ಇಂದ್ರ ಮತ್ತು ವೃತ್ರಾಸುರನ ಕಾಳಗ: ಬೆಳಕು ಮತ್ತು ನೀರಿನ ಮುಕ್ತಿ

ಇಂದ್ರ॑ಸ್ಯ॒ ನು ವೀ॒ರ್ಯಾ॑ಣಿ॒ ಪ್ರ ವೋ॑ಚಂ॒ ಯಾನಿ॑ ಚ॒ಕಾರ॑ ಪ್ರಥ॒ಮಾನಿ॑ ವ॒ಜ್ರೀ । ಅಹ॒ನ್ನಹಿ॒ಮನ್ವ॒ಪಸ್ತ॑ತರ್ದ॒ ಪ್ರ ವ॒ಕ್ಷಣಾ॑ ಅಭಿನ॒ತ್ಪರ್ವ॑ತಾನಾಂ ॥

इंद्र॑स्य॒ नु वी॒र्या॑णि॒ प्र वो॑चं॒ यानि॑ च॒कार॑ प्रथ॒मानि॑ व॒ज्री । अह॒न्नहि॒मन्व॒पस्त॑तर्द॒ प्र व॒क्षणा॑ अभिन॒त्पर्व॑तानां ॥

ಅಹ॒ನ್ನಹಿಂ॒ ಪರ್ವ॑ತೇ ಶಿಶ್ರಿಯಾ॒ಣಂ ತ್ವಷ್ಟಾ॑ಸ್ಮೈ॒ ವಜ್ರಂ॑ ಸ್ವ॒ರ್ಯಂ॑ ತತಕ್ಷ । ವಾ॒ಶ್ರಾ ಇ॑ವ ಧೇ॒ನವಃ॒ ಸ್ಯಂದ॑ಮಾನಾ॒ ಅಂಜಃ॑ ಸಮು॒ದ್ರಮವ॑ ಜಗ್ಮು॒ರಾಪಃ॑ ॥

अह॒न्नहिं॒ पर्व॑ते शिश्रिया॒णं त्वष्टा॑स्मै॒ वज्रं॑ स्व॒र्यं॑ ततक्ष । वा॒श्रा इ॑व धे॒नवः॒ स्यंद॑माना॒ अंजः॑ समु॒द्रमव॑ जग्मु॒रापः॑ ॥

ವೃ॒ಷಾ॒ಯಮಾ॑ಣೋಽವೃಣೀತ॒ ಸೋಮಂ॒ ತ್ರಿಕ॑ದ್ರುಕೇಷ್ವಪಿಬತ್ಸು॒ತಸ್ಯ॑ । ಆ ಸಾಯ॑ಕಂ ಮ॒ಘವಾ॑ದತ್ತ॒ ವಜ್ರ॒ಮಹ॑ನ್ನೇನಂ ಪ್ರಥಮ॒ಜಾಮಹೀ॑ನಾಂ ॥

वृ॒षा॒यमा॑णोऽवृणीत॒ सोमं॒ त्रिक॑द्रुकेष्वपिबत्सु॒तस्य॑ । आ साय॑कं म॒घवा॑दत्त॒ वज्र॒मह॑न्नेनं प्रथम॒जामही॑नां ॥

ಯದಿಂ॒ದ್ರಾಹ॑ನ್ಪ್ರಥಮ॒ಜಾಮಹೀ॑ನಾ॒ಮಾನ್ಮಾ॒ಯಿನಾ॒ಮಮಿ॑ನಾಃ॒ ಪ್ರೋತ ಮಾ॒ಯಾಃ । ಆತ್ಸೂರ್ಯಂ॑ ಜ॒ನಯ॒ನ್ದ್ಯಾಮು॒ಷಾಸಂ॑ ತಾ॒ದೀತ್ನಾ॒ ಶತ್ರುಂ॒ ನ ಕಿಲಾ॑ ವಿವಿತ್ಸೇ ॥

यदिं॒द्राह॑न्प्रथम॒जामही॑ना॒मान्मा॒यिना॒ममि॑नाः॒ प्रोत मा॒याः । आत्सूर्यं॑ ज॒नय॒न्द्यामु॒षासं॑ ता॒दीत्ना॒ शत्रुं॒ न किला॑ विवित्से ॥

ಅಹ॑ನ್ವೃ॒ತ್ರಂ ವೃ॑ತ್ರ॒ತರಂ॒ ವ್ಯಂ॑ಸ॒ಮಿಂದ್ರೋ॒ ವಜ್ರೇ॑ಣ ಮಹ॒ತಾ ವ॒ಧೇನ॑ । ಸ್ಕಂಧಾಂ॑ಸೀವ॒ ಕುಲಿ॑ಶೇನಾ॒ ವಿವೃ॒ಕ್ಣಾಹಿಃ॑ ಶಯತ ಉಪ॒ಪೃಕ್ಪೃ॑ಥಿ॒ವ್ಯಾಃ ॥

अह॑न्वृ॒त्रं वृ॑त्र॒तरं॒ व्यं॑स॒मिंद्रो॒ वज्रे॑ण मह॒ता व॒धेन॑ । स्कंधां॑सीव॒ कुलि॑शेना॒ विवृ॒क्णाहिः॑ शयत उप॒पृक्पृ॑थि॒व्याः ॥

ಅ॒ಯೋ॒ದ್ಧೇವ॑ ದು॒ರ್ಮದ॒ ಆ ಹಿ ಜು॒ಹ್ವೇ ಮ॑ಹಾವೀ॒ರಂ ತು॑ವಿಬಾ॒ಧಮೃ॑ಜೀ॒ಷಂ । ನಾತಾ॑ರೀದಸ್ಯ॒ ಸಮೃ॑ತಿಂ ವ॒ಧಾನಾಂ॒ ಸಂ ರು॒ಜಾನಾಃ॑ ಪಿಪಿಷ॒ ಇಂದ್ರ॑ಶತ್ರುಃ ॥

अ॒यो॒द्धेव॑ दु॒र्मद॒ आ हि जु॒ह्वे म॑हावी॒रं तु॑विबा॒धमृ॑जी॒षं । नाता॑रीदस्य॒ समृ॑तिं व॒धानां॒ सं रु॒जानाः॑ पिपिष॒ इंद्र॑शत्रुः ॥

ಅ॒ಪಾದ॑ಹ॒ಸ್ತೋ ಅ॑ಪೃತನ್ಯ॒ದಿಂದ್ರ॒ಮಾಸ್ಯ॒ ವಜ್ರ॒ಮಧಿ॒ ಸಾನೌ॑ ಜಘಾನ । ವೃಷ್ಣೋ॒ ವಧ್ರಿಃ॑ ಪ್ರತಿ॒ಮಾನಂ॒ ಬುಭೂ॑ಷನ್ಪುರು॒ತ್ರಾ ವೃ॒ತ್ರೋ ಅ॑ಶಯ॒ದ್ವ್ಯ॑ಸ್ತಃ ॥

अ॒पाद॑ह॒स्तो अ॑पृतन्य॒दिंद्र॒मास्य॒ वज्र॒मधि॒ सानौ॑ जघान । वृष्णो॒ वध्रिः॑ प्रति॒मानं॒ बुभू॑षन्पुरु॒त्रा वृ॒त्रो अ॑शय॒द्व्य॑स्तः ॥

ನ॒ದಂ ನ ಭಿ॒ನ್ನಮ॑ಮು॒ಯಾ ಶಯಾ॑ನಂ॒ ಮನೋ॒ ರುಹಾ॑ಣಾ॒ ಅತಿ॑ ಯಂ॒ತ್ಯಾಪಃ॑ । ಯಾಶ್ಚಿ॑ದ್ವೃ॒ತ್ರೋ ಮ॑ಹಿ॒ನಾ ಪ॒ರ್ಯತಿ॑ಷ್ಠ॒ತ್ತಾಸಾ॒ಮಹಿಃ॑ ಪತ್ಸುತಃ॒ಶೀರ್ಬ॑ಭೂವ ॥

न॒दं न भि॒न्नम॑मु॒या शया॑नं॒ मनो॒ रुहा॑णा॒ अति॑ यं॒त्यापः॑ । याश्चि॑द्वृ॒त्रो म॑हि॒ना प॒र्यति॑ष्ठ॒त्तासा॒महिः॑ पत्सुतः॒शीर्ब॑भूव ॥

ನೀ॒ಚಾವ॑ಯಾ ಅಭವದ್ವೃ॒ತ್ರಪು॒ತ್ರೇಂದ್ರೋ॑ ಅಸ್ಯಾ॒ ಅವ॒ ವಧ॑ರ್ಜಭಾರ । ಉತ್ತ॑ರಾ॒ ಸೂರಧ॑ರಃ ಪು॒ತ್ರ ಆ॑ಸೀ॒ದ್ದಾನುಃ॑ ಶಯೇ ಸ॒ಹವ॑ತ್ಸಾ॒ ನ ಧೇ॒ನುಃ ॥

नी॒चाव॑या अभवद्वृ॒त्रपु॒त्रेंद्रो॑ अस्या॒ अव॒ वध॑र्जभार । उत्त॑रा॒ सूरध॑रः पु॒त्र आ॑सी॒द्दानुः॑ शये स॒हव॑त्सा॒ न धे॒नुः ॥

ಅತಿ॑ಷ್ಠಂತೀನಾಮನಿವೇಶ॒ನಾನಾಂ॒ ಕಾಷ್ಠಾ॑ನಾಂ॒ ಮಧ್ಯೇ॒ ನಿಹಿ॑ತಂ॒ ಶರೀ॑ರಂ । ವೃ॒ತ್ರಸ್ಯ॑ ನಿ॒ಣ್ಯಂ ವಿ ಚ॑ರಂ॒ತ್ಯಾಪೋ॑ ದೀ॒ರ್ಘಂ ತಮ॒ ಆಶ॑ಯ॒ದಿಂದ್ರ॑ಶತ್ರುಃ ॥

अति॑ष्ठंतीनामनिवेश॒नानां॒ काष्ठा॑नां॒ मध्ये॒ निहि॑तं॒ शरी॑रं । वृ॒त्रस्य॑ नि॒ण्यं वि च॑रं॒त्यापो॑ दी॒र्घं तम॒ आश॑य॒दिंद्र॑शत्रुः ॥

ದಾ॒ಸಪ॑ತ್ನೀ॒ರಹಿ॑ಗೋಪಾ ಅತಿಷ್ಠ॒ನ್ನಿರು॑ದ್ಧಾ॒ ಆಪಃ॑ ಪ॒ಣಿನೇ॑ವ॒ ಗಾವಃ॑ । ಅ॒ಪಾಂ ಬಿಲ॒ಮಪಿ॑ಹಿತಂ॒ ಯದಾಸೀ॑ದ್ವೃ॒ತ್ರಂ ಜ॑ಘ॒ನ್ವಾಁ ಅಪ॒ ತದ್ವ॑ವಾರ ॥

दा॒सप॑त्नी॒रहि॑गोपा अतिष्ठ॒न्निरु॑द्धा॒ आपः॑ प॒णिने॑व॒ गावः॑ । अ॒पां बिल॒मपि॑हितं॒ यदासी॑द्वृ॒त्रं ज॑घ॒न्वाँ अप॒ तद्व॑वार ॥

ಅಶ್ವ್ಯೋ॒ ವಾರೋ॑ ಅಭವ॒ಸ್ತದಿಂ॑ದ್ರ ಸೃ॒ಕೇ ಯತ್ತ್ವಾ॑ ಪ್ರ॒ತ್ಯಹ॑ನ್ದೇ॒ವ ಏಕಃ॑ । ಅಜ॑ಯೋ॒ ಗಾ ಅಜ॑ಯಃ ಶೂರ॒ ಸೋಮ॒ಮವಾ॑ಸೃಜಃ॒ ಸರ್ತ॑ವೇ ಸ॒ಪ್ತ ಸಿಂಧೂ॑ನ್ ॥

अश्व्यो॒ वारो॑ अभव॒स्तदिं॑द्र सृ॒के यत्त्वा॑ प्र॒त्यह॑न्दे॒व एकः॑ । अज॑यो॒ गा अज॑यः शूर॒ सोम॒मवा॑सृजः॒ सर्त॑वे स॒प्त सिंधू॑न् ॥

ನಾಸ್ಮೈ॑ ವಿ॒ದ್ಯುನ್ನ ತ॑ನ್ಯ॒ತುಃ ಸಿ॑ಷೇಧ॒ ನ ಯಾಂ ಮಿಹ॒ಮಕಿ॑ರದ್ಧ್ರಾ॒ದುನಿಂ॑ ಚ । ಇಂದ್ರ॑ಶ್ಚ॒ ಯದ್ಯು॑ಯು॒ಧಾತೇ॒ ಅಹಿ॑ಶ್ಚೋ॒ತಾಪ॒ರೀಭ್ಯೋ॑ ಮ॒ಘವಾ॒ ವಿ ಜಿ॑ಗ್ಯೇ ॥

नास्मै॑ वि॒द्युन्न त॑न्य॒तुः सि॑षेध॒ न यां मिह॒मकि॑रद्ध्रा॒दुनिं॑ च । इंद्र॑श्च॒ यद्यु॑यु॒धाते॒ अहि॑श्चो॒ताप॒रीभ्यो॑ म॒घवा॒ वि जि॑ग्ये ॥

ಅಹೇ॑ರ್ಯಾ॒ತಾರಂ॒ ಕಮ॑ಪಶ್ಯ ಇಂದ್ರ ಹೃ॒ದಿ ಯತ್ತೇ॑ ಜ॒ಘ್ನುಷೋ॒ ಭೀರಗ॑ಚ್ಛತ್ । ನವ॑ ಚ॒ ಯನ್ನ॑ವ॒ತಿಂ ಚ॒ ಸ್ರವಂ॑ತೀಃ ಶ್ಯೇ॒ನೋ ನ ಭೀ॒ತೋ ಅತ॑ರೋ॒ ರಜಾಂ॑ಸಿ ॥

अहे॑र्या॒तारं॒ कम॑पश्य इंद्र हृ॒दि यत्ते॑ ज॒घ्नुषो॒ भीरग॑च्छत् । नव॑ च॒ यन्न॑व॒तिं च॒ स्रवं॑तीः श्ये॒नो न भी॒तो अत॑रो॒ रजां॑सि ॥

ಇಂದ್ರೋ॑ ಯಾ॒ತೋಽವ॑ಸಿತಸ್ಯ॒ ರಾಜಾ॒ ಶಮ॑ಸ್ಯ ಚ ಶೃಂ॒ಗಿಣೋ॒ ವಜ್ರ॑ಬಾಹುಃ । ಸೇದು॒ ರಾಜಾ॑ ಕ್ಷಯತಿ ಚರ್ಷಣೀ॒ನಾಮ॒ರಾನ್ನ ನೇ॒ಮಿಃ ಪರಿ॒ ತಾ ಬ॑ಭೂವ ॥

इंद्रो॑ या॒तोऽव॑सितस्य॒ राजा॒ शम॑स्य च शृं॒गिणो॒ वज्र॑बाहुः । सेदु॒ राजा॑ क्षयति चर्षणी॒नाम॒रान्न ने॒मिः परि॒ ता ब॑भूव ॥