ಆದಿತ್ಯರ ಆಶ್ರಯ ಮತ್ತು ಅನುಗ್ರಹ - ಋಗ್ವೇದ ಮಂಡಲ ೧, ಸೂಕ್ತ ೪೧

ಯಂ ರಕ್ಷಂ॑ತಿ॒ ಪ್ರಚೇ॑ತಸೋ॒ ವರು॑ಣೋ ಮಿ॒ತ್ರೋ ಅ॑ರ್ಯ॒ಮಾ । ನೂ ಚಿ॒ತ್ಸ ದ॑ಭ್ಯತೇ॒ ಜನಃ॑ ॥

यं रक्षं॑ति॒ प्रचे॑तसो॒ वरु॑णो मि॒त्रो अ॑र्य॒मा । नू चि॒त्स द॑भ्यते॒ जनः॑ ॥

ಯಂ ಬಾ॒ಹುತೇ॑ವ॒ ಪಿಪ್ರ॑ತಿ॒ ಪಾಂತಿ॒ ಮರ್ತ್ಯಂ॑ ರಿ॒ಷಃ । ಅರಿ॑ಷ್ಟಃ॒ ಸರ್ವ॑ ಏಧತೇ ॥

यं बा॒हुते॑व॒ पिप्र॑ति॒ पांति॒ मर्त्यं॑ रि॒षः । अरि॑ष्टः॒ सर्व॑ एधते ॥

ವಿ ದು॒ರ್ಗಾ ವಿ ದ್ವಿಷಃ॑ ಪು॒ರೋ ಘ್ನಂತಿ॒ ರಾಜಾ॑ನ ಏಷಾಂ । ನಯಂ॑ತಿ ದುರಿ॒ತಾ ತಿ॒ರಃ ॥

वि दु॒र्गा वि द्विषः॑ पु॒रो घ्नंति॒ राजा॑न एषां । नयं॑ति दुरि॒ता ति॒रः ॥

ಸು॒ಗಃ ಪಂಥಾ॑ ಅನೃಕ್ಷ॒ರ ಆದಿ॑ತ್ಯಾಸ ಋ॒ತಂ ಯ॒ತೇ । ನಾತ್ರಾ॑ವಖಾ॒ದೋ ಅ॑ಸ್ತಿ ವಃ ॥

सु॒गः पंथा॑ अनृक्ष॒र आदि॑त्यास ऋ॒तं य॒ते । नात्रा॑वखा॒दो अ॑स्ति वः ॥

ಯಂ ಯ॒ಜ್ಞಂ ನಯ॑ಥಾ ನರ॒ ಆದಿ॑ತ್ಯಾ ಋ॒ಜುನಾ॑ ಪ॒ಥಾ । ಪ್ರ ವಃ॒ ಸ ಧೀ॒ತಯೇ॑ ನಶತ್ ॥

यं य॒ज्ञं नय॑था नर॒ आदि॑त्या ऋ॒जुना॑ प॒था । प्र वः॒ स धी॒तये॑ नशत् ॥

ಸ ರತ್ನಂ॒ ಮರ್ತ್ಯೋ॒ ವಸು॒ ವಿಶ್ವಂ॑ ತೋ॒ಕಮು॒ತ ತ್ಮನಾ॑ । ಅಚ್ಛಾ॑ ಗಚ್ಛ॒ತ್ಯಸ್ತೃ॑ತಃ ॥

स रत्नं॒ मर्त्यो॒ वसु॒ विश्वं॑ तो॒कमु॒त त्मना॑ । अच्छा॑ गच्छ॒त्यस्तृ॑तः ॥

ಕ॒ಥಾ ರಾ॑ಧಾಮ ಸಖಾಯಃ॒ ಸ್ತೋಮಂ॑ ಮಿ॒ತ್ರಸ್ಯಾ॑ರ್ಯ॒ಮ್ಣಃ । ಮಹಿ॒ ಪ್ಸರೋ॒ ವರು॑ಣಸ್ಯ ॥

क॒था रा॑धाम सखायः॒ स्तोमं॑ मि॒त्रस्या॑र्य॒म्णः । महि॒ प्सरो॒ वरु॑णस्य ॥

ಮಾ ವೋ॒ ಘ್ನಂತಂ॒ ಮಾ ಶಪಂ॑ತಂ॒ ಪ್ರತಿ॑ ವೋಚೇ ದೇವ॒ಯಂತಂ॑ । ಸು॒ಮ್ನೈರಿದ್ವ॒ ಆ ವಿ॑ವಾಸೇ ॥

मा वो॒ घ्नंतं॒ मा शपं॑तं॒ प्रति॑ वोचे देव॒यंतं॑ । सु॒म्नैरिद्व॒ आ वि॑वासे ॥

ಚ॒ತುರ॑ಶ್ಚಿ॒ದ್ದದ॑ಮಾನಾದ್ಬಿಭೀ॒ಯಾದಾ ನಿಧಾ॑ತೋಃ । ನ ದು॑ರು॒ಕ್ತಾಯ॑ ಸ್ಪೃಹಯೇತ್ ॥

च॒तुर॑श्चि॒द्दद॑मानाद्बिभी॒यादा निधा॑तोः । न दु॑रु॒क्ताय॑ स्पृहयेत् ॥