ಇಂದ್ರನ ಸ್ತುತಿ ಮತ್ತು ಸೋಮ ರಸದ ಅರ್ಪಣೆ

ಆ ತ್ವೇತಾ॒ ನಿ ಷೀ॑ದ॒ತೇಂದ್ರ॑ಮ॒ಭಿ ಪ್ರ ಗಾ॑ಯತ । ಸಖಾ॑ಯಃ॒ ಸ್ತೋಮ॑ವಾಹಸಃ ॥

आ त्वेता॒ नि षी॑द॒तेंद्र॑म॒भि प्र गा॑यत । सखा॑यः॒ स्तोम॑वाहसः ॥

ಪು॒ರೂ॒ತಮಂ॑ ಪುರೂ॒ಣಾಮೀಶಾ॑ನಂ॒ ವಾರ್ಯಾ॑ಣಾಂ । ಇಂದ್ರಂ॒ ಸೋಮೇ॒ ಸಚಾ॑ ಸು॒ತೇ ॥

पु॒रू॒तमं॑ पुरू॒णामीशा॑नं॒ वार्या॑णां । इंद्रं॒ सोमे॒ सचा॑ सु॒ते ॥

ಸ ಘಾ॑ ನೋ॒ ಯೋಗ॒ ಆ ಭು॑ವ॒ತ್ಸ ರಾ॒ಯೇ ಸ ಪುರಂ॑ಧ್ಯಾಂ । ಗಮ॒ದ್ವಾಜೇ॑ಭಿ॒ರಾ ಸ ನಃ॑ ॥

स घा॑ नो॒ योग॒ आ भु॑व॒त्स रा॒ये स पुरं॑ध्यां । गम॒द्वाजे॑भि॒रा स नः॑ ॥

ಯಸ್ಯ॑ ಸಂ॒ಸ್ಥೇ ನ ವೃ॒ಣ್ವತೇ॒ ಹರೀ॑ ಸ॒ಮತ್ಸು॒ ಶತ್ರ॑ವಃ । ತಸ್ಮಾ॒ ಇಂದ್ರಾ॑ಯ ಗಾಯತ ॥

यस्य॑ सं॒स्थे न वृ॒ण्वते॒ हरी॑ स॒मत्सु॒ शत्र॑वः । तस्मा॒ इंद्रा॑य गायत ॥

ಸು॒ತ॒ಪಾವ್ನೇ॑ ಸು॒ತಾ ಇ॒ಮೇ ಶುಚ॑ಯೋ ಯಂತಿ ವೀ॒ತಯೇ॑ । ಸೋಮಾ॑ಸೋ॒ ದಧ್ಯಾ॑ಶಿರಃ ॥

सु॒त॒पाव्ने॑ सु॒ता इ॒मे शुच॑यो यंति वी॒तये॑ । सोमा॑सो॒ दध्या॑शिरः ॥

ತ್ವಂ ಸು॒ತಸ್ಯ॑ ಪೀ॒ತಯೇ॑ ಸ॒ದ್ಯೋ ವೃ॒ದ್ಧೋ ಅ॑ಜಾಯಥಾಃ । ಇಂದ್ರ॒ ಜ್ಯೈಷ್ಠ್ಯಾ॑ಯ ಸುಕ್ರತೋ ॥

त्वं सु॒तस्य॑ पी॒तये॑ स॒द्यो वृ॒द्धो अ॑जायथाः । इंद्र॒ ज्यैष्ठ्या॑य सुक्रतो ॥

ಆ ತ್ವಾ॑ ವಿಶಂತ್ವಾ॒ಶವಃ॒ ಸೋಮಾ॑ಸ ಇಂದ್ರ ಗಿರ್ವಣಃ । ಶಂ ತೇ॑ ಸಂತು॒ ಪ್ರಚೇ॑ತಸೇ ॥

आ त्वा॑ विशंत्वा॒शवः॒ सोमा॑स इंद्र गिर्वणः । शं ते॑ संतु॒ प्रचे॑तसे ॥

ತ್ವಾಂ ಸ್ತೋಮಾ॑ ಅವೀವೃಧ॒ನ್ತ್ವಾಮು॒ಕ್ಥಾ ಶ॑ತಕ್ರತೋ । ತ್ವಾಂ ವ॑ರ್ಧಂತು ನೋ॒ ಗಿರಃ॑ ॥

त्वां स्तोमा॑ अवीवृध॒न्त्वामु॒क्था श॑तक्रतो । त्वां व॑र्धंतु नो॒ गिरः॑ ॥

ಅಕ್ಷಿ॑ತೋತಿಃ ಸನೇದಿ॒ಮಂ ವಾಜ॒ಮಿಂದ್ರಃ॑ ಸಹ॒ಸ್ರಿಣಂ॑ । ಯಸ್ಮಿ॒ನ್ವಿಶ್ವಾ॑ನಿ॒ ಪೌಂಸ್ಯಾ॑ ॥

अक्षि॑तोतिः सनेदि॒मं वाज॒मिंद्रः॑ सह॒स्रिणं॑ । यस्मि॒न्विश्वा॑नि॒ पौंस्या॑ ॥

ಮಾ ನೋ॒ ಮರ್ತಾ॑ ಅ॒ಭಿ ದ್ರು॑ಹನ್ತ॒ನೂನಾ॑ಮಿಂದ್ರ ಗಿರ್ವಣಃ । ಈಶಾ॑ನೋ ಯವಯಾ ವ॒ಧಂ ॥

मा नो॒ मर्ता॑ अ॒भि द्रु॑हन्त॒नूना॑मिंद्र गिर्वणः । ईशा॑नो यवया व॒धं ॥