Sūkta 46

ए॒षो उ॒षा अपू॑र्व्या॒ व्यु॑च्छति प्रि॒या दि॒वः । स्तु॒षे वा॑मश्विना बृ॒हत् ॥

eṣó uṣā́ ápūrvyā vyúcchati priyā́ diváḥ ǀ stuṣé vāmaśvinā bṛhát ǁ

या द॒स्रा सिंधु॑मातरा मनो॒तरा॑ रयी॒णां । धि॒या दे॒वा व॑सु॒विदा॑ ॥

yā́ dasrā́ síndhumātarā manotárā rayīṇā́m ǀ dhiyā́ devā́ vasuvídā ǁ

व॒च्यंते॑ वां ककु॒हासो॑ जू॒र्णाया॒मधि॑ वि॒ष्टपि॑ । यद्वां॒ रथो॒ विभि॒ष्पता॑त् ॥

vacyánte vām kakuhā́so jūrṇā́yāmádhi viṣṭápi ǀ yádvām rátho víbhiṣpátāt ǁ

ह॒विषा॑ जा॒रो अ॒पां पिप॑र्ति॒ पपु॑रिर्नरा । पि॒ता कुट॑स्य चर्ष॒णिः ॥

havíṣā jāró apā́m píparti pápurirnarā ǀ pitā́ kúṭasya carṣaṇíḥ ǁ

आ॒दा॒रो वां॑ मती॒नां नास॑त्या मतवचसा । पा॒तं सोम॑स्य धृष्णु॒या ॥

ādāró vām matīnā́m nā́satyā matavacasā ǀ pātám sómasya dhṛṣṇuyā́ ǁ

या नः॒ पीप॑रदश्विना॒ ज्योति॑ष्मती॒ तम॑स्ति॒रः । ताम॒स्मे रा॑साथा॒मिषं॑ ॥

yā́ naḥ pī́paradaśvinā jyótiṣmatī támastiráḥ ǀ tā́masmé rāsāthāmíṣam ǁ

आ नो॑ ना॒वा म॑ती॒नां या॒तं पा॒राय॒ गंत॑वे । युं॒जाथा॑मश्विना॒ रथं॑ ॥

ā́ no nāvā́ matīnā́m yātám pārā́ya gántave ǀ yuñjā́thāmaśvinā rátham ǁ

अ॒रित्रं॑ वां दि॒वस्पृ॒थु ती॒र्थे सिंधू॑नां॒ रथः॑ । धि॒या यु॑युज्र॒ इंद॑वः ॥

arítram vām diváspṛthú tīrthé síndhūnām ráthaḥ ǀ dhiyā́ yuyujra índavaḥ ǁ

दि॒वस्क॑ण्वास॒ इंद॑वो॒ वसु॒ सिंधू॑नां प॒दे । स्वं व॒व्रिं कुह॑ धित्सथः ॥

diváskaṇvāsa índavo vásu síndhūnām padé ǀ svám vavrím kúha dhitsathaḥ ǁ

अभू॑दु॒ भा उ॑ अं॒शवे॒ हिर॑ण्यं॒ प्रति॒ सूर्यः॑ । व्य॑ख्यज्जि॒ह्वयासि॑तः ॥

ábhūdu bhā́ u aṃśáve híraṇyam práti sū́ryaḥ ǀ vyákhyajjihváyā́sitaḥ ǁ

अभू॑दु पा॒रमेत॑वे॒ पंथा॑ ऋ॒तस्य॑ साधु॒या । अद॑र्शि॒ वि स्रु॒तिर्दि॒वः ॥

ábhūdu pārámétave pánthā ṛtásya sādhuyā́ ǀ ádarśi ví srutírdiváḥ ǁ

तत्त॒दिद॒श्विनो॒रवो॑ जरि॒ता प्रति॑ भूषति । मदे॒ सोम॑स्य॒ पिप्र॑तोः ॥

táttadídaśvínorávo jaritā́ práti bhūṣati ǀ máde sómasya pípratoḥ ǁ

वा॒व॒सा॒ना वि॒वस्व॑ति॒ सोम॑स्य पी॒त्या गि॒रा । म॒नु॒ष्वच्छं॑भू॒ आ ग॑तं ॥

vāvasānā́ vivásvati sómasya pītyā́ girā́ ǀ manuṣvácchambhū ā́ gatam ǁ

यु॒वोरु॒षा अनु॒ श्रियं॒ परि॑ज्मनोरु॒पाच॑रत् । ऋ॒ता व॑नथो अ॒क्तुभिः॑ ॥

yuvóruṣā́ ánu śríyam párijmanorupā́carat ǀ ṛtā́ vanatho aktúbhiḥ ǁ

उ॒भा पि॑बतमश्विनो॒भा नः॒ शर्म॑ यच्छतं । अ॒वि॒द्रि॒याभि॑रू॒तिभिः॑ ॥

ubhā́ pibatamaśvinobhā́ naḥ śárma yacchatam ǀ avidriyā́bhirūtíbhiḥ ǁ