ಅಶ್ವಿನ್‌ ದೇವತೆಗಳ ಆವಾಹನೆ ಮತ್ತು ದಿವ್ಯ ಪ್ರಕಾಶದ ಸ್ತುತಿ

ಏ॒ಷೋ ಉ॒ಷಾ ಅಪೂ॑ರ್ವ್ಯಾ॒ ವ್ಯು॑ಚ್ಛತಿ ಪ್ರಿ॒ಯಾ ದಿ॒ವಃ । ಸ್ತು॒ಷೇ ವಾ॑ಮಶ್ವಿನಾ ಬೃ॒ಹತ್ ॥

ए॒षो उ॒षा अपू॑र्व्या॒ व्यु॑च्छति प्रि॒या दि॒वः । स्तु॒षे वा॑मश्विना बृ॒हत् ॥

ಯಾ ದ॒ಸ್ರಾ ಸಿಂಧು॑ಮಾತರಾ ಮನೋ॒ತರಾ॑ ರಯೀ॒ಣಾಂ । ಧಿ॒ಯಾ ದೇ॒ವಾ ವ॑ಸು॒ವಿದಾ॑ ॥

या द॒स्रा सिंधु॑मातरा मनो॒तरा॑ रयी॒णां । धि॒या दे॒वा व॑सु॒विदा॑ ॥

ವ॒ಚ್ಯಂತೇ॑ ವಾಂ ಕಕು॒ಹಾಸೋ॑ ಜೂ॒ರ್ಣಾಯಾ॒ಮಧಿ॑ ವಿ॒ಷ್ಟಪಿ॑ । ಯದ್ವಾಂ॒ ರಥೋ॒ ವಿಭಿ॒ಷ್ಪತಾ॑ತ್ ॥

व॒च्यंते॑ वां ककु॒हासो॑ जू॒र्णाया॒मधि॑ वि॒ष्टपि॑ । यद्वां॒ रथो॒ विभि॒ष्पता॑त् ॥

ಹ॒ವಿಷಾ॑ ಜಾ॒ರೋ ಅ॒ಪಾಂ ಪಿಪ॑ರ್ತಿ॒ ಪಪು॑ರಿರ್ನರಾ । ಪಿ॒ತಾ ಕುಟ॑ಸ್ಯ ಚರ್ಷ॒ಣಿಃ ॥

ह॒विषा॑ जा॒रो अ॒पां पिप॑र्ति॒ पपु॑रिर्नरा । पि॒ता कुट॑स्य चर्ष॒णिः ॥

ಆ॒ದಾ॒ರೋ ವಾಂ॑ ಮತೀ॒ನಾಂ ನಾಸ॑ತ್ಯಾ ಮತವಚಸಾ । ಪಾ॒ತಂ ಸೋಮ॑ಸ್ಯ ಧೃಷ್ಣು॒ಯಾ ॥

आ॒दा॒रो वां॑ मती॒नां नास॑त्या मतवचसा । पा॒तं सोम॑स्य धृष्णु॒या ॥

ಯಾ ನಃ॒ ಪೀಪ॑ರದಶ್ವಿನಾ॒ ಜ್ಯೋತಿ॑ಷ್ಮತೀ॒ ತಮ॑ಸ್ತಿ॒ರಃ । ತಾಮ॒ಸ್ಮೇ ರಾ॑ಸಾಥಾ॒ಮಿಷಂ॑ ॥

या नः॒ पीप॑रदश्विना॒ ज्योति॑ष्मती॒ तम॑स्ति॒रः । ताम॒स्मे रा॑साथा॒मिषं॑ ॥

ಆ ನೋ॑ ನಾ॒ವಾ ಮ॑ತೀ॒ನಾಂ ಯಾ॒ತಂ ಪಾ॒ರಾಯ॒ ಗಂತ॑ವೇ । ಯುಂ॒ಜಾಥಾ॑ಮಶ್ವಿನಾ॒ ರಥಂ॑ ॥

आ नो॑ ना॒वा म॑ती॒नां या॒तं पा॒राय॒ गंत॑वे । युं॒जाथा॑मश्विना॒ रथं॑ ॥

ಅ॒ರಿತ್ರಂ॑ ವಾಂ ದಿ॒ವಸ್ಪೃ॒ಥು ತೀ॒ರ್ಥೇ ಸಿಂಧೂ॑ನಾಂ॒ ರಥಃ॑ । ಧಿ॒ಯಾ ಯು॑ಯುಜ್ರ॒ ಇಂದ॑ವಃ ॥

अ॒रित्रं॑ वां दि॒वस्पृ॒थु ती॒र्थे सिंधू॑नां॒ रथः॑ । धि॒या यु॑युज्र॒ इंद॑वः ॥

ದಿ॒ವಸ್ಕ॑ಣ್ವಾಸ॒ ಇಂದ॑ವೋ॒ ವಸು॒ ಸಿಂಧೂ॑ನಾಂ ಪ॒ದೇ । ಸ್ವಂ ವ॒ವ್ರಿಂ ಕುಹ॑ ಧಿತ್ಸಥಃ ॥

दि॒वस्क॑ण्वास॒ इंद॑वो॒ वसु॒ सिंधू॑नां प॒दे । स्वं व॒व्रिं कुह॑ धित्सथः ॥

ಅಭೂ॑ದು॒ ಭಾ ಉ॑ ಅಂ॒ಶವೇ॒ ಹಿರ॑ಣ್ಯಂ॒ ಪ್ರತಿ॒ ಸೂರ್ಯಃ॑ । ವ್ಯ॑ಖ್ಯಜ್ಜಿ॒ಹ್ವಯಾಸಿ॑ತಃ ॥

अभू॑दु॒ भा उ॑ अं॒शवे॒ हिर॑ण्यं॒ प्रति॒ सूर्यः॑ । व्य॑ख्यज्जि॒ह्वयासि॑तः ॥

ಅಭೂ॑ದು ಪಾ॒ರಮೇತ॑ವೇ॒ ಪಂಥಾ॑ ಋ॒ತಸ್ಯ॑ ಸಾಧು॒ಯಾ । ಅದ॑ರ್ಶಿ॒ ವಿ ಸ್ರು॒ತಿರ್ದಿ॒ವಃ ॥

अभू॑दु पा॒रमेत॑वे॒ पंथा॑ ऋ॒तस्य॑ साधु॒या । अद॑र्शि॒ वि स्रु॒तिर्दि॒वः ॥

ತತ್ತ॒ದಿದ॒ಶ್ವಿನೋ॒ರವೋ॑ ಜರಿ॒ತಾ ಪ್ರತಿ॑ ಭೂಷತಿ । ಮದೇ॒ ಸೋಮ॑ಸ್ಯ॒ ಪಿಪ್ರ॑ತೋಃ ॥

तत्त॒दिद॒श्विनो॒रवो॑ जरि॒ता प्रति॑ भूषति । मदे॒ सोम॑स्य॒ पिप्र॑तोः ॥

ವಾ॒ವ॒ಸಾ॒ನಾ ವಿ॒ವಸ್ವ॑ತಿ॒ ಸೋಮ॑ಸ್ಯ ಪೀ॒ತ್ಯಾ ಗಿ॒ರಾ । ಮ॒ನು॒ಷ್ವಚ್ಛಂ॑ಭೂ॒ ಆ ಗ॑ತಂ ॥

वा॒व॒सा॒ना वि॒वस्व॑ति॒ सोम॑स्य पी॒त्या गि॒रा । म॒नु॒ष्वच्छं॑भू॒ आ ग॑तं ॥

ಯು॒ವೋರು॒ಷಾ ಅನು॒ ಶ್ರಿಯಂ॒ ಪರಿ॑ಜ್ಮನೋರು॒ಪಾಚ॑ರತ್ । ಋ॒ತಾ ವ॑ನಥೋ ಅ॒ಕ್ತುಭಿಃ॑ ॥

यु॒वोरु॒षा अनु॒ श्रियं॒ परि॑ज्मनोरु॒पाच॑रत् । ऋ॒ता व॑नथो अ॒क्तुभिः॑ ॥

ಉ॒ಭಾ ಪಿ॑ಬತಮಶ್ವಿನೋ॒ಭಾ ನಃ॒ ಶರ್ಮ॑ ಯಚ್ಛತಂ । ಅ॒ವಿ॒ದ್ರಿ॒ಯಾಭಿ॑ರೂ॒ತಿಭಿಃ॑ ॥

उ॒भा पि॑बतमश्विनो॒भा नः॒ शर्म॑ यच्छतं । अ॒वि॒द्रि॒याभि॑रू॒तिभिः॑ ॥