ಅಗ್ನಿ ಸೂಕ್ತ - ದೈವಿಕ ಸಂದೇಶವಾಹಕನ ಆವಾಹನೆ

ಪ್ರ ವೋ॑ ಯ॒ಹ್ವಂ ಪು॑ರೂ॒ಣಾಂ ವಿ॒ಶಾಂ ದೇ॑ವಯ॒ತೀನಾಂ॑ । ಅ॒ಗ್ನಿಂ ಸೂ॒ಕ್ತೇಭಿ॒ರ್ವಚೋ॑ಭಿರೀಮಹೇ॒ ಯಂ ಸೀ॒ಮಿದ॒ನ್ಯ ಈಳ॑ತೇ ॥

प्र वो॑ य॒ह्वं पु॑रू॒णां वि॒शां दे॑वय॒तीनां॑ । अ॒ग्निं सू॒क्तेभि॒र्वचो॑भिरीमहे॒ यं सी॒मिद॒न्य ईळ॑ते ॥

ಜನಾ॑ಸೋ ಅ॒ಗ್ನಿಂ ದ॑ಧಿರೇ ಸಹೋ॒ವೃಧಂ॑ ಹ॒ವಿಷ್ಮಂ॑ತೋ ವಿಧೇಮ ತೇ । ಸ ತ್ವಂ ನೋ॑ ಅ॒ದ್ಯ ಸು॒ಮನಾ॑ ಇ॒ಹಾವಿ॒ತಾ ಭವಾ॒ ವಾಜೇ॑ಷು ಸಂತ್ಯ ॥

जना॑सो अ॒ग्निं द॑धिरे सहो॒वृधं॑ ह॒विष्मं॑तो विधेम ते । स त्वं नो॑ अ॒द्य सु॒मना॑ इ॒हावि॒ता भवा॒ वाजे॑षु संत्य ॥

ಪ್ರ ತ್ವಾ॑ ದೂ॒ತಂ ವೃ॑ಣೀಮಹೇ॒ ಹೋತಾ॑ರಂ ವಿ॒ಶ್ವವೇ॑ದಸಂ । ಮ॒ಹಸ್ತೇ॑ ಸ॒ತೋ ವಿ ಚ॑ರಂತ್ಯ॒ರ್ಚಯೋ॑ ದಿ॒ವಿ ಸ್ಪೃ॑ಶಂತಿ ಭಾ॒ನವಃ॑ ॥

प्र त्वा॑ दू॒तं वृ॑णीमहे॒ होता॑रं वि॒श्ववे॑दसं । म॒हस्ते॑ स॒तो वि च॑रंत्य॒र्चयो॑ दि॒वि स्पृ॑शंति भा॒नवः॑ ॥

ದೇ॒ವಾಸ॑ಸ್ತ್ವಾ॒ ವರು॑ಣೋ ಮಿ॒ತ್ರೋ ಅ॑ರ್ಯ॒ಮಾ ಸಂ ದೂ॒ತಂ ಪ್ರ॒ತ್ನಮಿಂ॑ಧತೇ । ವಿಶ್ವಂ॒ ಸೋ ಅ॑ಗ್ನೇ ಜಯತಿ॒ ತ್ವಯಾ॒ ಧನಂ॒ ಯಸ್ತೇ॑ ದ॒ದಾಶ॒ ಮರ್ತ್ಯಃ॑ ॥

दे॒वास॑स्त्वा॒ वरु॑णो मि॒त्रो अ॑र्य॒मा सं दू॒तं प्र॒त्नमिं॑धते । विश्वं॒ सो अ॑ग्ने जयति॒ त्वया॒ धनं॒ यस्ते॑ द॒दाश॒ मर्त्यः॑ ॥

ಮಂ॒ದ್ರೋ ಹೋತಾ॑ ಗೃ॒ಹಪ॑ತಿ॒ರಗ್ನೇ॑ ದೂ॒ತೋ ವಿ॒ಶಾಮ॑ಸಿ । ತ್ವೇ ವಿಶ್ವಾ॒ ಸಂಗ॑ತಾನಿ ವ್ರ॒ತಾ ಧ್ರು॒ವಾ ಯಾನಿ॑ ದೇ॒ವಾ ಅಕೃ॑ಣ್ವತ ॥

मं॒द्रो होता॑ गृ॒हप॑ति॒रग्ने॑ दू॒तो वि॒शाम॑सि । त्वे विश्वा॒ संग॑तानि व्र॒ता ध्रु॒वा यानि॑ दे॒वा अकृ॑ण्वत ॥

ತ್ವೇ ಇದ॑ಗ್ನೇ ಸು॒ಭಗೇ॑ ಯವಿಷ್ಠ್ಯ॒ ವಿಶ್ವ॒ಮಾ ಹೂ॑ಯತೇ ಹ॒ವಿಃ । ಸ ತ್ವಂ ನೋ॑ ಅ॒ದ್ಯ ಸು॒ಮನಾ॑ ಉ॒ತಾಪ॒ರಂ ಯಕ್ಷಿ॑ ದೇ॒ವಾನ್ತ್ಸು॒ವೀರ್ಯಾ॑ ॥

त्वे इद॑ग्ने सु॒भगे॑ यविष्ठ्य॒ विश्व॒मा हू॑यते ह॒विः । स त्वं नो॑ अ॒द्य सु॒मना॑ उ॒ताप॒रं यक्षि॑ दे॒वान्त्सु॒वीर्या॑ ॥

ತಂ ಘೇ॑ಮಿ॒ತ್ಥಾ ನ॑ಮ॒ಸ್ವಿನ॒ ಉಪ॑ ಸ್ವ॒ರಾಜ॑ಮಾಸತೇ । ಹೋತ್ರಾ॑ಭಿರ॒ಗ್ನಿಂ ಮನು॑ಷಃ॒ ಸಮಿಂ॑ಧತೇ ತಿತಿ॒ರ್ವಾಂಸೋ॒ ಅತಿ॒ ಸ್ರಿಧಃ॑ ॥

तं घे॑मि॒त्था न॑म॒स्विन॒ उप॑ स्व॒राज॑मासते । होत्रा॑भिर॒ग्निं मनु॑षः॒ समिं॑धते तिति॒र्वांसो॒ अति॒ स्रिधः॑ ॥

ಘ್ನಂತೋ॑ ವೃ॒ತ್ರಮ॑ತರ॒ನ್ರೋದ॑ಸೀ ಅ॒ಪ ಉ॒ರು ಕ್ಷಯಾ॑ಯ ಚಕ್ರಿರೇ । ಭುವ॒ತ್ಕಣ್ವೇ॒ ವೃಷಾ॑ ದ್ಯು॒ಮ್ನ್ಯಾಹು॑ತಃ॒ ಕ್ರಂದ॒ದಶ್ವೋ॒ ಗವಿ॑ಷ್ಟಿಷು ॥

घ्नंतो॑ वृ॒त्रम॑तर॒न्रोद॑सी अ॒प उ॒रु क्षया॑य चक्रिरे । भुव॒त्कण्वे॒ वृषा॑ द्यु॒म्न्याहु॑तः॒ क्रंद॒दश्वो॒ गवि॑ष्टिषु ॥

ಸಂ ಸೀ॑ದಸ್ವ ಮ॒ಹಾಁ ಅ॑ಸಿ॒ ಶೋಚ॑ಸ್ವ ದೇವ॒ವೀತ॑ಮಃ । ವಿ ಧೂ॒ಮಮ॑ಗ್ನೇ ಅರು॒ಷಂ ಮಿ॑ಯೇಧ್ಯ ಸೃ॒ಜ ಪ್ರ॑ಶಸ್ತ ದರ್ಶ॒ತಂ ॥

सं सी॑दस्व म॒हाँ अ॑सि॒ शोच॑स्व देव॒वीत॑मः । वि धू॒मम॑ग्ने अरु॒षं मि॑येध्य सृ॒ज प्र॑शस्त दर्श॒तं ॥

ಯಂ ತ್ವಾ॑ ದೇ॒ವಾಸೋ॒ ಮನ॑ವೇ ದ॒ಧುರಿ॒ಹ ಯಜಿ॑ಷ್ಠಂ ಹವ್ಯವಾಹನ । ಯಂ ಕಣ್ವೋ॒ ಮೇಧ್ಯಾ॑ತಿಥಿರ್ಧನ॒ಸ್ಪೃತಂ॒ ಯಂ ವೃಷಾ॒ ಯಮು॑ಪಸ್ತು॒ತಃ ॥

यं त्वा॑ दे॒वासो॒ मन॑वे द॒धुरि॒ह यजि॑ष्ठं हव्यवाहन । यं कण्वो॒ मेध्या॑तिथिर्धन॒स्पृतं॒ यं वृषा॒ यमु॑पस्तु॒तः ॥

ಯಮ॒ಗ್ನಿಂ ಮೇಧ್ಯಾ॑ತಿಥಿಃ॒ ಕಣ್ವ॑ ಈ॒ಧ ಋ॒ತಾದಧಿ॑ । ತಸ್ಯ॒ ಪ್ರೇಷೋ॑ ದೀದಿಯು॒ಸ್ತಮಿ॒ಮಾ ಋಚ॒ಸ್ತಮ॒ಗ್ನಿಂ ವ॑ರ್ಧಯಾಮಸಿ ॥

यम॒ग्निं मेध्या॑तिथिः॒ कण्व॑ ई॒ध ऋ॒तादधि॑ । तस्य॒ प्रेषो॑ दीदियु॒स्तमि॒मा ऋच॒स्तम॒ग्निं व॑र्धयामसि ॥

ರಾ॒ಯಸ್ಪೂ॑ರ್ಧಿ ಸ್ವಧಾ॒ವೋಽಸ್ತಿ॒ ಹಿ ತೇಽಗ್ನೇ॑ ದೇ॒ವೇಷ್ವಾಪ್ಯಂ॑ । ತ್ವಂ ವಾಜ॑ಸ್ಯ॒ ಶ್ರುತ್ಯ॑ಸ್ಯ ರಾಜಸಿ॒ ಸ ನೋ॑ ಮೃಳ ಮ॒ಹಾಁ ಅ॑ಸಿ ॥

रा॒यस्पू॑र्धि स्वधा॒वोऽस्ति॒ हि तेऽग्ने॑ दे॒वेष्वाप्यं॑ । त्वं वाज॑स्य॒ श्रुत्य॑स्य राजसि॒ स नो॑ मृळ म॒हाँ अ॑सि ॥

ಊ॒ರ್ಧ್ವ ಊ॒ ಷು ಣ॑ ಊ॒ತಯೇ॒ ತಿಷ್ಠಾ॑ ದೇ॒ವೋ ನ ಸ॑ವಿ॒ತಾ । ಊ॒ರ್ಧ್ವೋ ವಾಜ॑ಸ್ಯ॒ ಸನಿ॑ತಾ॒ ಯದಂ॒ಜಿಭಿ॑ರ್ವಾ॒ಘದ್ಭಿ॑ರ್ವಿ॒ಹ್ವಯಾ॑ಮಹೇ ॥

ऊ॒र्ध्व ऊ॒ षु ण॑ ऊ॒तये॒ तिष्ठा॑ दे॒वो न स॑वि॒ता । ऊ॒र्ध्वो वाज॑स्य॒ सनि॑ता॒ यदं॒जिभि॑र्वा॒घद्भि॑र्वि॒ह्वया॑महे ॥

ಊ॒ರ್ಧ್ವೋ ನಃ॑ ಪಾ॒ಹ್ಯಂಹ॑ಸೋ॒ ನಿ ಕೇ॒ತುನಾ॒ ವಿಶ್ವಂ॒ ಸಮ॒ತ್ರಿಣಂ॑ ದಹ । ಕೃ॒ಧೀ ನ॑ ಊ॒ರ್ಧ್ವಾಞ್ಚ॒ರಥಾ॑ಯ ಜೀ॒ವಸೇ॑ ವಿ॒ದಾ ದೇ॒ವೇಷು॑ ನೋ॒ ದುವಃ॑ ॥

ऊ॒र्ध्वो नः॑ पा॒ह्यंह॑सो॒ नि के॒तुना॒ विश्वं॒ सम॒त्रिणं॑ दह । कृ॒धी न॑ ऊ॒र्ध्वाञ्च॒रथा॑य जी॒वसे॑ वि॒दा दे॒वेषु॑ नो॒ दुवः॑ ॥

ಪಾ॒ಹಿ ನೋ॑ ಅಗ್ನೇ ರ॒ಕ್ಷಸಃ॑ ಪಾ॒ಹಿ ಧೂ॒ರ್ತೇರರಾ॑ವ್ಣಃ । ಪಾ॒ಹಿ ರೀಷ॑ತ ಉ॒ತ ವಾ॒ ಜಿಘಾಂ॑ಸತೋ॒ ಬೃಹ॑ದ್ಭಾನೋ॒ ಯವಿ॑ಷ್ಠ್ಯ ॥

पा॒हि नो॑ अग्ने र॒क्षसः॑ पा॒हि धू॒र्तेररा॑व्णः । पा॒हि रीष॑त उ॒त वा॒ जिघां॑सतो॒ बृह॑द्भानो॒ यवि॑ष्ठ्य ॥

ಘ॒ನೇವ॒ ವಿಷ್ವ॒ಗ್ವಿ ಜ॒ಹ್ಯರಾ॑ವ್ಣ॒ಸ್ತಪು॑ರ್ಜಂಭ॒ ಯೋ ಅ॑ಸ್ಮ॒ಧ್ರುಕ್ । ಯೋ ಮರ್ತ್ಯಃ॒ ಶಿಶೀ॑ತೇ॒ ಅತ್ಯ॒ಕ್ತುಭಿ॒ರ್ಮಾ ನಃ॒ ಸ ರಿ॒ಪುರೀ॑ಶತ ॥

घ॒नेव॒ विष्व॒ग्वि ज॒ह्यरा॑व्ण॒स्तपु॑र्जंभ॒ यो अ॑स्म॒ध्रुक् । यो मर्त्यः॒ शिशी॑ते॒ अत्य॒क्तुभि॒र्मा नः॒ स रि॒पुरी॑शत ॥

ಅ॒ಗ್ನಿರ್ವ॑ವ್ನೇ ಸು॒ವೀರ್ಯ॑ಮ॒ಗ್ನಿಃ ಕಣ್ವಾ॑ಯ॒ ಸೌಭ॑ಗಂ । ಅ॒ಗ್ನಿಃ ಪ್ರಾವ॑ನ್ಮಿ॒ತ್ರೋತ ಮೇಧ್ಯಾ॑ತಿಥಿಮ॒ಗ್ನಿಃ ಸಾ॒ತಾ ಉ॑ಪಸ್ತು॒ತಂ ॥

अ॒ग्निर्व॑व्ने सु॒वीर्य॑म॒ग्निः कण्वा॑य॒ सौभ॑गं । अ॒ग्निः प्राव॑न्मि॒त्रोत मेध्या॑तिथिम॒ग्निः सा॒ता उ॑पस्तु॒तं ॥

ಅ॒ಗ್ನಿನಾ॑ ತು॒ರ್ವಶಂ॒ ಯದುಂ॑ ಪರಾ॒ವತ॑ ಉ॒ಗ್ರಾದೇ॑ವಂ ಹವಾಮಹೇ । ಅ॒ಗ್ನಿರ್ನ॑ಯ॒ನ್ನವ॑ವಾಸ್ತ್ವಂ ಬೃ॒ಹದ್ರ॑ಥಂ ತು॒ರ್ವೀತಿಂ॒ ದಸ್ಯ॑ವೇ॒ ಸಹಃ॑ ॥

अ॒ग्निना॑ तु॒र्वशं॒ यदुं॑ परा॒वत॑ उ॒ग्रादे॑वं हवामहे । अ॒ग्निर्न॑य॒न्नव॑वास्त्वं बृ॒हद्र॑थं तु॒र्वीतिं॒ दस्य॑वे॒ सहः॑ ॥

ನಿ ತ್ವಾಮ॑ಗ್ನೇ॒ ಮನು॑ರ್ದಧೇ॒ ಜ್ಯೋತಿ॒ರ್ಜನಾ॑ಯ॒ ಶಶ್ವ॑ತೇ । ದೀ॒ದೇಥ॒ ಕಣ್ವ॑ ಋ॒ತಜಾ॑ತ ಉಕ್ಷಿ॒ತೋ ಯಂ ನ॑ಮ॒ಸ್ಯಂತಿ॑ ಕೃ॒ಷ್ಟಯಃ॑ ॥

नि त्वाम॑ग्ने॒ मनु॑र्दधे॒ ज्योति॒र्जना॑य॒ शश्व॑ते । दी॒देथ॒ कण्व॑ ऋ॒तजा॑त उक्षि॒तो यं न॑म॒स्यंति॑ कृ॒ष्टयः॑ ॥

ತ್ವೇ॒ಷಾಸೋ॑ ಅ॒ಗ್ನೇರಮ॑ವಂತೋ ಅ॒ರ್ಚಯೋ॑ ಭೀ॒ಮಾಸೋ॒ ನ ಪ್ರತೀ॑ತಯೇ । ರ॒ಕ್ಷ॒ಸ್ವಿನಃ॒ ಸದ॒ಮಿದ್ಯಾ॑ತು॒ಮಾವ॑ತೋ॒ ವಿಶ್ವಂ॒ ಸಮ॒ತ್ರಿಣಂ॑ ದಹ ॥

त्वे॒षासो॑ अ॒ग्नेरम॑वंतो अ॒र्चयो॑ भी॒मासो॒ न प्रती॑तये । र॒क्ष॒स्विनः॒ सद॒मिद्या॑तु॒माव॑तो॒ विश्वं॒ सम॒त्रिणं॑ दह ॥