ಇಂದ್ರನ ವಿಜಯಗಳು ಮತ್ತು ದೈಹಿಕ ಹಾಗೂ ಆಧ್ಯಾತ್ಮಿಕ ಶತ್ರುಗಳ ನಿರ್ಮೂಲನೆ

ಏತಾಯಾ॒ಮೋಪ॑ ಗ॒ವ್ಯಂತ॒ ಇಂದ್ರ॑ಮ॒ಸ್ಮಾಕಂ॒ ಸು ಪ್ರಮ॑ತಿಂ ವಾವೃಧಾತಿ । ಅ॒ನಾ॒ಮೃ॒ಣಃ ಕು॒ವಿದಾದ॒ಸ್ಯ ರಾ॒ಯೋ ಗವಾಂ॒ ಕೇತಂ॒ ಪರ॑ಮಾ॒ವರ್ಜ॑ತೇ ನಃ ॥

एताया॒मोप॑ ग॒व्यंत॒ इंद्र॑म॒स्माकं॒ सु प्रम॑तिं वावृधाति । अ॒ना॒मृ॒णः कु॒विदाद॒स्य रा॒यो गवां॒ केतं॒ पर॑मा॒वर्ज॑ते नः ॥

ಉಪೇದ॒ಹಂ ಧ॑ನ॒ದಾಮಪ್ರ॑ತೀತಂ॒ ಜುಷ್ಟಾಂ॒ ನ ಶ್ಯೇ॒ನೋ ವ॑ಸ॒ತಿಂ ಪ॑ತಾಮಿ । ಇಂದ್ರಂ॑ ನಮ॒ಸ್ಯನ್ನು॑ಪ॒ಮೇಭಿ॑ರ॒ರ್ಕೈರ್ಯಃ ಸ್ತೋ॒ತೃಭ್ಯೋ॒ ಹವ್ಯೋ॒ ಅಸ್ತಿ॒ ಯಾಮ॑ನ್ ॥

उपेद॒हं ध॑न॒दामप्र॑तीतं॒ जुष्टां॒ न श्ये॒नो व॑स॒तिं प॑तामि । इंद्रं॑ नम॒स्यन्नु॑प॒मेभि॑र॒र्कैर्यः स्तो॒तृभ्यो॒ हव्यो॒ अस्ति॒ याम॑न् ॥

ನಿ ಸರ್ವ॑ಸೇನ ಇಷು॒ಧೀಁರ॑ಸಕ್ತ॒ ಸಮ॒ರ್ಯೋ ಗಾ ಅ॑ಜತಿ॒ ಯಸ್ಯ॒ ವಷ್ಟಿ॑ । ಚೋ॒ಷ್ಕೂ॒ಯಮಾ॑ಣ ಇಂದ್ರ॒ ಭೂರಿ॑ ವಾ॒ಮಂ ಮಾ ಪ॒ಣಿರ್ಭೂ॑ರ॒ಸ್ಮದಧಿ॑ ಪ್ರವೃದ್ಧ ॥

नि सर्व॑सेन इषु॒धीँर॑सक्त॒ सम॒र्यो गा अ॑जति॒ यस्य॒ वष्टि॑ । चो॒ष्कू॒यमा॑ण इंद्र॒ भूरि॑ वा॒मं मा प॒णिर्भू॑र॒स्मदधि॑ प्रवृद्ध ॥

ವಧೀ॒ರ್ಹಿ ದಸ್ಯುಂ॑ ಧ॒ನಿನಂ॑ ಘ॒ನೇನಁ॒ ಏಕ॒ಶ್ಚರ॑ನ್ನುಪಶಾ॒ಕೇಭಿ॑ರಿಂದ್ರ । ಧನೋ॒ರಧಿ॑ ವಿಷು॒ಣಕ್ತೇ ವ್ಯಾ॑ಯ॒ನ್ನಯ॑ಜ್ವಾನಃ ಸನ॒ಕಾಃ ಪ್ರೇತಿ॑ಮೀಯುಃ ॥

वधी॒र्हि दस्युं॑ ध॒निनं॑ घ॒नेनँ॒ एक॒श्चर॑न्नुपशा॒केभि॑रिंद्र । धनो॒रधि॑ विषु॒णक्ते व्या॑य॒न्नय॑ज्वानः सन॒काः प्रेति॑मीयुः ॥

ಪರಾ॑ ಚಿಚ್ಛೀ॒ರ್ಷಾ ವ॑ವೃಜು॒ಸ್ತ ಇಂ॒ದ್ರಾಯ॑ಜ್ವಾನೋ॒ ಯಜ್ವ॑ಭಿಃ॒ ಸ್ಪರ್ಧ॑ಮಾನಾಃ । ಪ್ರ ಯದ್ದಿ॒ವೋ ಹ॑ರಿವಃ ಸ್ಥಾತರುಗ್ರ॒ ನಿರ॑ವ್ರ॒ತಾಁ ಅ॑ಧಮೋ॒ ರೋದ॑ಸ್ಯೋಃ ॥

परा॑ चिच्छी॒र्षा व॑वृजु॒स्त इं॒द्राय॑ज्वानो॒ यज्व॑भिः॒ स्पर्ध॑मानाः । प्र यद्दि॒वो ह॑रिवः स्थातरुग्र॒ निर॑व्र॒ताँ अ॑धमो॒ रोद॑स्योः ॥

ಅಯು॑ಯುತ್ಸನ್ನನವ॒ದ್ಯಸ್ಯ॒ ಸೇನಾ॒ಮಯಾ॑ತಯಂತ ಕ್ಷಿ॒ತಯೋ॒ ನವ॑ಗ್ವಾಃ । ವೃ॒ಷಾ॒ಯುಧೋ॒ ನ ವಧ್ರ॑ಯೋ॒ ನಿರ॑ಷ್ಟಾಃ ಪ್ರ॒ವದ್ಭಿ॒ರಿಂದ್ರಾ॑ಚ್ಚಿ॒ತಯಂ॑ತ ಆಯನ್ ॥

अयु॑युत्सन्ननव॒द्यस्य॒ सेना॒मया॑तयंत क्षि॒तयो॒ नव॑ग्वाः । वृ॒षा॒युधो॒ न वध्र॑यो॒ निर॑ष्टाः प्र॒वद्भि॒रिंद्रा॑च्चि॒तयं॑त आयन् ॥

ತ್ವಮೇ॒ತಾನ್ರು॑ದ॒ತೋ ಜಕ್ಷ॑ತ॒ಶ್ಚಾಯೋ॑ಧಯೋ॒ ರಜ॑ಸ ಇಂದ್ರ ಪಾ॒ರೇ । ಅವಾ॑ದಹೋ ದಿ॒ವ ಆ ದಸ್ಯು॑ಮು॒ಚ್ಚಾ ಪ್ರ ಸು॑ನ್ವ॒ತಃ ಸ್ತು॑ವ॒ತಃ ಶಂಸ॑ಮಾವಃ ॥

त्वमे॒तान्रु॑द॒तो जक्ष॑त॒श्चायो॑धयो॒ रज॑स इंद्र पा॒रे । अवा॑दहो दि॒व आ दस्यु॑मु॒च्चा प्र सु॑न्व॒तः स्तु॑व॒तः शंस॑मावः ॥

ಚ॒ಕ್ರಾ॒ಣಾಸಃ॑ ಪರೀ॒ಣಹಂ॑ ಪೃಥಿ॒ವ್ಯಾ ಹಿರ॑ಣ್ಯೇನ ಮ॒ಣಿನಾ॒ ಶುಂಭ॑ಮಾನಾಃ । ನ ಹಿ॑ನ್ವಾ॒ನಾಸ॑ಸ್ತಿತಿರು॒ಸ್ತ ಇಂದ್ರಂ॒ ಪರಿ॒ ಸ್ಪಶೋ॑ ಅದಧಾ॒ತ್ಸೂರ್ಯೇ॑ಣ ॥

च॒क्रा॒णासः॑ परी॒णहं॑ पृथि॒व्या हिर॑ण्येन म॒णिना॒ शुंभ॑मानाः । न हि॑न्वा॒नास॑स्तितिरु॒स्त इंद्रं॒ परि॒ स्पशो॑ अदधा॒त्सूर्ये॑ण ॥

ಪರಿ॒ ಯದಿಂ॑ದ್ರ॒ ರೋದ॑ಸೀ ಉ॒ಭೇ ಅಬು॑ಭೋಜೀರ್ಮಹಿ॒ನಾ ವಿ॒ಶ್ವತಃ॑ ಸೀಂ । ಅಮ॑ನ್ಯಮಾನಾಁ ಅ॒ಭಿ ಮನ್ಯ॑ಮಾನೈ॒ರ್ನಿರ್ಬ್ರ॒ಹ್ಮಭಿ॑ರಧಮೋ॒ ದಸ್ಯು॑ಮಿಂದ್ರ ॥

परि॒ यदिं॑द्र॒ रोद॑सी उ॒भे अबु॑भोजीर्महि॒ना वि॒श्वतः॑ सीं । अम॑न्यमानाँ अ॒भि मन्य॑मानै॒र्निर्ब्र॒ह्मभि॑रधमो॒ दस्यु॑मिंद्र ॥

ನ ಯೇ ದಿ॒ವಃ ಪೃ॑ಥಿ॒ವ್ಯಾ ಅಂತ॑ಮಾ॒ಪುರ್ನ ಮಾ॒ಯಾಭಿ॑ರ್ಧನ॒ದಾಂ ಪ॒ರ್ಯಭೂ॑ವನ್ । ಯುಜಂ॒ ವಜ್ರಂ॑ ವೃಷ॒ಭಶ್ಚ॑ಕ್ರ॒ ಇಂದ್ರೋ॒ ನಿರ್ಜ್ಯೋತಿ॑ಷಾ॒ ತಮ॑ಸೋ॒ ಗಾ ಅ॑ದುಕ್ಷತ್ ॥

न ये दि॒वः पृ॑थि॒व्या अंत॑मा॒पुर्न मा॒याभि॑र्धन॒दां प॒र्यभू॑वन् । युजं॒ वज्रं॑ वृष॒भश्च॑क्र॒ इंद्रो॒ निर्ज्योति॑षा॒ तम॑सो॒ गा अ॑दुक्षत् ॥

ಅನು॑ ಸ್ವ॒ಧಾಮ॑ಕ್ಷರ॒ನ್ನಾಪೋ॑ ಅ॒ಸ್ಯಾವ॑ರ್ಧತ॒ ಮಧ್ಯ॒ ಆ ನಾ॒ವ್ಯಾ॑ನಾಂ । ಸ॒ಧ್ರೀ॒ಚೀನೇ॑ನ॒ ಮನ॑ಸಾ॒ ತಮಿಂದ್ರ॒ ಓಜಿ॑ಷ್ಠೇನ॒ ಹನ್ಮ॑ನಾಹನ್ನ॒ಭಿ ದ್ಯೂನ್ ॥

अनु॑ स्व॒धाम॑क्षर॒न्नापो॑ अ॒स्याव॑र्धत॒ मध्य॒ आ ना॒व्या॑नां । स॒ध्री॒चीने॑न॒ मन॑सा॒ तमिंद्र॒ ओजि॑ष्ठेन॒ हन्म॑नाहन्न॒भि द्यून् ॥

ನ್ಯಾ॑ವಿಧ್ಯದಿಲೀ॒ಬಿಶ॑ಸ್ಯ ದೃ॒ಳ್ಹಾ ವಿ ಶೃಂ॒ಗಿಣ॑ಮಭಿನ॒ಚ್ಛುಷ್ಣ॒ಮಿಂದ್ರಃ॑ । ಯಾವ॒ತ್ತರೋ॑ ಮಘವ॒ನ್ಯಾವ॒ದೋಜೋ॒ ವಜ್ರೇ॑ಣ॒ ಶತ್ರು॑ಮವಧೀಃ ಪೃತ॒ನ್ಯುಂ ॥

न्या॑विध्यदिली॒बिश॑स्य दृ॒ळ्हा वि शृं॒गिण॑मभिन॒च्छुष्ण॒मिंद्रः॑ । याव॒त्तरो॑ मघव॒न्याव॒दोजो॒ वज्रे॑ण॒ शत्रु॑मवधीः पृत॒न्युं ॥

ಅ॒ಭಿ ಸಿ॒ಧ್ಮೋ ಅ॑ಜಿಗಾದಸ್ಯ॒ ಶತ್ರೂ॒ನ್ವಿ ತಿ॒ಗ್ಮೇನ॑ ವೃಷ॒ಭೇಣಾ॒ ಪುರೋ॑ಽಭೇತ್ । ಸಂ ವಜ್ರೇ॑ಣಾಸೃಜದ್ವೃ॒ತ್ರಮಿಂದ್ರಃ॒ ಪ್ರ ಸ್ವಾಂ ಮ॒ತಿಮ॑ತಿರ॒ಚ್ಛಾಶ॑ದಾನಃ ॥

अ॒भि सि॒ध्मो अ॑जिगादस्य॒ शत्रू॒न्वि ति॒ग्मेन॑ वृष॒भेणा॒ पुरो॑ऽभेत् । सं वज्रे॑णासृजद्वृ॒त्रमिंद्रः॒ प्र स्वां म॒तिम॑तिर॒च्छाश॑दानः ॥

ಆವಃ॒ ಕುತ್ಸ॑ಮಿಂದ್ರ॒ ಯಸ್ಮಿ॑ಞ್ಚಾ॒ಕನ್ಪ್ರಾವೋ॒ ಯುಧ್ಯಂ॑ತಂ ವೃಷ॒ಭಂ ದಶ॑ದ್ಯುಂ । ಶ॒ಫಚ್ಯು॑ತೋ ರೇ॒ಣುರ್ನ॑ಕ್ಷತ॒ ದ್ಯಾಮುಚ್ಛ್ವೈ॑ತ್ರೇ॒ಯೋ ನೃ॒ಷಾಹ್ಯಾ॑ಯ ತಸ್ಥೌ ॥

आवः॒ कुत्स॑मिंद्र॒ यस्मि॑ञ्चा॒कन्प्रावो॒ युध्यं॑तं वृष॒भं दश॑द्युं । श॒फच्यु॑तो रे॒णुर्न॑क्षत॒ द्यामुच्छ्वै॑त्रे॒यो नृ॒षाह्या॑य तस्थौ ॥

ಆವಃ॒ ಶಮಂ॑ ವೃಷ॒ಭಂ ತುಗ್ರ್ಯಾ॑ಸು ಕ್ಷೇತ್ರಜೇ॒ಷೇ ಮ॑ಘವ॒ಞ್ಛ್ವಿತ್ರ್ಯಂ॒ ಗಾಂ । ಜ್ಯೋಕ್ ಚಿ॒ದತ್ರ॑ ತಸ್ಥಿ॒ವಾಂಸೋ॑ ಅಕ್ರಞ್ಛತ್ರೂಯ॒ತಾಮಧ॑ರಾ॒ ವೇದ॑ನಾಕಃ ॥

आवः॒ शमं॑ वृष॒भं तुग्र्या॑सु क्षेत्रजे॒षे म॑घव॒ञ्छ्वित्र्यं॒ गां । ज्योक् चि॒दत्र॑ तस्थि॒वांसो॑ अक्रञ्छत्रूय॒तामध॑रा॒ वेद॑नाकः ॥