Sūkta 3

अश्वि॑ना॒ यज्व॑री॒रिषो॒ द्रव॑त्पाणी॒ शुभ॑स्पती । पुरु॑भुजा चन॒स्यतं॑ ॥

áśvinā yájvarīríṣo drávatpāṇī śúbhaspatī ǀ púrubhujā canasyátam ǁ

अश्वि॑ना॒ पुरु॑दंससा॒ नरा॒ शवी॑रया धि॒या । धिष्ण्या॒ वन॑तं॒ गिरः॑ ॥

áśvinā púrudaṃsasā nárā śávīrayā dhiyā́ ǀ dhíṣṇyā vánatam gíraḥ ǁ

दस्रा॑ यु॒वाक॑वः सु॒ता नास॑त्या वृ॒क्तब॑र्हिषः । आ या॑तं रुद्रवर्तनी ॥

dásrā yuvā́kavaḥ sutā́ nā́satyā vṛktábarhiṣaḥ ǀ ā́ yātam rudravartanī ǁ

इंद्रा या॑हि चित्रभानो सु॒ता इ॒मे त्वा॒यवः॑ । अण्वी॑भि॒स्तना॑ पू॒तासः॑ ॥

índrā́ yāhi citrabhāno sutā́ imé tvāyávaḥ ǀ áṇvībhistánā pūtā́saḥ ǁ

इंद्रा या॑हि धि॒येषि॒तो विप्र॑जूतः सु॒ताव॑तः । उप॒ ब्रह्मा॑णि वा॒घतः॑ ॥

índrā́ yāhi dhiyéṣitó víprajūtaḥ sutā́vataḥ ǀ úpa bráhmāṇi vāghátaḥ ǁ

इंद्रा या॑हि॒ तूतु॑जान॒ उप॒ ब्रह्मा॑णि हरिवः । सु॒ते द॑धिष्व न॒श्चनः॑ ॥

índrā́ yāhi tū́tujāna úpa bráhmāṇi harivaḥ ǀ suté dadhiṣva naścánaḥ ǁ

ओमा॑सश्चर्षणीधृतो॒ विश्वे॑ देवास॒ आ ग॑त । दा॒श्वांसो॑ दा॒शुषः॑ सु॒तं ॥

ómāsaścarṣaṇīdhṛto víśve devāsa ā́ gata ǀ dāśvā́ṃso dāśúṣaḥ sutám ǁ

विश्वे॑ दे॒वासो॑ अ॒प्तुरः॑ सु॒तमा गं॑त॒ तूर्ण॑यः । उ॒स्रा इ॑व॒ स्वस॑राणि ॥

víśve devā́so aptúraḥ sutámā́ ganta tū́rṇayaḥ ǀ usrā́ iva svásarāṇi ǁ

विश्वे॑ दे॒वासो॑ अ॒स्रिध॒ एहि॑मायासो अ॒द्रुहः॑ । मेधं॑ जुषंत॒ वह्न॑यः ॥

víśve devā́so asrídha éhimāyāso adrúhaḥ ǀ médham juṣanta váhnayaḥ ǁ

पा॒व॒का नः॒ सर॑स्वती॒ वाजे॑भिर्वा॒जिनी॑वती । य॒ज्ञं व॑ष्टु धि॒याव॑सुः ॥

pāvakā́ naḥ sárasvatī vā́jebhirvājínīvatī ǀ yajñám vaṣṭu dhiyā́vasuḥ ǁ

चो॒द॒यि॒त्री सू॒नृता॑नां॒ चेतं॑ती सुमती॒नां । य॒ज्ञं द॑धे॒ सर॑स्वती ॥

codayitrī́ sūnṛ́tānām cétantī sumatīnā́m ǀ yajñám dadhe sárasvatī ǁ

म॒हो अर्णः॒ सर॑स्वती॒ प्र चे॑तयति के॒तुना॑ । धियो॒ विश्वा॒ वि रा॑जति ॥

mahó árṇaḥ sárasvatī prá cetayati ketúnā ǀ dhíyo víśvā ví rājati ǁ