ಇಂದ್ರನ ಅನುಗ್ರಹ ಮತ್ತು ಆದಿ ಋಷಿಗಳ ಯಾಗದ ಮಹಿಮೆ

ಅಶ್ವಾ॑ವತಿ ಪ್ರಥ॒ಮೋ ಗೋಷು॑ ಗಚ್ಛತಿ ಸುಪ್ರಾ॒ವೀರಿಂ॑ದ್ರ॒ ಮರ್ತ್ಯ॒ಸ್ತವೋ॒ತಿಭಿಃ॑ । ತಮಿತ್ಪೃ॑ಣಕ್ಷಿ॒ ವಸು॑ನಾ॒ ಭವೀ॑ಯಸಾ॒ ಸಿಂಧು॒ಮಾಪೋ॒ ಯಥಾ॒ಭಿತೋ॒ ವಿಚೇ॑ತಸಃ ॥

अश्वा॑वति प्रथ॒मो गोषु॑ गच्छति सुप्रा॒वीरिं॑द्र॒ मर्त्य॒स्तवो॒तिभिः॑ । तमित्पृ॑णक्षि॒ वसु॑ना॒ भवी॑यसा॒ सिंधु॒मापो॒ यथा॒भितो॒ विचे॑तसः ॥

ಆಪೋ॒ ನ ದೇ॒ವೀರುಪ॑ ಯಂತಿ ಹೋ॒ತ್ರಿಯ॑ಮ॒ವಃ ಪ॑ಶ್ಯಂತಿ॒ ವಿತ॑ತಂ॒ ಯಥಾ॒ ರಜಃ॑ । ಪ್ರಾ॒ಚೈರ್ದೇ॒ವಾಸಃ॒ ಪ್ರ ಣ॑ಯಂತಿ ದೇವ॒ಯುಂ ಬ್ರ॑ಹ್ಮ॒ಪ್ರಿಯಂ॑ ಜೋಷಯಂತೇ ವ॒ರಾ ಇ॑ವ ॥

आपो॒ न दे॒वीरुप॑ यंति हो॒त्रिय॑म॒वः प॑श्यंति॒ वित॑तं॒ यथा॒ रजः॑ । प्रा॒चैर्दे॒वासः॒ प्र ण॑यंति देव॒युं ब्र॑ह्म॒प्रियं॑ जोषयंते व॒रा इ॑व ॥

ಅಧಿ॒ ದ್ವಯೋ॑ರದಧಾ ಉ॒ಕ್ಥ್ಯಂ೧॒॑ ವಚೋ॑ ಯ॒ತಸ್ರು॑ಚಾ ಮಿಥು॒ನಾ ಯಾ ಸ॑ಪ॒ರ್ಯತಃ॑ । ಅಸಂ॑ಯತ್ತೋ ವ್ರ॒ತೇ ತೇ॑ ಕ್ಷೇತಿ॒ ಪುಷ್ಯ॑ತಿ ಭ॒ದ್ರಾ ಶ॒ಕ್ತಿರ್ಯಜ॑ಮಾನಾಯ ಸುನ್ವ॒ತೇ ॥

अधि॒ द्वयो॑रदधा उ॒क्थ्यं१॒॑ वचो॑ य॒तस्रु॑चा मिथु॒ना या स॑प॒र्यतः॑ । असं॑यत्तो व्र॒ते ते॑ क्षेति॒ पुष्य॑ति भ॒द्रा श॒क्तिर्यज॑मानाय सुन्व॒ते ॥

ಆದಂಗಿ॑ರಾಃ ಪ್ರಥ॒ಮಂ ದ॑ಧಿರೇ॒ ವಯ॑ ಇ॒ದ್ಧಾಗ್ನ॑ಯಃ॒ ಶಮ್ಯಾ॒ ಯೇ ಸು॑ಕೃ॒ತ್ಯಯಾ॑ । ಸರ್ವಂ॑ ಪ॒ಣೇಃ ಸಮ॑ವಿಂದಂತ॒ ಭೋಜ॑ನ॒ಮಶ್ವಾ॑ವಂತಂ॒ ಗೋಮಂ॑ತ॒ಮಾ ಪ॒ಶುಂ ನರಃ॑ ॥

आदंगि॑राः प्रथ॒मं द॑धिरे॒ वय॑ इ॒द्धाग्न॑यः॒ शम्या॒ ये सु॑कृ॒त्यया॑ । सर्वं॑ प॒णेः सम॑विंदंत॒ भोज॑न॒मश्वा॑वंतं॒ गोमं॑त॒मा प॒शुं नरः॑ ॥

ಯ॒ಜ್ಞೈರಥ॑ರ್ವಾ ಪ್ರಥ॒ಮಃ ಪ॒ಥಸ್ತ॑ತೇ॒ ತತಃ॒ ಸೂರ್ಯೋ॑ ವ್ರತ॒ಪಾ ವೇ॒ನ ಆಜ॑ನಿ । ಆ ಗಾ ಆ॑ಜದು॒ಶನಾ॑ ಕಾ॒ವ್ಯಃ ಸಚಾ॑ ಯ॒ಮಸ್ಯ॑ ಜಾ॒ತಮ॒ಮೃತಂ॑ ಯಜಾಮಹೇ ॥

य॒ज्ञैरथ॑र्वा प्रथ॒मः प॒थस्त॑ते॒ ततः॒ सूर्यो॑ व्रत॒पा वे॒न आज॑नि । आ गा आ॑जदु॒शना॑ का॒व्यः सचा॑ य॒मस्य॑ जा॒तम॒मृतं॑ यजामहे ॥

ಬ॒ರ್ಹಿರ್ವಾ॒ ಯತ್ಸ್ವ॑ಪ॒ತ್ಯಾಯ॑ ವೃ॒ಜ್ಯತೇ॒ಽರ್ಕೋ ವಾ॒ ಶ್ಲೋಕ॑ಮಾ॒ಘೋಷ॑ತೇ ದಿ॒ವಿ । ಗ್ರಾವಾ॒ ಯತ್ರ॒ ವದ॑ತಿ ಕಾ॒ರುರು॒ಕ್ಥ್ಯ೧॒॑ಸ್ತಸ್ಯೇದಿಂದ್ರೋ॑ ಅಭಿಪಿ॒ತ್ವೇಷು॑ ರಣ್ಯತಿ ॥

ब॒र्हिर्वा॒ यत्स्व॑प॒त्याय॑ वृ॒ज्यते॒ऽर्को वा॒ श्लोक॑मा॒घोष॑ते दि॒वि । ग्रावा॒ यत्र॒ वद॑ति का॒रुरु॒क्थ्य१॒॑स्तस्येदिंद्रो॑ अभिपि॒त्वेषु॑ रण्यति ॥