ಇಂದ್ರ ಸೂಕ್ತ: ಮಧುಚ್ಛಂದಸರ ಅನ್ವೇಷಣೆ

ಸು॒ರೂ॒ಪ॒ಕೃ॒ತ್ನುಮೂ॒ತಯೇ॑ ಸು॒ದುಘಾ॑ಮಿವ ಗೋ॒ದುಹೇ॑ । ಜು॒ಹೂ॒ಮಸಿ॒ ದ್ಯವಿ॑ದ್ಯವಿ ॥

सु॒रू॒प॒कृ॒त्नुमू॒तये॑ सु॒दुघा॑मिव गो॒दुहे॑ । जु॒हू॒मसि॒ द्यवि॑द्यवि ॥

ಉಪ॑ ನಃ॒ ಸವ॒ನಾ ಗ॑ಹಿ॒ ಸೋಮ॑ಸ್ಯ ಸೋಮಪಾಃ ಪಿಬ । ಗೋ॒ದಾ ಇದ್ರೇ॒ವತೋ॒ ಮದಃ॑ ॥

उप॑ नः॒ सव॒ना ग॑हि॒ सोम॑स्य सोमपाः पिब । गो॒दा इद्रे॒वतो॒ मदः॑ ॥

ಅಥಾ॑ ತೇ॒ ಅಂತ॑ಮಾನಾಂ ವಿ॒ದ್ಯಾಮ॑ ಸುಮತೀ॒ನಾಂ । ಮಾ ನೋ॒ ಅತಿ॑ ಖ್ಯ॒ ಆ ಗ॑ಹಿ ॥

अथा॑ ते॒ अंत॑मानां वि॒द्याम॑ सुमती॒नां । मा नो॒ अति॑ ख्य॒ आ ग॑हि ॥

ಪರೇ॑ಹಿ॒ ವಿಗ್ರ॒ಮಸ್ತೃ॑ತ॒ಮಿಂದ್ರಂ॑ ಪೃಚ್ಛಾ ವಿಪ॒ಶ್ಚಿತಂ॑ । ಯಸ್ತೇ॒ ಸಖಿ॑ಭ್ಯ॒ ಆ ವರಂ॑ ॥

परे॑हि॒ विग्र॒मस्तृ॑त॒मिंद्रं॑ पृच्छा विप॒श्चितं॑ । यस्ते॒ सखि॑भ्य॒ आ वरं॑ ॥

ಉ॒ತ ಬ್ರು॑ವಂತು ನೋ॒ ನಿದೋ॒ ನಿರ॒ನ್ಯತ॑ಶ್ಚಿದಾರತ । ದಧಾ॑ನಾ॒ ಇಂದ್ರ॒ ಇದ್ದುವಃ॑ ॥

उ॒त ब्रु॑वंतु नो॒ निदो॒ निर॒न्यत॑श्चिदारत । दधा॑ना॒ इंद्र॒ इद्दुवः॑ ॥

ಉ॒ತ ನಃ॑ ಸು॒ಭಗಾಁ॑ ಅ॒ರಿರ್ವೋ॒ಚೇಯು॑ರ್ದಸ್ಮ ಕೃ॒ಷ್ಟಯಃ॑ । ಸ್ಯಾಮೇದಿಂದ್ರ॑ಸ್ಯ॒ ಶರ್ಮ॑ಣಿ ॥

उ॒त नः॑ सु॒भगाँ॑ अ॒रिर्वो॒चेयु॑र्दस्म कृ॒ष्टयः॑ । स्यामेदिंद्र॑स्य॒ शर्म॑णि ॥

ಏಮಾ॒ಶುಮಾ॒ಶವೇ॑ ಭರ ಯಜ್ಞ॒ಶ್ರಿಯಂ॑ ನೃ॒ಮಾದ॑ನಂ । ಪ॒ತ॒ಯನ್ಮಂ॑ದ॒ಯತ್ಸ॑ಖಂ ॥

एमा॒शुमा॒शवे॑ भर यज्ञ॒श्रियं॑ नृ॒माद॑नं । प॒त॒यन्मं॑द॒यत्स॑खं ॥

ಅ॒ಸ್ಯ ಪೀ॒ತ್ವಾ ಶ॑ತಕ್ರತೋ ಘ॒ನೋ ವೃ॒ತ್ರಾಣಾ॑ಮಭವಃ । ಪ್ರಾವೋ॒ ವಾಜೇ॑ಷು ವಾ॒ಜಿನಂ॑ ॥

अ॒स्य पी॒त्वा श॑तक्रतो घ॒नो वृ॒त्राणा॑मभवः । प्रावो॒ वाजे॑षु वा॒जिनं॑ ॥

ತಂ ತ್ವಾ॒ ವಾಜೇ॑ಷು ವಾ॒ಜಿನಂ॑ ವಾ॒ಜಯಾ॑ಮಃ ಶತಕ್ರತೋ । ಧನಾ॑ನಾಮಿಂದ್ರ ಸಾ॒ತಯೇ॑ ॥

तं त्वा॒ वाजे॑षु वा॒जिनं॑ वा॒जया॑मः शतक्रतो । धना॑नामिंद्र सा॒तये॑ ॥

ಯೋ ರಾ॒ಯೋ॒೩॒॑ವನಿ॑ರ್ಮ॒ಹಾನ್ತ್ಸು॑ಪಾ॒ರಃ ಸು॑ನ್ವ॒ತಃ ಸಖಾ॑ । ತಸ್ಮಾ॒ ಇಂದ್ರಾ॑ಯ ಗಾಯತ ॥

यो रा॒यो॒३॒॑वनि॑र्म॒हान्त्सु॑पा॒रः सु॑न्व॒तः सखा॑ । तस्मा॒ इंद्रा॑य गायत ॥