Sūkta 37

क्री॒ळं वः॒ शर्धो॒ मारु॑तमन॒र्वाणं॑ रथे॒शुभं॑ । कण्वा॑ अ॒भि प्र गा॑यत ॥

krīḷám vaḥ śárdho mā́rutamanarvā́ṇam ratheśúbham ǀ káṇvā abhí prá gāyata ǁ

ये पृष॑तीभिर्ऋ॒ष्टिभिः॑ सा॒कं वाशी॑भिरं॒जिभिः॑ । अजा॑यंत॒ स्वभा॑नवः ॥

yé pṛ́ṣatībhirṛṣṭíbhiḥ sākám vā́śībhirañjíbhiḥ ǀ ájāyanta svábhānavaḥ ǁ

इ॒हेव॑ शृण्व एषां॒ कशा॒ हस्ते॑षु॒ यद्वदा॑न् । नि याम॑ञ्चि॒त्रमृं॑जते ॥

ihéva śṛṇva eṣām káśā hásteṣu yádvádān ǀ ní yā́mañcitrámṛñjate ǁ

प्र वः॒ शर्धा॑य॒ घृष्व॑ये त्वे॒षद्यु॑म्नाय शु॒ष्मिणे॑ । दे॒वत्तं॒ ब्रह्म॑ गायत ॥

prá vaḥ śárdhāya ghṛ́ṣvaye tveṣádyumnāya śuṣmíṇe ǀ deváttam bráhma gāyata ǁ

प्र शं॑सा॒ गोष्वघ्न्यं॑ क्री॒ळं यच्छर्धो॒ मारु॑तं । जंभे॒ रस॑स्य वावृधे ॥

prá śaṃsā góṣvághnyam krīḷám yácchárdho mā́rutam ǀ jámbhe rásasya vāvṛdhe ǁ

को वो॒ वर्षि॑ष्ठ॒ आ न॑रो दि॒वश्च॒ ग्मश्च॑ धूतयः । यत्सी॒मंतं॒ न धू॑नु॒थ ॥

kó vo várṣiṣṭha ā́ naro diváśca gmáśca dhūtayaḥ ǀ yátsīmántam ná dhūnuthá ǁ

नि वो॒ यामा॑य॒ मानु॑षो द॒ध्र उ॒ग्राय॑ म॒न्यवे॑ । जिही॑त॒ पर्व॑तो गि॒रिः ॥

ní vo yā́māya mā́nuṣo dadhrá ugrā́ya manyáve ǀ jíhīta párvato giríḥ ǁ

येषा॒मज्मे॑षु पृथि॒वी जु॑जु॒र्वाँ इ॑व वि॒श्पतिः॑ । भि॒या यामे॑षु॒ रेज॑ते ॥

yéṣāmájmeṣu pṛthivī́ jujurvā́m̐ iva viśpátiḥ ǀ bhiyā́ yā́meṣu réjate ǁ

स्थि॒रं हि जान॑मेषां॒ वयो॑ मा॒तुर्निरे॑तवे । यत्सी॒मनु॑ द्वि॒ता शवः॑ ॥

sthirám hí jā́nameṣām váyo mātúrníretave ǀ yátsīmánu dvitā́ śávaḥ ǁ

उदु॒ त्ये सू॒नवो॒ गिरः॒ काष्ठा॒ अज्मे॑ष्वत्नत । वा॒श्रा अ॑भि॒ज्ञु यात॑वे ॥

údu tyé sūnávo gíraḥ kā́ṣṭhā ájmeṣvatnata ǀ vāśrā́ abhijñú yā́tave ǁ

त्यं चि॑द्घा दी॒र्घं पृ॒थुं मि॒हो नपा॑त॒ममृ॑ध्रं । प्र च्या॑वयंति॒ याम॑भिः ॥

tyám cidghā dīrghám pṛthúm mihó nápātamámṛdhram ǀ prá cyāvayanti yā́mabhiḥ ǁ

मरु॑तो॒ यद्ध॑ वो॒ बलं॒ जनाँ॑ अचुच्यवीतन । गि॒रीँर॑चुच्यवीतन ॥

máruto yáddha vo bálam jánām̐ acucyavītana ǀ girī́m̐racucyavītana ǁ

यद्ध॒ यांति॑ म॒रुतः॒ सं ह॑ ब्रुव॒तेऽध्व॒न्ना । शृ॒णोति॒ कश्चि॑देषां ॥

yáddha yā́nti marútaḥ sám ha bruvaté’dhvannā́ ǀ śṛṇóti káścideṣām ǁ

प्र या॑त॒ शीभ॑मा॒शुभिः॒ संति॒ कण्वे॑षु वो॒ दुवः॑ । तत्रो॒ षु मा॑दयाध्वै ॥

prá yāta śī́bhamāśúbhiḥ sánti káṇveṣu vo dúvaḥ ǀ tátro ṣú mādayādhvai ǁ

अस्ति॒ हि ष्मा॒ मदा॑य वः॒ स्मसि॑ ष्मा व॒यमे॑षां । विश्वं॑ चि॒दायु॑र्जी॒वसे॑ ॥

ásti hí ṣmā mádāya vaḥ smási ṣmā vayámeṣām ǀ víśvam cidā́yurjīváse ǁ