ಮರುತಗಳ ವೈಭವ ಮತ್ತು ಪ್ರಕೃತಿಯ ಶಕ್ತಿ - ಋಗ್ವೇದ ಮಂಡಲ ೧, ಸೂಕ್ತ ೩೭

ಕ್ರೀ॒ಳಂ ವಃ॒ ಶರ್ಧೋ॒ ಮಾರು॑ತಮನ॒ರ್ವಾಣಂ॑ ರಥೇ॒ಶುಭಂ॑ । ಕಣ್ವಾ॑ ಅ॒ಭಿ ಪ್ರ ಗಾ॑ಯತ ॥

क्री॒ळं वः॒ शर्धो॒ मारु॑तमन॒र्वाणं॑ रथे॒शुभं॑ । कण्वा॑ अ॒भि प्र गा॑यत ॥

ಯೇ ಪೃಷ॑ತೀಭಿರ್ಋ॒ಷ್ಟಿಭಿಃ॑ ಸಾ॒ಕಂ ವಾಶೀ॑ಭಿರಂ॒ಜಿಭಿಃ॑ । ಅಜಾ॑ಯಂತ॒ ಸ್ವಭಾ॑ನವಃ ॥

ये पृष॑तीभिर्ऋ॒ष्टिभिः॑ सा॒कं वाशी॑भिरं॒जिभिः॑ । अजा॑यंत॒ स्वभा॑नवः ॥

ಇ॒ಹೇವ॑ ಶೃಣ್ವ ಏಷಾಂ॒ ಕಶಾ॒ ಹಸ್ತೇ॑ಷು॒ ಯದ್ವದಾ॑ನ್ । ನಿ ಯಾಮ॑ಞ್ಚಿ॒ತ್ರಮೃಂ॑ಜತೇ ॥

इ॒हेव॑ शृण्व एषां॒ कशा॒ हस्ते॑षु॒ यद्वदा॑न् । नि याम॑ञ्चि॒त्रमृं॑जते ॥

ಪ್ರ ವಃ॒ ಶರ್ಧಾ॑ಯ॒ ಘೃಷ್ವ॑ಯೇ ತ್ವೇ॒ಷದ್ಯು॑ಮ್ನಾಯ ಶು॒ಷ್ಮಿಣೇ॑ । ದೇ॒ವತ್ತಂ॒ ಬ್ರಹ್ಮ॑ ಗಾಯತ ॥

प्र वः॒ शर्धा॑य॒ घृष्व॑ये त्वे॒षद्यु॑म्नाय शु॒ष्मिणे॑ । दे॒वत्तं॒ ब्रह्म॑ गायत ॥

ಪ್ರ ಶಂ॑ಸಾ॒ ಗೋಷ್ವಘ್ನ್ಯಂ॑ ಕ್ರೀ॒ಳಂ ಯಚ್ಛರ್ಧೋ॒ ಮಾರು॑ತಂ । ಜಂಭೇ॒ ರಸ॑ಸ್ಯ ವಾವೃಧೇ ॥

प्र शं॑सा॒ गोष्वघ्न्यं॑ क्री॒ळं यच्छर्धो॒ मारु॑तं । जंभे॒ रस॑स्य वावृधे ॥

ಕೋ ವೋ॒ ವರ್ಷಿ॑ಷ್ಠ॒ ಆ ನ॑ರೋ ದಿ॒ವಶ್ಚ॒ ಗ್ಮಶ್ಚ॑ ಧೂತಯಃ । ಯತ್ಸೀ॒ಮಂತಂ॒ ನ ಧೂ॑ನು॒ಥ ॥

को वो॒ वर्षि॑ष्ठ॒ आ न॑रो दि॒वश्च॒ ग्मश्च॑ धूतयः । यत्सी॒मंतं॒ न धू॑नु॒थ ॥

ನಿ ವೋ॒ ಯಾಮಾ॑ಯ॒ ಮಾನು॑ಷೋ ದ॒ಧ್ರ ಉ॒ಗ್ರಾಯ॑ ಮ॒ನ್ಯವೇ॑ । ಜಿಹೀ॑ತ॒ ಪರ್ವ॑ತೋ ಗಿ॒ರಿಃ ॥

नि वो॒ यामा॑य॒ मानु॑षो द॒ध्र उ॒ग्राय॑ म॒न्यवे॑ । जिही॑त॒ पर्व॑तो गि॒रिः ॥

ಯೇಷಾ॒ಮಜ್ಮೇ॑ಷು ಪೃಥಿ॒ವೀ ಜು॑ಜು॒ರ್ವಾಁ ಇ॑ವ ವಿ॒ಶ್ಪತಿಃ॑ । ಭಿ॒ಯಾ ಯಾಮೇ॑ಷು॒ ರೇಜ॑ತೇ ॥

येषा॒मज्मे॑षु पृथि॒वी जु॑जु॒र्वाँ इ॑व वि॒श्पतिः॑ । भि॒या यामे॑षु॒ रेज॑ते ॥

ಸ್ಥಿ॒ರಂ ಹಿ ಜಾನ॑ಮೇಷಾಂ॒ ವಯೋ॑ ಮಾ॒ತುರ್ನಿರೇ॑ತವೇ । ಯತ್ಸೀ॒ಮನು॑ ದ್ವಿ॒ತಾ ಶವಃ॑ ॥

स्थि॒रं हि जान॑मेषां॒ वयो॑ मा॒तुर्निरे॑तवे । यत्सी॒मनु॑ द्वि॒ता शवः॑ ॥

ಉದು॒ ತ್ಯೇ ಸೂ॒ನವೋ॒ ಗಿರಃ॒ ಕಾಷ್ಠಾ॒ ಅಜ್ಮೇ॑ಷ್ವತ್ನತ । ವಾ॒ಶ್ರಾ ಅ॑ಭಿ॒ಜ್ಞು ಯಾತ॑ವೇ ॥

उदु॒ त्ये सू॒नवो॒ गिरः॒ काष्ठा॒ अज्मे॑ष्वत्नत । वा॒श्रा अ॑भि॒ज्ञु यात॑वे ॥

ತ್ಯಂ ಚಿ॑ದ್ಘಾ ದೀ॒ರ್ಘಂ ಪೃ॒ಥುಂ ಮಿ॒ಹೋ ನಪಾ॑ತ॒ಮಮೃ॑ಧ್ರಂ । ಪ್ರ ಚ್ಯಾ॑ವಯಂತಿ॒ ಯಾಮ॑ಭಿಃ ॥

त्यं चि॑द्घा दी॒र्घं पृ॒थुं मि॒हो नपा॑त॒ममृ॑ध्रं । प्र च्या॑वयंति॒ याम॑भिः ॥

ಮರು॑ತೋ॒ ಯದ್ಧ॑ ವೋ॒ ಬಲಂ॒ ಜನಾಁ॑ ಅಚುಚ್ಯವೀತನ । ಗಿ॒ರೀಁರ॑ಚುಚ್ಯವೀತನ ॥

मरु॑तो॒ यद्ध॑ वो॒ बलं॒ जनाँ॑ अचुच्यवीतन । गि॒रीँर॑चुच्यवीतन ॥

ಯದ್ಧ॒ ಯಾಂತಿ॑ ಮ॒ರುತಃ॒ ಸಂ ಹ॑ ಬ್ರುವ॒ತೇಽಧ್ವ॒ನ್ನಾ । ಶೃ॒ಣೋತಿ॒ ಕಶ್ಚಿ॑ದೇಷಾಂ ॥

यद्ध॒ यांति॑ म॒रुतः॒ सं ह॑ ब्रुव॒तेऽध्व॒न्ना । शृ॒णोति॒ कश्चि॑देषां ॥

ಪ್ರ ಯಾ॑ತ॒ ಶೀಭ॑ಮಾ॒ಶುಭಿಃ॒ ಸಂತಿ॒ ಕಣ್ವೇ॑ಷು ವೋ॒ ದುವಃ॑ । ತತ್ರೋ॒ ಷು ಮಾ॑ದಯಾಧ್ವೈ ॥

प्र या॑त॒ शीभ॑मा॒शुभिः॒ संति॒ कण्वे॑षु वो॒ दुवः॑ । तत्रो॒ षु मा॑दयाध्वै ॥

ಅಸ್ತಿ॒ ಹಿ ಷ್ಮಾ॒ ಮದಾ॑ಯ ವಃ॒ ಸ್ಮಸಿ॑ ಷ್ಮಾ ವ॒ಯಮೇ॑ಷಾಂ । ವಿಶ್ವಂ॑ ಚಿ॒ದಾಯು॑ರ್ಜೀ॒ವಸೇ॑ ॥

अस्ति॒ हि ष्मा॒ मदा॑य वः॒ स्मसि॑ ष्मा व॒यमे॑षां । विश्वं॑ चि॒दायु॑र्जी॒वसे॑ ॥