ಅಗ್ನಿ: ಪರಮ ಬಂಧು ಮತ್ತು ದೈವಿಕ ಮಾರ್ಗದರ್ಶಕ

ತ್ವಮ॑ಗ್ನೇ ಪ್ರಥ॒ಮೋ ಅಂಗಿ॑ರಾ॒ ಋಷಿ॑ರ್ದೇ॒ವೋ ದೇ॒ವಾನಾ॑ಮಭವಃ ಶಿ॒ವಃ ಸಖಾ॑ । ತವ॑ ವ್ರ॒ತೇ ಕ॒ವಯೋ॑ ವಿದ್ಮ॒ನಾಪ॒ಸೋಽಜಾ॑ಯಂತ ಮ॒ರುತೋ॒ ಭ್ರಾಜ॑ದೃಷ್ಟಯಃ ॥

त्वम॑ग्ने प्रथ॒मो अंगि॑रा॒ ऋषि॑र्दे॒वो दे॒वाना॑मभवः शि॒वः सखा॑ । तव॑ व्र॒ते क॒वयो॑ विद्म॒नाप॒सोऽजा॑यंत म॒रुतो॒ भ्राज॑दृष्टयः ॥

ತ್ವಮ॑ಗ್ನೇ ಪ್ರಥ॒ಮೋ ಅಂಗಿ॑ರಸ್ತಮಃ ಕ॒ವಿರ್ದೇ॒ವಾನಾಂ॒ ಪರಿ॑ ಭೂಷಸಿ ವ್ರ॒ತಂ । ವಿ॒ಭುರ್ವಿಶ್ವ॑ಸ್ಮೈ॒ ಭುವ॑ನಾಯ॒ ಮೇಧಿ॑ರೋ ದ್ವಿಮಾ॒ತಾ ಶ॒ಯುಃ ಕ॑ತಿ॒ಧಾ ಚಿ॑ದಾ॒ಯವೇ॑ ॥

त्वम॑ग्ने प्रथ॒मो अंगि॑रस्तमः क॒विर्दे॒वानां॒ परि॑ भूषसि व्र॒तं । वि॒भुर्विश्व॑स्मै॒ भुव॑नाय॒ मेधि॑रो द्विमा॒ता श॒युः क॑ति॒धा चि॑दा॒यवे॑ ॥

ತ್ವಮ॑ಗ್ನೇ ಪ್ರಥ॒ಮೋ ಮಾ॑ತ॒ರಿಶ್ವ॑ನ ಆ॒ವಿರ್ಭ॑ವ ಸುಕ್ರತೂ॒ಯಾ ವಿ॒ವಸ್ವ॑ತೇ । ಅರೇ॑ಜೇತಾಂ॒ ರೋದ॑ಸೀ ಹೋತೃ॒ವೂರ್ಯೇಽಸ॑ಘ್ನೋರ್ಭಾ॒ರಮಯ॑ಜೋ ಮ॒ಹೋ ವ॑ಸೋ ॥

त्वम॑ग्ने प्रथ॒मो मा॑त॒रिश्व॑न आ॒विर्भ॑व सुक्रतू॒या वि॒वस्व॑ते । अरे॑जेतां॒ रोद॑सी होतृ॒वूर्येऽस॑घ्नोर्भा॒रमय॑जो म॒हो व॑सो ॥

ತ್ವಮ॑ಗ್ನೇ॒ ಮನ॑ವೇ॒ ದ್ಯಾಮ॑ವಾಶಯಃ ಪುರೂ॒ರವ॑ಸೇ ಸು॒ಕೃತೇ॑ ಸು॒ಕೃತ್ತ॑ರಃ । ಶ್ವಾ॒ತ್ರೇಣ॒ ಯತ್ಪಿ॒ತ್ರೋರ್ಮುಚ್ಯ॑ಸೇ॒ ಪರ್ಯಾ ತ್ವಾ॒ ಪೂರ್ವ॑ಮನಯ॒ನ್ನಾಪ॑ರಂ॒ ಪುನಃ॑ ॥

त्वम॑ग्ने॒ मन॑वे॒ द्याम॑वाशयः पुरू॒रव॑से सु॒कृते॑ सु॒कृत्त॑रः । श्वा॒त्रेण॒ यत्पि॒त्रोर्मुच्य॑से॒ पर्या त्वा॒ पूर्व॑मनय॒न्नाप॑रं॒ पुनः॑ ॥

ತ್ವಮ॑ಗ್ನೇ ವೃಷ॒ಭಃ ಪು॑ಷ್ಟಿ॒ವರ್ಧ॑ನ॒ ಉದ್ಯ॑ತಸ್ರುಚೇ ಭವಸಿ ಶ್ರ॒ವಾಯ್ಯಃ॑ । ಯ ಆಹು॑ತಿಂ॒ ಪರಿ॒ ವೇದಾ॒ ವಷ॑ಟ್ಕೃತಿ॒ಮೇಕಾ॑ಯು॒ರಗ್ರೇ॒ ವಿಶ॑ ಆ॒ವಿವಾ॑ಸಸಿ ॥

त्वम॑ग्ने वृष॒भः पु॑ष्टि॒वर्ध॑न॒ उद्य॑तस्रुचे भवसि श्र॒वाय्यः॑ । य आहु॑तिं॒ परि॒ वेदा॒ वष॑ट्कृति॒मेका॑यु॒रग्रे॒ विश॑ आ॒विवा॑ससि ॥

ತ್ವಮ॑ಗ್ನೇ ವೃಜಿ॒ನವ॑ರ್ತನಿಂ॒ ನರಂ॒ ಸಕ್ಮ॑ನ್ಪಿಪರ್ಷಿ ವಿ॒ದಥೇ॑ ವಿಚರ್ಷಣೇ । ಯಃ ಶೂರ॑ಸಾತಾ॒ ಪರಿ॑ತಕ್ಮ್ಯೇ॒ ಧನೇ॑ ದ॒ಭ್ರೇಭಿ॑ಶ್ಚಿ॒ತ್ಸಮೃ॑ತಾ॒ ಹಂಸಿ॒ ಭೂಯ॑ಸಃ ॥

त्वम॑ग्ने वृजि॒नव॑र्तनिं॒ नरं॒ सक्म॑न्पिपर्षि वि॒दथे॑ विचर्षणे । यः शूर॑साता॒ परि॑तक्म्ये॒ धने॑ द॒भ्रेभि॑श्चि॒त्समृ॑ता॒ हंसि॒ भूय॑सः ॥

ತ್ವಂ ತಮ॑ಗ್ನೇ ಅಮೃತ॒ತ್ವ ಉ॑ತ್ತ॒ಮೇ ಮರ್ತಂ॑ ದಧಾಸಿ॒ ಶ್ರವ॑ಸೇ ದಿ॒ವೇದಿ॑ವೇ । ಯಸ್ತಾ॑ತೃಷಾ॒ಣ ಉ॒ಭಯಾ॑ಯ॒ ಜನ್ಮ॑ನೇ॒ ಮಯಃ॑ ಕೃ॒ಣೋಷಿ॒ ಪ್ರಯ॒ ಆ ಚ॑ ಸೂ॒ರಯೇ॑ ॥

त्वं तम॑ग्ने अमृत॒त्व उ॑त्त॒मे मर्तं॑ दधासि॒ श्रव॑से दि॒वेदि॑वे । यस्ता॑तृषा॒ण उ॒भया॑य॒ जन्म॑ने॒ मयः॑ कृ॒णोषि॒ प्रय॒ आ च॑ सू॒रये॑ ॥

ತ್ವಂ ನೋ॑ ಅಗ್ನೇ ಸ॒ನಯೇ॒ ಧನಾ॑ನಾಂ ಯ॒ಶಸಂ॑ ಕಾ॒ರುಂ ಕೃ॑ಣುಹಿ॒ ಸ್ತವಾ॑ನಃ । ಋ॒ಧ್ಯಾಮ॒ ಕರ್ಮಾ॒ಪಸಾ॒ ನವೇ॑ನ ದೇ॒ವೈರ್ದ್ಯಾ॑ವಾಪೃಥಿವೀ॒ ಪ್ರಾವ॑ತಂ ನಃ ॥

त्वं नो॑ अग्ने स॒नये॒ धना॑नां य॒शसं॑ का॒रुं कृ॑णुहि॒ स्तवा॑नः । ऋ॒ध्याम॒ कर्मा॒पसा॒ नवे॑न दे॒वैर्द्या॑वापृथिवी॒ प्राव॑तं नः ॥

ತ್ವಂ ನೋ॑ ಅಗ್ನೇ ಪಿ॒ತ್ರೋರು॒ಪಸ್ಥ॒ ಆ ದೇ॒ವೋ ದೇ॒ವೇಷ್ವ॑ನವದ್ಯ॒ ಜಾಗೃ॑ವಿಃ । ತ॒ನೂ॒ಕೃದ್ಬೋ॑ಧಿ॒ ಪ್ರಮ॑ತಿಶ್ಚ ಕಾ॒ರವೇ॒ ತ್ವಂ ಕ॑ಲ್ಯಾಣ॒ ವಸು॒ ವಿಶ್ವ॒ಮೋಪಿ॑ಷೇ ॥

त्वं नो॑ अग्ने पि॒त्रोरु॒पस्थ॒ आ दे॒वो दे॒वेष्व॑नवद्य॒ जागृ॑विः । त॒नू॒कृद्बो॑धि॒ प्रम॑तिश्च का॒रवे॒ त्वं क॑ल्याण॒ वसु॒ विश्व॒मोपि॑षे ॥

ತ್ವಮ॑ಗ್ನೇ॒ ಪ್ರಮ॑ತಿ॒ಸ್ತ್ವಂ ಪಿ॒ತಾಸಿ॑ ನ॒ಸ್ತ್ವಂ ವ॑ಯ॒ಸ್ಕೃತ್ತವ॑ ಜಾ॒ಮಯೋ॑ ವ॒ಯಂ । ಸಂ ತ್ವಾ॒ ರಾಯಃ॑ ಶ॒ತಿನಃ॒ ಸಂ ಸ॑ಹ॒ಸ್ರಿಣಃ॑ ಸು॒ವೀರಂ॑ ಯಂತಿ ವ್ರತ॒ಪಾಮ॑ದಾಭ್ಯ ॥

त्वम॑ग्ने॒ प्रम॑ति॒स्त्वं पि॒तासि॑ न॒स्त्वं व॑य॒स्कृत्तव॑ जा॒मयो॑ व॒यं । सं त्वा॒ रायः॑ श॒तिनः॒ सं स॑ह॒स्रिणः॑ सु॒वीरं॑ यंति व्रत॒पाम॑दाभ्य ॥

ತ್ವಾಮ॑ಗ್ನೇ ಪ್ರಥ॒ಮಮಾ॒ಯುಮಾ॒ಯವೇ॑ ದೇ॒ವಾ ಅ॑ಕೃಣ್ವ॒ನ್ನಹು॑ಷಸ್ಯ ವಿ॒ಶ್ಪತಿಂ॑ । ಇಳಾ॑ಮಕೃಣ್ವ॒ನ್ಮನು॑ಷಸ್ಯ॒ ಶಾಸ॑ನೀಂ ಪಿ॒ತುರ್ಯತ್ಪು॒ತ್ರೋ ಮಮ॑ಕಸ್ಯ॒ ಜಾಯ॑ತೇ ॥

त्वाम॑ग्ने प्रथ॒ममा॒युमा॒यवे॑ दे॒वा अ॑कृण्व॒न्नहु॑षस्य वि॒श्पतिं॑ । इळा॑मकृण्व॒न्मनु॑षस्य॒ शास॑नीं पि॒तुर्यत्पु॒त्रो मम॑कस्य॒ जाय॑ते ॥

ತ್ವಂ ನೋ॑ ಅಗ್ನೇ॒ ತವ॑ ದೇವ ಪಾ॒ಯುಭಿ॑ರ್ಮ॒ಘೋನೋ॑ ರಕ್ಷ ತ॒ನ್ವ॑ಶ್ಚ ವಂದ್ಯ । ತ್ರಾ॒ತಾ ತೋ॒ಕಸ್ಯ॒ ತನ॑ಯೇ॒ ಗವಾ॑ಮ॒ಸ್ಯನಿ॑ಮೇಷಂ॒ ರಕ್ಷ॑ಮಾಣ॒ಸ್ತವ॑ ವ್ರ॒ತೇ ॥

त्वं नो॑ अग्ने॒ तव॑ देव पा॒युभि॑र्म॒घोनो॑ रक्ष त॒न्व॑श्च वंद्य । त्रा॒ता तो॒कस्य॒ तन॑ये॒ गवा॑म॒स्यनि॑मेषं॒ रक्ष॑माण॒स्तव॑ व्र॒ते ॥

ತ್ವಮ॑ಗ್ನೇ॒ ಯಜ್ಯ॑ವೇ ಪಾ॒ಯುರಂತ॑ರೋಽನಿಷಂ॒ಗಾಯ॑ ಚತುರ॒ಕ್ಷ ಇ॑ಧ್ಯಸೇ । ಯೋ ರಾ॒ತಹ॑ವ್ಯೋಽವೃ॒ಕಾಯ॒ ಧಾಯ॑ಸೇ ಕೀ॒ರೇಶ್ಚಿ॒ನ್ಮಂತ್ರಂ॒ ಮನ॑ಸಾ ವ॒ನೋಷಿ॒ ತಂ ॥

त्वम॑ग्ने॒ यज्य॑वे पा॒युरंत॑रोऽनिषं॒गाय॑ चतुर॒क्ष इ॑ध्यसे । यो रा॒तह॑व्योऽवृ॒काय॒ धाय॑से की॒रेश्चि॒न्मंत्रं॒ मन॑सा व॒नोषि॒ तं ॥

ತ್ವಮ॑ಗ್ನ ಉರು॒ಶಂಸಾ॑ಯ ವಾ॒ಘತೇ॑ ಸ್ಪಾ॒ರ್ಹಂ ಯದ್ರೇಕ್ಣಃ॑ ಪರ॒ಮಂ ವ॒ನೋಷಿ॒ ತತ್ । ಆ॒ಧ್ರಸ್ಯ॑ ಚಿ॒ತ್ಪ್ರಮ॑ತಿರುಚ್ಯಸೇ ಪಿ॒ತಾ ಪ್ರ ಪಾಕಂ॒ ಶಾಸ್ಸಿ॒ ಪ್ರ ದಿಶೋ॑ ವಿ॒ದುಷ್ಟ॑ರಃ ॥

त्वम॑ग्न उरु॒शंसा॑य वा॒घते॑ स्पा॒र्हं यद्रेक्णः॑ पर॒मं व॒नोषि॒ तत् । आ॒ध्रस्य॑ चि॒त्प्रम॑तिरुच्यसे पि॒ता प्र पाकं॒ शास्सि॒ प्र दिशो॑ वि॒दुष्ट॑रः ॥

ತ್ವಮ॑ಗ್ನೇ॒ ಪ್ರಯ॑ತದಕ್ಷಿಣಂ॒ ನರಂ॒ ವರ್ಮೇ॑ವ ಸ್ಯೂ॒ತಂ ಪರಿ॑ ಪಾಸಿ ವಿ॒ಶ್ವತಃ॑ । ಸ್ವಾ॒ದು॒ಕ್ಷದ್ಮಾ॒ ಯೋ ವ॑ಸ॒ತೌ ಸ್ಯೋ॑ನ॒ಕೃಜ್ಜೀ॑ವಯಾ॒ಜಂ ಯಜ॑ತೇ॒ ಸೋಪ॒ಮಾ ದಿ॒ವಃ ॥

त्वम॑ग्ने॒ प्रय॑तदक्षिणं॒ नरं॒ वर्मे॑व स्यू॒तं परि॑ पासि वि॒श्वतः॑ । स्वा॒दु॒क्षद्मा॒ यो व॑स॒तौ स्यो॑न॒कृज्जी॑वया॒जं यज॑ते॒ सोप॒मा दि॒वः ॥

ಇ॒ಮಾಮ॑ಗ್ನೇ ಶ॒ರಣಿಂ॑ ಮೀಮೃಷೋ ನ ಇ॒ಮಮಧ್ವಾ॑ನಂ॒ ಯಮಗಾ॑ಮ ದೂ॒ರಾತ್ । ಆ॒ಪಿಃ ಪಿ॒ತಾ ಪ್ರಮ॑ತಿಃ ಸೋ॒ಮ್ಯಾನಾಂ॒ ಭೃಮಿ॑ರಸ್ಯೃಷಿ॒ಕೃನ್ಮರ್ತ್ಯಾ॑ನಾಂ ॥

इ॒माम॑ग्ने श॒रणिं॑ मीमृषो न इ॒ममध्वा॑नं॒ यमगा॑म दू॒रात् । आ॒पिः पि॒ता प्रम॑तिः सो॒म्यानां॒ भृमि॑रस्यृषि॒कृन्मर्त्या॑नां ॥

ಮ॒ನು॒ಷ್ವದ॑ಗ್ನೇ ಅಂಗಿರ॒ಸ್ವದಂ॑ಗಿರೋ ಯಯಾತಿ॒ವತ್ಸದ॑ನೇ ಪೂರ್ವ॒ವಚ್ಛು॑ಚೇ । ಅಚ್ಛ॑ ಯಾ॒ಹ್ಯಾ ವ॑ಹಾ॒ ದೈವ್ಯಂ॒ ಜನ॒ಮಾ ಸಾ॑ದಯ ಬ॒ರ್ಹಿಷಿ॒ ಯಕ್ಷಿ॑ ಚ ಪ್ರಿ॒ಯಂ ॥

म॒नु॒ष्वद॑ग्ने अंगिर॒स्वदं॑गिरो ययाति॒वत्सद॑ने पूर्व॒वच्छु॑चे । अच्छ॑ या॒ह्या व॑हा॒ दैव्यं॒ जन॒मा सा॑दय ब॒र्हिषि॒ यक्षि॑ च प्रि॒यं ॥

ಏ॒ತೇನಾ॑ಗ್ನೇ॒ ಬ್ರಹ್ಮ॑ಣಾ ವಾವೃಧಸ್ವ॒ ಶಕ್ತೀ॑ ವಾ॒ ಯತ್ತೇ॑ ಚಕೃ॒ಮಾ ವಿ॒ದಾ ವಾ॑ । ಉ॒ತ ಪ್ರ ಣೇ॑ಷ್ಯ॒ಭಿ ವಸ್ಯೋ॑ ಅ॒ಸ್ಮಾನ್ತ್ಸಂ ನಃ॑ ಸೃಜ ಸುಮ॒ತ್ಯಾ ವಾಜ॑ವತ್ಯಾ ॥

ए॒तेना॑ग्ने॒ ब्रह्म॑णा वावृधस्व॒ शक्ती॑ वा॒ यत्ते॑ चकृ॒मा वि॒दा वा॑ । उ॒त प्र णे॑ष्य॒भि वस्यो॑ अ॒स्मान्त्सं नः॑ सृज सुम॒त्या वाज॑वत्या ॥