Sūkta 50

उदु॒ त्यं जा॒तवे॑दसं दे॒वं व॑हंति के॒तवः॑ । दृ॒शे विश्वा॑य॒ सूर्यं॑ ॥

údu tyám jātávedasam devám vahanti ketávaḥ ǀ dṛśé víśvāya sū́ryam ǁ

अप॒ त्ये ता॒यवो॑ यथा॒ नक्ष॑त्रा यंत्य॒क्तुभिः॑ । सूरा॑य वि॒श्वच॑क्षसे ॥

ápa tyé tāyávo yathā nákṣatrā yantyaktúbhiḥ ǀ sū́rāya viśvácakṣase ǁ

अदृ॑श्रमस्य के॒तवो॒ वि र॒श्मयो॒ जनाँ॒ अनु॑ । भ्राजं॑तो अ॒ग्नयो॑ यथा ॥

ádṛśramasya ketávo ví raśmáyo jánām̐ ánu ǀ bhrā́janto agnáyo yathā ǁ

त॒रणि॑र्वि॒श्वद॑र्शतो ज्योति॒ष्कृद॑सि सूर्य । विश्व॒मा भा॑सि रोच॒नं ॥

taráṇirviśvádarśato jyotiṣkṛ́dasi sūrya ǀ víśvamā́ bhāsi rocanám ǁ

प्र॒त्यङ् दे॒वानां॒ विशः॑ प्र॒त्यङ्ङुदे॑षि॒ मानु॑षान् । प्र॒त्यङ्विश्वं॒ स्व॑र्दृ॒शे ॥

pratyáṅ devā́nām víśaḥ pratyáṅṅúdeṣi mā́nuṣān ǀ pratyáṅvíśvam svárdṛśé ǁ

येना॑ पावक॒ चक्ष॑सा भुर॒ण्यंतं॒ जनाँ॒ अनु॑ । त्वं व॑रुण॒ पश्य॑सि ॥

yénā pāvaka cákṣasā bhuraṇyántam jánām̐ ánu ǀ tvám varuṇa páśyasi ǁ

वि द्यामे॑षि॒ रज॑स्पृ॒थ्वहा॒ मिमा॑नो अ॒क्तुभिः॑ । पश्य॒ञ्जन्मा॑नि सूर्य ॥

ví dyā́meṣi rájaspṛthváhā mímāno aktúbhiḥ ǀ páśyañjánmāni sūrya ǁ

स॒प्त त्वा॑ ह॒रितो॒ रथे॒ वहं॑ति देव सूर्य । शो॒चिष्के॑शं विचक्षण ॥

saptá tvā haríto ráthe váhanti deva sūrya ǀ śocíṣkeśam vicakṣaṇa ǁ

अयु॑क्त स॒प्त शुं॒ध्युवः॒ सूरो॒ रथ॑स्य न॒प्त्यः॑ । ताभि॑र्याति॒ स्वयु॑क्तिभिः ॥

áyukta saptá śundhyúvaḥ sū́ro ráthasya naptyáḥ ǀ tā́bhiryāti sváyuktibhiḥ ǁ

उद्व॒यं तम॑स॒स्परि॒ ज्योति॒ष्पश्यं॑त॒ उत्त॑रं । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मं ॥

údvayám támasaspári jyótiṣpáśyanta úttaram ǀ devám devatrā́ sū́ryamáganma jyótiruttamám ǁ

उ॒द्यन्न॒द्य मि॑त्रमह आ॒रोह॒न्नुत्त॑रां॒ दिवं॑ । हृ॒द्रो॒गं मम॑ सूर्य हरि॒माणं॑ च नाशय ॥

udyánnadyá mitramaha āróhannúttarām dívam ǀ hṛdrogám máma sūrya harimā́ṇam ca nāśaya ǁ

शुके॑षु मे हरि॒माणं॑ रोप॒णाका॑सु दध्मसि । अथो॑ हारिद्र॒वेषु॑ मे हरि॒माणं॒ नि द॑ध्मसि ॥

śúkeṣu me harimā́ṇam ropaṇā́kāsu dadhmasi ǀ átho hāridravéṣu me harimā́ṇam ní dadhmasi ǁ

उद॑गाद॒यमा॑दि॒त्यो विश्वे॑न॒ सह॑सा स॒ह । द्वि॒षंतं॒ मह्यं॑ रं॒धय॒न्मो अ॒हं द्वि॑ष॒ते र॑धं ॥

údagādayámādityó víśvena sáhasā sahá ǀ dviṣántam máhyam randháyanmó ahám dviṣaté radham ǁ