ಇಂದ್ರನ ವಿಜಯೋತ್ಸವ ಮತ್ತು ದೈವಿಕ ರಕ್ಷಣೆ: ಋಗ್ವೇದ ಮಂಡಲ ೧, ಸೂಕ್ತ ೫೩

ನ್ಯೂ॒೩॒॑ ಷು ವಾಚಂ॒ ಪ್ರ ಮ॒ಹೇ ಭ॑ರಾಮಹೇ॒ ಗಿರ॒ ಇಂದ್ರಾ॑ಯ॒ ಸದ॑ನೇ ವಿ॒ವಸ್ವ॑ತಃ । ನೂ ಚಿ॒ದ್ಧಿ ರತ್ನಂ॑ ಸಸ॒ತಾಮಿ॒ವಾವಿ॑ದ॒ನ್ನ ದು॑ಷ್ಟು॒ತಿರ್ದ್ರ॑ವಿಣೋ॒ದೇಷು॑ ಶಸ್ಯತೇ ॥

न्यू॒३॒॑ षु वाचं॒ प्र म॒हे भ॑रामहे॒ गिर॒ इंद्रा॑य॒ सद॑ने वि॒वस्व॑तः । नू चि॒द्धि रत्नं॑ सस॒तामि॒वावि॑द॒न्न दु॑ष्टु॒तिर्द्र॑विणो॒देषु॑ शस्यते ॥

ದು॒ರೋ ಅಶ್ವ॑ಸ್ಯ ದು॒ರ ಇಂ॑ದ್ರ॒ ಗೋರ॑ಸಿ ದು॒ರೋ ಯವ॑ಸ್ಯ॒ ವಸು॑ನ ಇ॒ನಸ್ಪತಿಃ॑ । ಶಿ॒ಕ್ಷಾ॒ನ॒ರಃ ಪ್ರ॒ದಿವೋ॒ ಅಕಾ॑ಮಕರ್ಶನಃ॒ ಸಖಾ॒ ಸಖಿ॑ಭ್ಯ॒ಸ್ತಮಿ॒ದಂ ಗೃ॑ಣೀಮಸಿ ॥

दु॒रो अश्व॑स्य दु॒र इं॑द्र॒ गोर॑सि दु॒रो यव॑स्य॒ वसु॑न इ॒नस्पतिः॑ । शि॒क्षा॒न॒रः प्र॒दिवो॒ अका॑मकर्शनः॒ सखा॒ सखि॑भ्य॒स्तमि॒दं गृ॑णीमसि ॥

ಶಚೀ॑ವ ಇಂದ್ರ ಪುರುಕೃದ್ದ್ಯುಮತ್ತಮ॒ ತವೇದಿ॒ದಮ॒ಭಿತ॑ಶ್ಚೇಕಿತೇ॒ ವಸು॑ । ಅತಃ॑ ಸಂ॒ಗೃಭ್ಯಾ॑ಭಿಭೂತ॒ ಆ ಭ॑ರ॒ ಮಾ ತ್ವಾ॑ಯ॒ತೋ ಜ॑ರಿ॒ತುಃ ಕಾಮ॑ಮೂನಯೀಃ ॥

शची॑व इंद्र पुरुकृद्द्युमत्तम॒ तवेदि॒दम॒भित॑श्चेकिते॒ वसु॑ । अतः॑ सं॒गृभ्या॑भिभूत॒ आ भ॑र॒ मा त्वा॑य॒तो ज॑रि॒तुः काम॑मूनयीः ॥

ಏ॒ಭಿರ್ದ್ಯುಭಿಃ॑ ಸು॒ಮನಾ॑ ಏ॒ಭಿರಿಂದು॑ಭಿರ್ನಿರುಂಧಾ॒ನೋ ಅಮ॑ತಿಂ॒ ಗೋಭಿ॑ರ॒ಶ್ವಿನಾ॑ । ಇಂದ್ರೇ॑ಣ॒ ದಸ್ಯುಂ॑ ದ॒ರಯಂ॑ತ॒ ಇಂದು॑ಭಿರ್ಯು॒ತದ್ವೇ॑ಷಸಃ॒ ಸಮಿ॒ಷಾ ರ॑ಭೇಮಹಿ ॥

ए॒भिर्द्युभिः॑ सु॒मना॑ ए॒भिरिंदु॑भिर्निरुंधा॒नो अम॑तिं॒ गोभि॑र॒श्विना॑ । इंद्रे॑ण॒ दस्युं॑ द॒रयं॑त॒ इंदु॑भिर्यु॒तद्वे॑षसः॒ समि॒षा र॑भेमहि ॥

ಸಮಿಂ॑ದ್ರ ರಾ॒ಯಾ ಸಮಿ॒ಷಾ ರ॑ಭೇಮಹಿ॒ ಸಂ ವಾಜೇ॑ಭಿಃ ಪುರುಶ್ಚಂ॒ದ್ರೈರ॒ಭಿದ್ಯು॑ಭಿಃ । ಸಂ ದೇ॒ವ್ಯಾ ಪ್ರಮ॑ತ್ಯಾ ವೀ॒ರಶು॑ಷ್ಮಯಾ॒ ಗೋಅ॑ಗ್ರ॒ಯಾಶ್ವಾ॑ವತ್ಯಾ ರಭೇಮಹಿ ॥

समिं॑द्र रा॒या समि॒षा र॑भेमहि॒ सं वाजे॑भिः पुरुश्चं॒द्रैर॒भिद्यु॑भिः । सं दे॒व्या प्रम॑त्या वी॒रशु॑ष्मया॒ गोअ॑ग्र॒याश्वा॑वत्या रभेमहि ॥

ತೇ ತ್ವಾ॒ ಮದಾ॑ ಅಮದಂ॒ತಾನಿ॒ ವೃಷ್ಣ್ಯಾ॒ ತೇ ಸೋಮಾ॑ಸೋ ವೃತ್ರ॒ಹತ್ಯೇ॑ಷು ಸತ್ಪತೇ । ಯತ್ಕಾ॒ರವೇ॒ ದಶ॑ ವೃ॒ತ್ರಾಣ್ಯ॑ಪ್ರ॒ತಿ ಬ॒ರ್ಹಿಷ್ಮ॑ತೇ॒ ನಿ ಸ॒ಹಸ್ರಾ॑ಣಿ ಬ॒ರ್ಹಯಃ॑ ॥

ते त्वा॒ मदा॑ अमदं॒तानि॒ वृष्ण्या॒ ते सोमा॑सो वृत्र॒हत्ये॑षु सत्पते । यत्का॒रवे॒ दश॑ वृ॒त्राण्य॑प्र॒ति ब॒र्हिष्म॑ते॒ नि स॒हस्रा॑णि ब॒र्हयः॑ ॥

ಯು॒ಧಾ ಯುಧ॒ಮುಪ॒ ಘೇದೇ॑ಷಿ ಧೃಷ್ಣು॒ಯಾ ಪು॒ರಾ ಪುರಂ॒ ಸಮಿ॒ದಂ ಹಂ॒ಸ್ಯೋಜ॑ಸಾ । ನಮ್ಯಾ॒ ಯದಿಂ॑ದ್ರ॒ ಸಖ್ಯಾ॑ ಪರಾ॒ವತಿ॑ ನಿಬ॒ರ್ಹಯೋ॒ ನಮು॑ಚಿಂ॒ ನಾಮ॑ ಮಾ॒ಯಿನಂ॑ ॥

यु॒धा युध॒मुप॒ घेदे॑षि धृष्णु॒या पु॒रा पुरं॒ समि॒दं हं॒स्योज॑सा । नम्या॒ यदिं॑द्र॒ सख्या॑ परा॒वति॑ निब॒र्हयो॒ नमु॑चिं॒ नाम॑ मा॒यिनं॑ ॥

ತ್ವಂ ಕರಂ॑ಜಮು॒ತ ಪ॒ರ್ಣಯಂ॑ ವಧೀ॒ಸ್ತೇಜಿ॑ಷ್ಠಯಾತಿಥಿ॒ಗ್ವಸ್ಯ॑ ವರ್ತ॒ನೀ । ತ್ವಂ ಶ॒ತಾ ವಂಗೃ॑ದಸ್ಯಾಭಿನ॒ತ್ಪುರೋ॑ಽನಾನು॒ದಃ ಪರಿ॑ಷೂತಾ ಋ॒ಜಿಶ್ವ॑ನಾ ॥

त्वं करं॑जमु॒त प॒र्णयं॑ वधी॒स्तेजि॑ष्ठयातिथि॒ग्वस्य॑ वर्त॒नी । त्वं श॒ता वंगृ॑दस्याभिन॒त्पुरो॑ऽनानु॒दः परि॑षूता ऋ॒जिश्व॑ना ॥

ತ್ವಮೇ॒ತಾಂಜ॑ನ॒ರಾಜ್ಞೋ॒ ದ್ವಿರ್ದಶಾ॑ಬಂ॒ಧುನಾ॑ ಸು॒ಶ್ರವ॑ಸೋಪಜ॒ಗ್ಮುಷಃ॑ । ಷ॒ಷ್ಟಿಂ ಸ॒ಹಸ್ರಾ॑ ನವ॒ತಿಂ ನವ॑ ಶ್ರು॒ತೋ ನಿ ಚ॒ಕ್ರೇಣ॒ ರಥ್ಯಾ॑ ದು॒ಷ್ಪದಾ॑ವೃಣಕ್ ॥

त्वमे॒तांज॑न॒राज्ञो॒ द्विर्दशा॑बं॒धुना॑ सु॒श्रव॑सोपज॒ग्मुषः॑ । ष॒ष्टिं स॒हस्रा॑ नव॒तिं नव॑ श्रु॒तो नि च॒क्रेण॒ रथ्या॑ दु॒ष्पदा॑वृणक् ॥

ತ್ವಮಾ॑ವಿಥ ಸು॒ಶ್ರವ॑ಸಂ॒ ತವೋ॒ತಿಭಿ॒ಸ್ತವ॒ ತ್ರಾಮ॑ಭಿರಿಂದ್ರ॒ ತೂರ್ವ॑ಯಾಣಂ । ತ್ವಮ॑ಸ್ಮೈ॒ ಕುತ್ಸ॑ಮತಿಥಿ॒ಗ್ವಮಾ॒ಯುಂ ಮ॒ಹೇ ರಾಜ್ಞೇ॒ ಯೂನೇ॑ ಅರಂಧನಾಯಃ ॥

त्वमा॑विथ सु॒श्रव॑सं॒ तवो॒तिभि॒स्तव॒ त्राम॑भिरिंद्र॒ तूर्व॑याणं । त्वम॑स्मै॒ कुत्स॑मतिथि॒ग्वमा॒युं म॒हे राज्ञे॒ यूने॑ अरंधनायः ॥

ಯ ಉ॒ದೃಚೀಂ॑ದ್ರ ದೇ॒ವಗೋ॑ಪಾಃ॒ ಸಖಾ॑ಯಸ್ತೇ ಶಿ॒ವತ॑ಮಾ॒ ಅಸಾ॑ಮ । ತ್ವಾಂ ಸ್ತೋ॑ಷಾಮ॒ ತ್ವಯಾ॑ ಸು॒ವೀರಾ॒ ದ್ರಾಘೀ॑ಯ॒ ಆಯುಃ॑ ಪ್ರತ॒ರಂ ದಧಾ॑ನಾಃ ॥

य उ॒दृचीं॑द्र दे॒वगो॑पाः॒ सखा॑यस्ते शि॒वत॑मा॒ असा॑म । त्वां स्तो॑षाम॒ त्वया॑ सु॒वीरा॒ द्राघी॑य॒ आयुः॑ प्रत॒रं दधा॑नाः ॥