ್ಯದ್ಧಾವ॒ದ್ವೃಷ॑ಣಂ ಮದ॒ಚ್ಯುತಂ॒ ವಯೋ॒ ನ ಸೀ॑ದ॒ನ್ನಧಿ॑ ಬ॒ರ್ಹಿಷಿ॑ ಪ್ರಿ॒ಯೇ ॥

ते॑ऽवर्धंत॒ स्वत॑वसो महित्व॒ना नाकं॑ त॒स्थुरु॒रु च॑क्रिरे॒ सदः॑ । विष्णु॒र्यद्धाव॒द्वृष॑णं मद॒च्युतं॒ वयो॒ न सी॑द॒न्नधि॑ ब॒र्हिषि॑ प्रि॒ये ॥

ಶೂರಾ॑ ಇ॒ವೇದ್ಯುಯು॑ಧಯೋ॒ ನ ಜಗ್ಮ॑ಯಃ ಶ್ರವ॒ಸ್ಯವೋ॒ ನ ಪೃತ॑ನಾಸು ಯೇತಿರೇ । ಭಯಂ॑ತೇ॒ ವಿಶ್ವಾ॒ ಭುವ॑ನಾ ಮ॒ರುದ್ಭ್ಯೋ॒ ರಾಜಾ॑ನ ಇವ ತ್ವೇ॒ಷಸಂ॑ದೃಶೋ॒ ನರಃ॑ ॥

शूरा॑ इ॒वेद्युयु॑धयो॒ न जग्म॑यः श्रव॒स्यवो॒ न पृत॑नासु येतिरे । भयं॑ते॒ विश्वा॒ भुव॑ना म॒रुद्भ्यो॒ राजा॑न इव त्वे॒षसं॑दृशो॒ नरः॑ ॥

ತ್ವಷ್ಟಾ॒ ಯದ್ವಜ್ರಂ॒ ಸುಕೃ॑ತಂ ಹಿರ॒ಣ್ಯಯಂ॑ ಸ॒ಹಸ್ರ॑ಭೃಷ್ಟಿಂ॒ ಸ್ವಪಾ॒ ಅವ॑ರ್ತಯತ್ । ಧ॒ತ್ತ ಇಂದ್ರೋ॒ ನರ್ಯಪಾಂ॑ಸಿ॒ ಕರ್ತ॒ವೇಽಹ॑ನ್ವೃ॒ತ್ರಂ ನಿರ॒ಪಾಮೌ॑ಬ್ಜದರ್ಣ॒ವಂ ॥

त्वष्टा॒ यद्वज्रं॒ सुकृ॑तं हिर॒ण्ययं॑ स॒हस्र॑भृष्टिं॒ स्वपा॒ अव॑र्तयत् । ध॒त्त इंद्रो॒ नर्यपां॑सि॒ कर्त॒वेऽह॑न्वृ॒त्रं निर॒पामौ॑ब्जदर्ण॒वं ॥

ಊ॒ರ್ಧ್ವಂ ನು॑ನುದ್ರೇಽವ॒ತಂ ತ ಓಜ॑ಸಾ ದಾದೃಹಾ॒ಣಂ ಚಿ॑ದ್ಬಿಭಿದು॒ರ್ವಿ ಪರ್ವ॑ತಂ । ಧಮಂ॑ತೋ ವಾ॒ಣಂ ಮ॒ರುತಃ॑ ಸು॒ದಾನ॑ವೋ॒ ಮದೇ॒ ಸೋಮ॑ಸ್ಯ॒ ರಣ್ಯಾ॑ನಿ ಚಕ್ರಿರೇ ॥

ऊ॒र्ध्वं नु॑नुद्रेऽव॒तं त ओज॑सा दादृहा॒णं चि॑द्बिभिदु॒र्वि पर्व॑तं । धमं॑तो वा॒णं म॒रुतः॑ सु॒दान॑वो॒ मदे॒ सोम॑स्य॒ रण्या॑नि चक्रिरे ॥

ಜಿ॒ಹ್ಮಂ ನು॑ನುದ್ರೇಽವ॒ತಂ ತಯಾ॑ ದಿ॒ಶಾಸಿಂ॑ಚ॒ನ್ನುತ್ಸಂ॒ ಗೋತ॑ಮಾಯ ತೃ॒ಷ್ಣಜೇ॑ । ಆ ಗ॑ಚ್ಛಂತೀ॒ಮವ॑ಸಾ ಚಿ॒ತ್ರಭಾ॑ನವಃ॒ ಕಾಮಂ॒ ವಿಪ್ರ॑ಸ್ಯ ತರ್ಪಯಂತ॒ ಧಾಮ॑ಭಿಃ ॥

जि॒ह्मं नु॑नुद्रेऽव॒तं तया॑ दि॒शासिं॑च॒न्नुत्सं॒ गोत॑माय तृ॒ष्णजे॑ । आ ग॑च्छंती॒मव॑सा चि॒त्रभा॑नवः॒ कामं॒ विप्र॑स्य तर्पयंत॒ धाम॑भिः ॥

ಯಾ ವಃ॒ ಶರ್ಮ॑ ಶಶಮಾ॒ನಾಯ॒ ಸಂತಿ॑ ತ್ರಿ॒ಧಾತೂ॑ನಿ ದಾ॒ಶುಷೇ॑ ಯಚ್ಛ॒ತಾಧಿ॑ । ಅ॒ಸ್ಮಭ್ಯಂ॒ ತಾನಿ॑ ಮರುತೋ॒ ವಿ ಯಂ॑ತ ರ॒ಯಿಂ ನೋ॑ ಧತ್ತ ವೃಷಣಃ ಸು॒ವೀರಂ॑ ॥

या वः॒ शर्म॑ शशमा॒नाय॒ संति॑ त्रि॒धातू॑नि दा॒शुषे॑ यच्छ॒ताधि॑ । अ॒स्मभ्यं॒ तानि॑ मरुतो॒ वि यं॑त र॒यिं नो॑ धत्त वृषणः सु॒वीरं॑ ॥