ಇಂದ್ರನ ಅನಂತ ಮಹಿಮೆ ಮತ್ತು ವೃತ್ರವಧೆ - Rigveda Mandala 1, Sukta 52

ತ್ಯಂ ಸು ಮೇ॒ಷಂ ಮ॑ಹಯಾ ಸ್ವ॒ರ್ವಿದಂ॑ ಶ॒ತಂ ಯಸ್ಯ॑ ಸು॒ಭ್ವಃ॑ ಸಾ॒ಕಮೀರ॑ತೇ । ಅತ್ಯಂ॒ ನ ವಾಜಂ॑ ಹವನ॒ಸ್ಯದಂ॒ ರಥ॒ಮೇಂದ್ರಂ॑ ವವೃತ್ಯಾ॒ಮವ॑ಸೇ ಸುವೃ॒ಕ್ತಿಭಿಃ॑ ॥

त्यं सु मे॒षं म॑हया स्व॒र्विदं॑ श॒तं यस्य॑ सु॒भ्वः॑ सा॒कमीर॑ते । अत्यं॒ न वाजं॑ हवन॒स्यदं॒ रथ॒मेंद्रं॑ ववृत्या॒मव॑से सुवृ॒क्तिभिः॑ ॥

ಸ ಪರ್ವ॑ತೋ॒ ನ ಧ॒ರುಣೇ॒ಷ್ವಚ್ಯು॑ತಃ ಸ॒ಹಸ್ರ॑ಮೂತಿ॒ಸ್ತವಿ॑ಷೀಷು ವಾವೃಧೇ । ಇಂದ್ರೋ॒ ಯದ್ವೃ॒ತ್ರಮವ॑ಧೀನ್ನದೀ॒ವೃತ॑ಮು॒ಬ್ಜನ್ನರ್ಣಾಂ॑ಸಿ॒ ಜರ್ಹೃ॑ಷಾಣೋ॒ ಅಂಧ॑ಸಾ ॥

स पर्व॑तो॒ न ध॒रुणे॒ष्वच्यु॑तः स॒हस्र॑मूति॒स्तवि॑षीषु वावृधे । इंद्रो॒ यद्वृ॒त्रमव॑धीन्नदी॒वृत॑मु॒ब्जन्नर्णां॑सि॒ जर्हृ॑षाणो॒ अंध॑सा ॥

ಸ ಹಿ ದ್ವ॒ರೋ ದ್ವ॒ರಿಷು॑ ವ॒ವ್ರ ಊಧ॑ನಿ ಚಂ॒ದ್ರಬು॑ಧ್ನೋ॒ ಮದ॑ವೃದ್ಧೋ ಮನೀ॒ಷಿಭಿಃ॑ । ಇಂದ್ರಂ॒ ತಮ॑ಹ್ವೇ ಸ್ವಪ॒ಸ್ಯಯಾ॑ ಧಿ॒ಯಾ ಮಂಹಿ॑ಷ್ಠರಾತಿಂ॒ ಸ ಹಿ ಪಪ್ರಿ॒ರಂಧ॑ಸಃ ॥

स हि द्व॒रो द्व॒रिषु॑ व॒व्र ऊध॑नि चं॒द्रबु॑ध्नो॒ मद॑वृद्धो मनी॒षिभिः॑ । इंद्रं॒ तम॑ह्वे स्वप॒स्यया॑ धि॒या मंहि॑ष्ठरातिं॒ स हि पप्रि॒रंध॑सः ॥

ಆ ಯಂ ಪೃ॒ಣಂತಿ॑ ದಿ॒ವಿ ಸದ್ಮ॑ಬರ್ಹಿಷಃ ಸಮು॒ದ್ರಂ ನ ಸು॒ಭ್ವಃ೧॒॑ ಸ್ವಾ ಅ॒ಭಿಷ್ಟ॑ಯಃ । ತಂ ವೃ॑ತ್ರ॒ಹತ್ಯೇ॒ ಅನು॑ ತಸ್ಥುರೂ॒ತಯಃ॒ ಶುಷ್ಮಾ॒ ಇಂದ್ರ॑ಮವಾ॒ತಾ ಅಹ್ರು॑ತಪ್ಸವಃ ॥

आ यं पृ॒णंति॑ दि॒वि सद्म॑बर्हिषः समु॒द्रं न सु॒भ्वः१॒॑ स्वा अ॒भिष्ट॑यः । तं वृ॑त्र॒हत्ये॒ अनु॑ तस्थुरू॒तयः॒ शुष्मा॒ इंद्र॑मवा॒ता अह्रु॑तप्सवः ॥

ಅ॒ಭಿ ಸ್ವವೃ॑ಷ್ಟಿಂ॒ ಮದೇ॑ ಅಸ್ಯ॒ ಯುಧ್ಯ॑ತೋ ರ॒ಘ್ವೀರಿ॑ವ ಪ್ರವ॒ಣೇ ಸ॑ಸ್ರುರೂ॒ತಯಃ॑ । ಇಂದ್ರೋ॒ ಯದ್ವ॒ಜ್ರೀ ಧೃ॒ಷಮಾ॑ಣೋ॒ ಅಂಧ॑ಸಾ ಭಿ॒ನದ್ವ॒ಲಸ್ಯ॑ ಪರಿ॒ಧೀಁರಿ॑ವ ತ್ರಿ॒ತಃ ॥

अ॒भि स्ववृ॑ष्टिं॒ मदे॑ अस्य॒ युध्य॑तो र॒घ्वीरि॑व प्रव॒णे स॑स्रुरू॒तयः॑ । इंद्रो॒ यद्व॒ज्री धृ॒षमा॑णो॒ अंध॑सा भि॒नद्व॒लस्य॑ परि॒धीँरि॑व त्रि॒तः ॥

ಪರೀಂ॑ ಘೃ॒ಣಾ ಚ॑ರತಿ ತಿತ್ವಿ॒ಷೇ ಶವೋ॒ಽಪೋ ವೃ॒ತ್ವೀ ರಜ॑ಸೋ ಬು॒ಧ್ನಮಾಶ॑ಯತ್ । ವೃ॒ತ್ರಸ್ಯ॒ ಯತ್ಪ್ರ॑ವ॒ಣೇ ದು॒ರ್ಗೃಭಿ॑ಶ್ವನೋ ನಿಜ॒ಘಂಥ॒ ಹನ್ವೋ॑ರಿಂದ್ರ ತನ್ಯ॒ತುಂ ॥

परीं॑ घृ॒णा च॑रति तित्वि॒षे शवो॒ऽपो वृ॒त्वी रज॑सो बु॒ध्नमाश॑यत् । वृ॒त्रस्य॒ यत्प्र॑व॒णे दु॒र्गृभि॑श्वनो निज॒घंथ॒ हन्वो॑रिंद्र तन्य॒तुं ॥

ಹ್ರ॒ದಂ ನ ಹಿ ತ್ವಾ॑ ನ್ಯೃ॒ಷಂತ್ಯೂ॒ರ್ಮಯೋ॒ ಬ್ರಹ್ಮಾ॑ಣೀಂದ್ರ॒ ತವ॒ ಯಾನಿ॒ ವರ್ಧ॑ನಾ । ತ್ವಷ್ಟಾ॑ ಚಿತ್ತೇ॒ ಯುಜ್ಯಂ॑ ವಾವೃಧೇ॒ ಶವ॑ಸ್ತ॒ತಕ್ಷ॒ ವಜ್ರ॑ಮ॒ಭಿಭೂ॑ತ್ಯೋಜಸಂ ॥

ह्र॒दं न हि त्वा॑ न्यृ॒षंत्यू॒र्मयो॒ ब्रह्मा॑णींद्र॒ तव॒ यानि॒ वर्ध॑ना । त्वष्टा॑ चित्ते॒ युज्यं॑ वावृधे॒ शव॑स्त॒तक्ष॒ वज्र॑म॒भिभू॑त्योजसं ॥

ಜ॒ಘ॒ನ್ವಾಁ ಉ॒ ಹರಿ॑ಭಿಃ ಸಂಭೃತಕ್ರತ॒ವಿಂದ್ರ॑ ವೃ॒ತ್ರಂ ಮನು॑ಷೇ ಗಾತು॒ಯನ್ನ॒ಪಃ । ಅಯ॑ಚ್ಛಥಾ ಬಾ॒ಹ್ವೋರ್ವಜ್ರ॑ಮಾಯ॒ಸಮಧಾ॑ರಯೋ ದಿ॒ವ್ಯಾ ಸೂರ್ಯಂ॑ ದೃ॒ಶೇ ॥

ज॒घ॒न्वाँ उ॒ हरि॑भिः संभृतक्रत॒विंद्र॑ वृ॒त्रं मनु॑षे गातु॒यन्न॒पः । अय॑च्छथा बा॒ह्वोर्वज्र॑माय॒समधा॑रयो दि॒व्या सूर्यं॑ दृ॒शे ॥

ಬೃ॒ಹತ್ಸ್ವಶ್ಚಂ॑ದ್ರ॒ಮಮ॑ವ॒ದ್ಯದು॒ಕ್ಥ್ಯ೧॒॑ಮಕೃ॑ಣ್ವತ ಭಿ॒ಯಸಾ॒ ರೋಹ॑ಣಂ ದಿ॒ವಃ । ಯನ್ಮಾನು॑ಷಪ್ರಧನಾ॒ ಇಂದ್ರ॑ಮೂ॒ತಯಃ॒ ಸ್ವ॑ರ್ನೃ॒ಷಾಚೋ॑ ಮ॒ರುತೋಽಮ॑ದ॒ನ್ನನು॑ ॥

बृ॒हत्स्वश्चं॑द्र॒मम॑व॒द्यदु॒क्थ्य१॒॑मकृ॑ण्वत भि॒यसा॒ रोह॑णं दि॒वः । यन्मानु॑षप्रधना॒ इंद्र॑मू॒तयः॒ स्व॑र्नृ॒षाचो॑ म॒रुतोऽम॑द॒न्ननु॑ ॥

ದ್ಯೌಶ್ಚಿ॑ದ॒ಸ್ಯಾಮ॑ವಾಁ॒ ಅಹೇಃ॑ ಸ್ವ॒ನಾದಯೋ॑ಯವೀದ್ಭಿ॒ಯಸಾ॒ ವಜ್ರ॑ ಇಂದ್ರ ತೇ । ವೃ॒ತ್ರಸ್ಯ॒ ಯದ್ಬ॑ದ್ಬಧಾ॒ನಸ್ಯ॑ ರೋದಸೀ॒ ಮದೇ॑ ಸು॒ತಸ್ಯ॒ ಶವ॒ಸಾಭಿ॑ನ॒ಚ್ಛಿರಃ॑ ॥

द्यौश्चि॑द॒स्याम॑वाँ॒ अहेः॑ स्व॒नादयो॑यवीद्भि॒यसा॒ वज्र॑ इंद्र ते । वृ॒त्रस्य॒ यद्ब॑द्बधा॒नस्य॑ रोदसी॒ मदे॑ सु॒तस्य॒ शव॒साभि॑न॒च्छिरः॑ ॥

ಯದಿನ್ನ್ವಿಂ॑ದ್ರ ಪೃಥಿ॒ವೀ ದಶ॑ಭುಜಿ॒ರಹಾ॑ನಿ॒ ವಿಶ್ವಾ॑ ತ॒ತನಂ॑ತ ಕೃ॒ಷ್ಟಯಃ॑ । ಅತ್ರಾಹ॑ ತೇ ಮಘವ॒ನ್ವಿಶ್ರು॑ತಂ॒ ಸಹೋ॒ ದ್ಯಾಮನು॒ ಶವ॑ಸಾ ಬ॒ರ್ಹಣಾ॑ ಭುವತ್ ॥

यदिन्न्विं॑द्र पृथि॒वी दश॑भुजि॒रहा॑नि॒ विश्वा॑ त॒तनं॑त कृ॒ष्टयः॑ । अत्राह॑ ते मघव॒न्विश्रु॑तं॒ सहो॒ द्यामनु॒ शव॑सा ब॒र्हणा॑ भुवत् ॥

ತ್ವಮ॒ಸ್ಯ ಪಾ॒ರೇ ರಜ॑ಸೋ॒ ವ್ಯೋ॑ಮನಃ॒ ಸ್ವಭೂ॑ತ್ಯೋಜಾ॒ ಅವ॑ಸೇ ಧೃಷನ್ಮನಃ । ಚ॒ಕೃ॒ಷೇ ಭೂಮಿಂ॑ ಪ್ರತಿ॒ಮಾನ॒ಮೋಜ॑ಸೋ॒ಽಪಃ ಸ್ವಃ॑ ಪರಿ॒ಭೂರೇ॒ಷ್ಯಾ ದಿವಂ॑ ॥

त्वम॒स्य पा॒रे रज॑सो॒ व्यो॑मनः॒ स्वभू॑त्योजा॒ अव॑से धृषन्मनः । च॒कृ॒षे भूमिं॑ प्रति॒मान॒मोज॑सो॒ऽपः स्वः॑ परि॒भूरे॒ष्या दिवं॑ ॥

ತ್ವಂ ಭು॑ವಃ ಪ್ರತಿ॒ಮಾನಂ॑ ಪೃಥಿ॒ವ್ಯಾ ಋ॒ಷ್ವವೀ॑ರಸ್ಯ ಬೃಹ॒ತಃ ಪತಿ॑ರ್ಭೂಃ । ವಿಶ್ವ॒ಮಾಪ್ರಾ॑ ಅಂ॒ತರಿ॑ಕ್ಷಂ ಮಹಿ॒ತ್ವಾ ಸ॒ತ್ಯಮ॒ದ್ಧಾ ನಕಿ॑ರ॒ನ್ಯಸ್ತ್ವಾವಾ॑ನ್ ॥

त्वं भु॑वः प्रति॒मानं॑ पृथि॒व्या ऋ॒ष्ववी॑रस्य बृह॒तः पति॑र्भूः । विश्व॒माप्रा॑ अं॒तरि॑क्षं महि॒त्वा स॒त्यम॒द्धा नकि॑र॒न्यस्त्वावा॑न् ॥

ನ ಯಸ್ಯ॒ ದ್ಯಾವಾ॑ಪೃಥಿ॒ವೀ ಅನು॒ ವ್ಯಚೋ॒ ನ ಸಿಂಧ॑ವೋ॒ ರಜ॑ಸೋ॒ ಅಂತ॑ಮಾನ॒ಶುಃ । ನೋತ ಸ್ವವೃ॑ಷ್ಟಿಂ॒ ಮದೇ॑ ಅಸ್ಯ॒ ಯುಧ್ಯ॑ತ॒ ಏಕೋ॑ ಅ॒ನ್ಯಚ್ಚ॑ಕೃಷೇ॒ ವಿಶ್ವ॑ಮಾನು॒ಷಕ್ ॥

न यस्य॒ द्यावा॑पृथि॒वी अनु॒ व्यचो॒ न सिंध॑वो॒ रज॑सो॒ अंत॑मान॒शुः । नोत स्ववृ॑ष्टिं॒ मदे॑ अस्य॒ युध्य॑त॒ एको॑ अ॒न्यच्च॑कृषे॒ विश्व॑मानु॒षक् ॥

ಆರ್ಚ॒ನ್ನತ್ರ॑ ಮ॒ರುತಃ॒ ಸಸ್ಮಿ॑ನ್ನಾ॒ಜೌ ವಿಶ್ವೇ॑ ದೇ॒ವಾಸೋ॑ ಅಮದ॒ನ್ನನು॑ ತ್ವಾ । ವೃ॒ತ್ರಸ್ಯ॒ ಯದ್ಭೃ॑ಷ್ಟಿ॒ಮತಾ॑ ವ॒ಧೇನ॒ ನಿ ತ್ವಮಿಂ॑ದ್ರ॒ ಪ್ರತ್ಯಾ॒ನಂ ಜ॒ಘಂಥ॑ ॥

आर्च॒न्नत्र॑ म॒रुतः॒ सस्मि॑न्ना॒जौ विश्वे॑ दे॒वासो॑ अमद॒न्ननु॑ त्वा । वृ॒त्रस्य॒ यद्भृ॑ष्टि॒मता॑ व॒धेन॒ नि त्वमिं॑द्र॒ प्रत्या॒नं ज॒घंथ॑ ॥