Sūkta 5

आ त्वेता॒ नि षी॑द॒तेंद्र॑म॒भि प्र गा॑यत । सखा॑यः॒ स्तोम॑वाहसः ॥

ā́ tvétā ní ṣīdaténdramabhí prá gāyata ǀ sákhāyaḥ stómavāhasaḥ ǁ

पु॒रू॒तमं॑ पुरू॒णामीशा॑नं॒ वार्या॑णां । इंद्रं॒ सोमे॒ सचा॑ सु॒ते ॥

purūtámam purūṇā́mī́śānam vā́ryāṇām ǀ índram sóme sácā suté ǁ

स घा॑ नो॒ योग॒ आ भु॑व॒त्स रा॒ये स पुरं॑ध्यां । गम॒द्वाजे॑भि॒रा स नः॑ ॥

sá ghā no yóga ā́ bhuvatsá rāyé sá púraṃdhyām ǀ gámadvā́jebhirā́ sá naḥ ǁ

यस्य॑ सं॒स्थे न वृ॒ण्वते॒ हरी॑ स॒मत्सु॒ शत्र॑वः । तस्मा॒ इंद्रा॑य गायत ॥

yásya saṃsthé ná vṛṇváte hárī samátsu śátravaḥ ǀ tásmā índrāya gāyata ǁ

सु॒त॒पाव्ने॑ सु॒ता इ॒मे शुच॑यो यंति वी॒तये॑ । सोमा॑सो॒ दध्या॑शिरः ॥

sutapā́vne sutā́ imé śúcayo yanti vītáye ǀ sómāso dádhyāśiraḥ ǁ

त्वं सु॒तस्य॑ पी॒तये॑ स॒द्यो वृ॒द्धो अ॑जायथाः । इंद्र॒ ज्यैष्ठ्या॑य सुक्रतो ॥

tvám sutásya pītáye sadyó vṛddhó ajāyathāḥ ǀ índra jyáiṣṭhyāya sukrato ǁ

आ त्वा॑ विशंत्वा॒शवः॒ सोमा॑स इंद्र गिर्वणः । शं ते॑ संतु॒ प्रचे॑तसे ॥

ā́ tvā viśantvāśávaḥ sómāsa indra girvaṇaḥ ǀ śám te santu prácetase ǁ

त्वां स्तोमा॑ अवीवृध॒न्त्वामु॒क्था श॑तक्रतो । त्वां व॑र्धंतु नो॒ गिरः॑ ॥

tvā́m stómā avīvṛdhantvā́mukthā́ śatakrato ǀ tvā́m vardhantu no gíraḥ ǁ

अक्षि॑तोतिः सनेदि॒मं वाज॒मिंद्रः॑ सह॒स्रिणं॑ । यस्मि॒न्विश्वा॑नि॒ पौंस्या॑ ॥

ákṣitotiḥ sanedimám vā́jamíndraḥ sahasríṇam ǀ yásminvíśvāni páuṃsyā ǁ

मा नो॒ मर्ता॑ अ॒भि द्रु॑हन्त॒नूना॑मिंद्र गिर्वणः । ईशा॑नो यवया व॒धं ॥

mā́ no mártā abhí druhantanū́nāmindra girvaṇaḥ ǀ ī́śāno yavayā vadhám ǁ