Sūkta 2

वाय॒वा या॑हि दर्शते॒मे सोमा॒ अरं॑कृताः । तेषां॑ पाहि श्रु॒धी हवं॑ ॥

vā́yavā́ yāhi darśatemé sómā áraṃkṛtāḥ ǀ téṣām pāhi śrudhī́ hávam ǁ

वाय॑ उ॒क्थेभि॑र्जरंते॒ त्वामच्छा॑ जरि॒तारः॑ । सु॒तसो॑मा अह॒र्विदः॑ ॥

vā́ya ukthébhirjarante tvā́mácchā jaritā́raḥ ǀ sutásomā aharvídaḥ ǁ

वायो॒ तव॑ प्रपृंच॒ती धेना॑ जिगाति दा॒शुषे॑ । उ॒रू॒ची सोम॑पीतये ॥

vā́yo táva prapṛñcatī́ dhénā jigāti dāśúṣe ǀ urūcī́ sómapītaye ǁ

इंद्र॑वायू इ॒मे सु॒ता उप॒ प्रयो॑भि॒रा ग॑तं । इंद॑वो वामु॒शंति॒ हि ॥

índravāyū imé sutā́ úpa práyobhirā́ gatam ǀ índavo vāmuśánti hí ǁ

वाय॒विंद्र॑श्च चेतथः सु॒तानां॑ वाजिनीवसू । तावा या॑त॒मुप॑ द्र॒वत् ॥

vā́yavíndraśca cetathaḥ sutā́nām vājinīvasū ǀ tā́vā́ yātamúpa dravát ǁ

वाय॒विंद्र॑श्च सुन्व॒त आ या॑त॒मुप॑ निष्कृ॒तं । म॒क्ष्वि१॒॑त्था धि॒या न॑रा ॥

vā́yavíndraśca sunvatá ā́ yātamúpa niṣkṛtám ǀ makṣvítthā́ dhiyā́ narā ǁ

मि॒त्रं हु॑वे पू॒तद॑क्षं॒ वरु॑णं च रि॒शाद॑सं । धियं॑ घृ॒ताचीं॒ साधं॑ता ॥

mitrám huve pūtádakṣam váruṇam ca riśā́dasam ǀ dhíyam ghṛtā́cīm sā́dhantā ǁ

ऋ॒तेन॑ मित्रावरुणावृतावृधावृतस्पृशा । क्रतुं॑ बृ॒हंत॑माशाथे ॥

ṛténa mitrāvaruṇāvṛtāvṛdhāvṛtaspṛśā ǀ krátum bṛhántamāśāthe ǁ

क॒वी नो॑ मि॒त्रावरु॑णा तुविजा॒ता उ॑रु॒क्षया॑ । दक्षं॑ दधाते अ॒पसं॑ ॥

kavī́ no mitrā́váruṇā tuvijātā́ urukṣáyā ǀ dákṣam dadhāte apásam ǁ