ಬ್ರಹ್ಮಣಸ್ಪತಿಯ ಆವಾಹನೆ: ದೈವಿಕ ಜ್ಞಾನ ಮತ್ತು ಶಕ್ತಿಯ ಸ್ತುತಿ

ಉತ್ತಿ॑ಷ್ಠ ಬ್ರಹ್ಮಣಸ್ಪತೇ ದೇವ॒ಯಂತ॑ಸ್ತ್ವೇಮಹೇ । ಉಪ॒ ಪ್ರ ಯಂ॑ತು ಮ॒ರುತಃ॑ ಸು॒ದಾನ॑ವ॒ ಇಂದ್ರ॑ ಪ್ರಾ॒ಶೂರ್ಭ॑ವಾ॒ ಸಚಾ॑ ॥

उत्ति॑ष्ठ ब्रह्मणस्पते देव॒यंत॑स्त्वेमहे । उप॒ प्र यं॑तु म॒रुतः॑ सु॒दान॑व॒ इंद्र॑ प्रा॒शूर्भ॑वा॒ सचा॑ ॥

ತ್ವಾಮಿದ್ಧಿ ಸ॑ಹಸಸ್ಪುತ್ರ॒ ಮರ್ತ್ಯ॑ ಉಪಬ್ರೂ॒ತೇ ಧನೇ॑ ಹಿ॒ತೇ । ಸು॒ವೀರ್ಯಂ॑ ಮರುತ॒ ಆ ಸ್ವಶ್ವ್ಯಂ॒ ದಧೀ॑ತ॒ ಯೋ ವ॑ ಆಚ॒ಕೇ ॥

त्वामिद्धि स॑हसस्पुत्र॒ मर्त्य॑ उपब्रू॒ते धने॑ हि॒ते । सु॒वीर्यं॑ मरुत॒ आ स्वश्व्यं॒ दधी॑त॒ यो व॑ आच॒के ॥

ಪ್ರೈತು॒ ಬ್ರಹ್ಮ॑ಣ॒ಸ್ಪತಿಃ॒ ಪ್ರ ದೇ॒ವ್ಯೇ॑ತು ಸೂ॒ನೃತಾ॑ । ಅಚ್ಛಾ॑ ವೀ॒ರಂ ನರ್ಯಂ॑ ಪಂ॒ಕ್ತಿರಾ॑ಧಸಂ ದೇ॒ವಾ ಯ॒ಜ್ಞಂ ನ॑ಯಂತು ನಃ ॥

प्रैतु॒ ब्रह्म॑ण॒स्पतिः॒ प्र दे॒व्ये॑तु सू॒नृता॑ । अच्छा॑ वी॒रं नर्यं॑ पं॒क्तिरा॑धसं दे॒वा य॒ज्ञं न॑यंतु नः ॥

ಯೋ ವಾ॒ಘತೇ॒ ದದಾ॑ತಿ ಸೂ॒ನರಂ॒ ವಸು॒ ಸ ಧ॑ತ್ತೇ॒ ಅಕ್ಷಿ॑ತಿ॒ ಶ್ರವಃ॑ । ತಸ್ಮಾ॒ ಇಳಾಂ॑ ಸು॒ವೀರಾ॒ಮಾ ಯ॑ಜಾಮಹೇ ಸು॒ಪ್ರತೂ॑ರ್ತಿಮನೇ॒ಹಸಂ॑ ॥

यो वा॒घते॒ ददा॑ति सू॒नरं॒ वसु॒ स ध॑त्ते॒ अक्षि॑ति॒ श्रवः॑ । तस्मा॒ इळां॑ सु॒वीरा॒मा य॑जामहे सु॒प्रतू॑र्तिमने॒हसं॑ ॥

ಪ್ರ ನೂ॒ನಂ ಬ್ರಹ್ಮ॑ಣ॒ಸ್ಪತಿ॒ರ್ಮಂತ್ರಂ॑ ವದತ್ಯು॒ಕ್ಥ್ಯಂ॑ । ಯಸ್ಮಿ॒ನ್ನಿಂದ್ರೋ॒ ವರು॑ಣೋ ಮಿ॒ತ್ರೋ ಅ॑ರ್ಯ॒ಮಾ ದೇ॒ವಾ ಓಕಾಂ॑ಸಿ ಚಕ್ರಿ॒ರೇ ॥

प्र नू॒नं ब्रह्म॑ण॒स्पति॒र्मंत्रं॑ वदत्यु॒क्थ्यं॑ । यस्मि॒न्निंद्रो॒ वरु॑णो मि॒त्रो अ॑र्य॒मा दे॒वा ओकां॑सि चक्रि॒रे ॥

ತಮಿದ್ವೋ॑ಚೇಮಾ ವಿ॒ದಥೇ॑ಷು ಶಂ॒ಭುವಂ॒ ಮಂತ್ರಂ॑ ದೇವಾ ಅನೇ॒ಹಸಂ॑ । ಇ॒ಮಾಂ ಚ॒ ವಾಚಂ॑ ಪ್ರತಿ॒ಹರ್ಯ॑ಥಾ ನರೋ॒ ವಿಶ್ವೇದ್ವಾ॒ಮಾ ವೋ॑ ಅಶ್ನವತ್ ॥

तमिद्वो॑चेमा वि॒दथे॑षु शं॒भुवं॒ मंत्रं॑ देवा अने॒हसं॑ । इ॒मां च॒ वाचं॑ प्रति॒हर्य॑था नरो॒ विश्वेद्वा॒मा वो॑ अश्नवत् ॥

ಕೋ ದೇ॑ವ॒ಯಂತ॑ಮಶ್ನವ॒ಜ್ಜನಂ॒ ಕೋ ವೃ॒ಕ್ತಬ॑ರ್ಹಿಷಂ । ಪ್ರಪ್ರ॑ ದಾ॒ಶ್ವಾನ್ಪ॒ಸ್ತ್ಯಾ॑ಭಿರಸ್ಥಿತಾಂತ॒ರ್ವಾವ॒ತ್ಕ್ಷಯಂ॑ ದಧೇ ॥

को दे॑व॒यंत॑मश्नव॒ज्जनं॒ को वृ॒क्तब॑र्हिषं । प्रप्र॑ दा॒श्वान्प॒स्त्या॑भिरस्थितांत॒र्वाव॒त्क्षयं॑ दधे ॥

ಉಪ॑ ಕ್ಷ॒ತ್ರಂ ಪೃಂ॑ಚೀ॒ತ ಹಂತಿ॒ ರಾಜ॑ಭಿರ್ಭ॒ಯೇ ಚಿ॑ತ್ಸುಕ್ಷಿ॒ತಿಂ ದ॑ಧೇ । ನಾಸ್ಯ॑ ವ॒ರ್ತಾ ನ ತ॑ರು॒ತಾ ಮ॑ಹಾಧ॒ನೇ ನಾರ್ಭೇ॑ ಅಸ್ತಿ ವ॒ಜ್ರಿಣಃ॑ ॥

उप॑ क्ष॒त्रं पृं॑ची॒त हंति॒ राज॑भिर्भ॒ये चि॑त्सुक्षि॒तिं द॑धे । नास्य॑ व॒र्ता न त॑रु॒ता म॑हाध॒ने नार्भे॑ अस्ति व॒ज्रिणः॑ ॥