Sūkta 6

युं॒जंति॑ ब्र॒ध्नम॑रु॒षं चरं॑तं॒ परि॑ त॒स्थुषः॑ । रोचं॑ते रोच॒ना दि॒वि ॥

yuñjánti bradhnámaruṣám cárantam pári tasthúṣaḥ ǀ rócante rocanā́ diví ǁ

युं॒जंत्य॑स्य॒ काम्या॒ हरी॒ विप॑क्षसा॒ रथे॑ । शोणा॑ धृ॒ष्णू नृ॒वाह॑सा ॥

yuñjántyasya kā́myā hárī vípakṣasā ráthe ǀ śóṇā dhṛṣṇū́ nṛvā́hasā ǁ

के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑ । समु॒षद्भि॑रजायथाः ॥

ketúm kṛṇvánnaketáve péśo maryā apeśáse ǀ sámuṣádbhirajāyathāḥ ǁ

आदह॑ स्व॒धामनु॒ पुन॑र्गर्भ॒त्वमे॑रि॒रे । दधा॑ना॒ नाम॑ य॒ज्ञियं॑ ॥

ā́dáha svadhā́mánu púnargarbhatvámeriré ǀ dádhānā nā́ma yajñíyam ǁ

वी॒ळु चि॑दारुज॒त्नुभि॒र्गुहा॑ चिदिंद्र॒ वह्नि॑भिः । अविं॑द उ॒स्रिया॒ अनु॑ ॥

vīḷú cidārujatnúbhirgúhā cidindra váhnibhiḥ ǀ ávinda usríyā ánu ǁ

दे॒व॒यंतो॒ यथा॑ म॒तिमच्छा॑ वि॒दद्व॑सुं॒ गिरः॑ । म॒हाम॑नूषत श्रु॒तं ॥

devayánto yáthā matímácchā vidádvasum gíraḥ ǀ mahā́manūṣata śrutám ǁ

इंद्रे॑ण॒ सं हि दृक्ष॑से संजग्मा॒नो अबि॑भ्युषा । मं॒दू स॑मा॒नव॑र्चसा ॥

índreṇa sám hí dṛ́kṣase saṃjagmānó ábibhyuṣā ǀ mandū́ samānávarcasā ǁ

अ॒न॒व॒द्यैर॒भिद्यु॑भिर्म॒खः सह॑स्वदर्चति । ग॒णैरिंद्र॑स्य॒ काम्यैः॑ ॥

anavadyáirabhídyubhirmakháḥ sáhasvadarcati ǀ gaṇáiríndrasya kā́myaiḥ ǁ

अतः॑ परिज्म॒न्ना ग॑हि दि॒वो वा॑ रोच॒नादधि॑ । सम॑स्मिन्नृंजते॒ गिरः॑ ॥

átaḥ parijmannā́ gahi divó vā rocanā́dádhi ǀ sámasminnṛñjate gíraḥ ǁ

इ॒तो वा॑ सा॒तिमीम॑हे दि॒वो वा॒ पार्थि॑वा॒दधि॑ । इंद्रं॑ म॒हो वा॒ रज॑सः ॥

itó vā sātímī́mahe divó vā pā́rthivādádhi ǀ índram mahó vā rájasaḥ ǁ