ಪೂಷನ್: ದಾರಿದೀಪ ಮತ್ತು ಮಾರ್ಗದರ್ಶಕ

ಸಂ ಪೂ॑ಷ॒ನ್ನಧ್ವ॑ನಸ್ತಿರ॒ ವ್ಯಂಹೋ॑ ವಿಮುಚೋ ನಪಾತ್ । ಸಕ್ಷ್ವಾ॑ ದೇವ॒ ಪ್ರ ಣ॑ಸ್ಪು॒ರಃ ॥

सं पू॑ष॒न्नध्व॑नस्तिर॒ व्यंहो॑ विमुचो नपात् । सक्ष्वा॑ देव॒ प्र ण॑स्पु॒रः ॥

ಯೋ ನಃ॑ ಪೂಷನ್ನ॒ಘೋ ವೃಕೋ॑ ದುಃ॒ಶೇವ॑ ಆ॒ದಿದೇ॑ಶತಿ । ಅಪ॑ ಸ್ಮ॒ ತಂ ಪ॒ಥೋ ಜ॑ಹಿ ॥

यो नः॑ पूषन्न॒घो वृको॑ दुः॒शेव॑ आ॒दिदे॑शति । अप॑ स्म॒ तं प॒थो ज॑हि ॥

ಅಪ॒ ತ್ಯಂ ಪ॑ರಿಪಂ॒ಥಿನಂ॑ ಮುಷೀ॒ವಾಣಂ॑ ಹುರ॒ಶ್ಚಿತಂ॑ । ದೂ॒ರಮಧಿ॑ ಸ್ರು॒ತೇರ॑ಜ ॥

अप॒ त्यं प॑रिपं॒थिनं॑ मुषी॒वाणं॑ हुर॒श्चितं॑ । दू॒रमधि॑ स्रु॒तेर॑ज ॥

ತ್ವಂ ತಸ್ಯ॑ ದ್ವಯಾ॒ವಿನೋ॒ಽಘಶಂ॑ಸಸ್ಯ॒ ಕಸ್ಯ॑ ಚಿತ್ । ಪ॒ದಾಭಿ ತಿ॑ಷ್ಠ॒ ತಪು॑ಷಿಂ ॥

त्वं तस्य॑ द्वया॒विनो॒ऽघशं॑सस्य॒ कस्य॑ चित् । प॒दाभि ति॑ष्ठ॒ तपु॑षिं ॥

ಆ ತತ್ತೇ॑ ದಸ್ರ ಮಂತುಮಃ॒ ಪೂಷ॒ನ್ನವೋ॑ ವೃಣೀಮಹೇ । ಯೇನ॑ ಪಿ॒ತೄನಚೋ॑ದಯಃ ॥

आ तत्ते॑ दस्र मंतुमः॒ पूष॒न्नवो॑ वृणीमहे । येन॑ पि॒तॄनचो॑दयः ॥

ಅಧಾ॑ ನೋ ವಿಶ್ವಸೌಭಗ॒ ಹಿರ॑ಣ್ಯವಾಶೀಮತ್ತಮ । ಧನಾ॑ನಿ ಸು॒ಷಣಾ॑ ಕೃಧಿ ॥

अधा॑ नो विश्वसौभग॒ हिर॑ण्यवाशीमत्तम । धना॑नि सु॒षणा॑ कृधि ॥

ಅತಿ॑ ನಃ ಸ॒ಶ್ಚತೋ॑ ನಯ ಸು॒ಗಾ ನಃ॑ ಸು॒ಪಥಾ॑ ಕೃಣು । ಪೂಷ॑ನ್ನಿ॒ಹ ಕ್ರತುಂ॑ ವಿದಃ ॥

अति॑ नः स॒श्चतो॑ नय सु॒गा नः॑ सु॒पथा॑ कृणु । पूष॑न्नि॒ह क्रतुं॑ विदः ॥

ಅ॒ಭಿ ಸೂ॒ಯವ॑ಸಂ ನಯ॒ ನ ನ॑ವಜ್ವಾ॒ರೋ ಅಧ್ವ॑ನೇ । ಪೂಷ॑ನ್ನಿ॒ಹ ಕ್ರತುಂ॑ ವಿದಃ ॥

अ॒भि सू॒यव॑सं नय॒ न न॑वज्वा॒रो अध्व॑ने । पूष॑न्नि॒ह क्रतुं॑ विदः ॥

ಶ॒ಗ್ಧಿ ಪೂ॒ರ್ಧಿ ಪ್ರ ಯಂ॑ಸಿ ಚ ಶಿಶೀ॒ಹಿ ಪ್ರಾಸ್ಯು॒ದರಂ॑ । ಪೂಷ॑ನ್ನಿ॒ಹ ಕ್ರತುಂ॑ ವಿದಃ ॥

श॒ग्धि पू॒र्धि प्र यं॑सि च शिशी॒हि प्रास्यु॒दरं॑ । पूष॑न्नि॒ह क्रतुं॑ विदः ॥

ನ ಪೂ॒ಷಣಂ॑ ಮೇಥಾಮಸಿ ಸೂ॒ಕ್ತೈರ॒ಭಿ ಗೃ॑ಣೀಮಸಿ । ವಸೂ॑ನಿ ದ॒ಸ್ಮಮೀ॑ಮಹೇ ॥

न पू॒षणं॑ मेथामसि सू॒क्तैर॒भि गृ॑णीमसि । वसू॑नि द॒स्ममी॑महे ॥