ಇಂದ್ರ ಮತ್ತು ದೇವತೆಗಳ ಆಹ್ವಾನ - ಋಗ್ವೇದ ಮಂಡಲ 1, ಸೂಕ್ತ 30

ಆ ವ॒ ಇಂದ್ರಂ॒ ಕ್ರಿವಿಂ॑ ಯಥಾ ವಾಜ॒ಯಂತಃ॑ ಶ॒ತಕ್ರ॑ತುಂ । ಮಂಹಿ॑ಷ್ಠಂ ಸಿಂಚ॒ ಇಂದು॑ಭಿಃ ॥

आ व॒ इंद्रं॒ क्रिविं॑ यथा वाज॒यंतः॑ श॒तक्र॑तुं । मंहि॑ष्ठं सिंच॒ इंदु॑भिः ॥

ಶ॒ತಂ ವಾ॒ ಯಃ ಶುಚೀ॑ನಾಂ ಸ॒ಹಸ್ರಂ॑ ವಾ॒ ಸಮಾ॑ಶಿರಾಂ । ಏದು॑ ನಿ॒ಮ್ನಂ ನ ರೀ॑ಯತೇ ॥

श॒तं वा॒ यः शुची॑नां स॒हस्रं॑ वा॒ समा॑शिरां । एदु॑ नि॒म्नं न री॑यते ॥

ಸಂ ಯನ್ಮದಾ॑ಯ ಶು॒ಷ್ಮಿಣ॑ ಏ॒ನಾ ಹ್ಯ॑ಸ್ಯೋ॒ದರೇ॑ । ಸ॒ಮು॒ದ್ರೋ ನ ವ್ಯಚೋ॑ ದ॒ಧೇ ॥

सं यन्मदा॑य शु॒ष्मिण॑ ए॒ना ह्य॑स्यो॒दरे॑ । स॒मु॒द्रो न व्यचो॑ द॒धे ॥

ಅ॒ಯಮು॑ ತೇ॒ ಸಮ॑ತಸಿ ಕ॒ಪೋತ॑ ಇವ ಗರ್ಭ॒ಧಿಂ । ವಚ॒ಸ್ತಚ್ಚಿ॑ನ್ನ ಓಹಸೇ ॥

अ॒यमु॑ ते॒ सम॑तसि क॒पोत॑ इव गर्भ॒धिं । वच॒स्तच्चि॑न्न ओहसे ॥

ಸ್ತೋ॒ತ್ರಂ ರಾ॑ಧಾನಾಂ ಪತೇ॒ ಗಿರ್ವಾ॑ಹೋ ವೀರ॒ ಯಸ್ಯ॑ ತೇ । ವಿಭೂ॑ತಿರಸ್ತು ಸೂ॒ನೃತಾ॑ ॥

स्तो॒त्रं रा॑धानां पते॒ गिर्वा॑हो वीर॒ यस्य॑ ते । विभू॑तिरस्तु सू॒नृता॑ ॥

ಊ॒ರ್ಧ್ವಸ್ತಿ॑ಷ್ಠಾ ನ ಊ॒ತಯೇ॒ಽಸ್ಮಿನ್ವಾಜೇ॑ ಶತಕ್ರತೋ । ಸಮ॒ನ್ಯೇಷು॑ ಬ್ರವಾವಹೈ ॥

ऊ॒र्ध्वस्ति॑ष्ठा न ऊ॒तये॒ऽस्मिन्वाजे॑ शतक्रतो । सम॒न्येषु॑ ब्रवावहै ॥

ಯೋಗೇ॑ಯೋಗೇ ತ॒ವಸ್ತ॑ರಂ॒ ವಾಜೇ॑ವಾಜೇ ಹವಾಮಹೇ । ಸಖಾ॑ಯ॒ ಇಂದ್ರ॑ಮೂ॒ತಯೇ॑ ॥

योगे॑योगे त॒वस्त॑रं॒ वाजे॑वाजे हवामहे । सखा॑य॒ इंद्र॑मू॒तये॑ ॥

ಆ ಘಾ॑ ಗಮ॒ದ್ಯದಿ॒ ಶ್ರವ॑ತ್ಸಹ॒ಸ್ರಿಣೀ॑ಭಿರೂ॒ತಿಭಿಃ॑ । ವಾಜೇ॑ಭಿ॒ರುಪ॑ ನೋ॒ ಹವಂ॑ ॥

आ घा॑ गम॒द्यदि॒ श्रव॑त्सह॒स्रिणी॑भिरू॒तिभिः॑ । वाजे॑भि॒रुप॑ नो॒ हवं॑ ॥

ಅನು॑ ಪ್ರ॒ತ್ನಸ್ಯೌಕ॑ಸೋ ಹು॒ವೇ ತು॑ವಿಪ್ರ॒ತಿಂ ನರಂ॑ । ಯಂ ತೇ॒ ಪೂರ್ವಂ॑ ಪಿ॒ತಾ ಹು॒ವೇ ॥

अनु॑ प्र॒त्नस्यौक॑सो हु॒वे तु॑विप्र॒तिं नरं॑ । यं ते॒ पूर्वं॑ पि॒ता हु॒वे ॥

ತಂ ತ್ವಾ॑ ವ॒ಯಂ ವಿ॑ಶ್ವವಾ॒ರಾ ಶಾ॑ಸ್ಮಹೇ ಪುರುಹೂತ । ಸಖೇ॑ ವಸೋ ಜರಿ॒ತೃಭ್ಯಃ॑ ॥

तं त्वा॑ व॒यं वि॑श्ववा॒रा शा॑स्महे पुरुहूत । सखे॑ वसो जरि॒तृभ्यः॑ ॥

ಅ॒ಸ್ಮಾಕಂ॑ ಶಿ॒ಪ್ರಿಣೀ॑ನಾಂ॒ ಸೋಮ॑ಪಾಃ ಸೋಮ॒ಪಾವ್ನಾಂ॑ । ಸಖೇ॑ ವಜ್ರಿ॒ನ್ತ್ಸಖೀ॑ನಾಂ ॥

अ॒स्माकं॑ शि॒प्रिणी॑नां॒ सोम॑पाः सोम॒पाव्नां॑ । सखे॑ वज्रि॒न्त्सखी॑नां ॥

ತಥಾ॒ ತದ॑ಸ್ತು ಸೋಮಪಾಃ॒ ಸಖೇ॑ ವಜ್ರಿ॒ನ್ತಥಾ॑ ಕೃಣು । ಯಥಾ॑ ತ ಉ॒ಶ್ಮಸೀ॒ಷ್ಟಯೇ॑ ॥

तथा॒ तद॑स्तु सोमपाः॒ सखे॑ वज्रि॒न्तथा॑ कृणु । यथा॑ त उ॒श्मसी॒ष्टये॑ ॥

ರೇ॒ವತೀ॑ರ್ನಃ ಸಧ॒ಮಾದ॒ ಇಂದ್ರೇ॑ ಸಂತು ತು॒ವಿವಾ॑ಜಾಃ । ಕ್ಷು॒ಮಂತೋ॒ ಯಾಭಿ॒ರ್ಮದೇ॑ಮ ॥

रे॒वती॑र्नः सध॒माद॒ इंद्रे॑ संतु तु॒विवा॑जाः । क्षु॒मंतो॒ याभि॒र्मदे॑म ॥

ಆ ಘ॒ ತ್ವಾವಾ॒ನ್ತ್ಮನಾ॒ಪ್ತಃ ಸ್ತೋ॒ತೃಭ್ಯೋ॑ ಧೃಷ್ಣವಿಯಾ॒ನಃ । ಋ॒ಣೋರಕ್ಷಂ॒ ನ ಚ॒ಕ್ರ್ಯೋಃ॑ ॥

आ घ॒ त्वावा॒न्त्मना॒प्तः स्तो॒तृभ्यो॑ धृष्णविया॒नः । ऋ॒णोरक्षं॒ न च॒क्र्योः॑ ॥

ಆ ಯದ್ದುವಃ॑ ಶತಕ್ರತ॒ವಾ ಕಾಮಂ॑ ಜರಿತೄ॒ಣಾಂ । ಋ॒ಣೋರಕ್ಷಂ॒ ನ ಶಚೀ॑ಭಿಃ ॥

आ यद्दुवः॑ शतक्रत॒वा कामं॑ जरितॄ॒णां । ऋ॒णोरक्षं॒ न शची॑भिः ॥

ಶಶ್ವ॒ದಿಂದ್ರಃ॒ ಪೋಪ್ರು॑ಥದ್ಭಿರ್ಜಿಗಾಯ॒ ನಾನ॑ದದ್ಭಿಃ॒ ಶಾಶ್ವ॑ಸದ್ಭಿ॒ರ್ಧನಾ॑ನಿ । ಸ ನೋ॑ ಹಿರಣ್ಯರ॒ಥಂ ದಂ॒ಸನಾ॑ವಾ॒ನ್ತ್ಸ ನಃ॑ ಸನಿ॒ತಾ ಸ॒ನಯೇ॒ ಸ ನೋ॑ಽದಾತ್ ॥

शश्व॒दिंद्रः॒ पोप्रु॑थद्भिर्जिगाय॒ नान॑दद्भिः॒ शाश्व॑सद्भि॒र्धना॑नि । स नो॑ हिरण्यर॒थं दं॒सना॑वा॒न्त्स नः॑ सनि॒ता स॒नये॒ स नो॑ऽदात् ॥

ಆಶ್ವಿ॑ನಾ॒ವಶ್ವಾ॑ವತ್ಯೇ॒ಷಾ ಯಾ॑ತಂ॒ ಶವೀ॑ರಯಾ । ಗೋಮ॑ದ್ದಸ್ರಾ॒ ಹಿರ॑ಣ್ಯವತ್ ॥

आश्वि॑ना॒वश्वा॑वत्ये॒षा या॑तं॒ शवी॑रया । गोम॑द्दस्रा॒ हिर॑ण्यवत् ॥

ಸ॒ಮಾ॒ನಯೋ॑ಜನೋ॒ ಹಿ ವಾಁ॒ ರಥೋ॑ ದಸ್ರಾ॒ವಮ॑ರ್ತ್ಯಃ । ಸ॒ಮು॒ದ್ರೇ ಅ॑ಶ್ವಿ॒ನೇಯ॑ತೇ ॥

स॒मा॒नयो॑जनो॒ हि वाँ॒ रथो॑ दस्रा॒वम॑र्त्यः । स॒मु॒द्रे अ॑श्वि॒नेय॑ते ॥

ನ್ಯ೧॒॑ಘ್ನ್ಯಸ್ಯ॑ ಮೂ॒ರ್ಧನಿ॑ ಚ॒ಕ್ರಂ ರಥ॑ಸ್ಯ ಯೇಮಥುಃ । ಪರಿ॒ ದ್ಯಾಮ॒ನ್ಯದೀ॑ಯತೇ ॥

न्य१॒॑घ्न्यस्य॑ मू॒र्धनि॑ च॒क्रं रथ॑स्य येमथुः । परि॒ द्याम॒न्यदी॑यते ॥

ಕಸ್ತ॑ ಉಷಃ ಕಧಪ್ರಿಯೇ ಭು॒ಜೇ ಮರ್ತೋ॑ ಅಮರ್ತ್ಯೇ । ಕಂ ನ॑ಕ್ಷಸೇ ವಿಭಾವರಿ ॥

कस्त॑ उषः कधप्रिये भु॒जे मर्तो॑ अमर्त्ये । कं न॑क्षसे विभावरि ॥

ವ॒ಯಂ ಹಿ ತೇ॒ ಅಮ॑ನ್ಮ॒ಹ್ಯಾಂತಾ॒ದಾ ಪ॑ರಾ॒ಕಾತ್ । ಅಶ್ವೇ॒ ನ ಚಿ॑ತ್ರೇ ಅರುಷಿ ॥

व॒यं हि ते॒ अम॑न्म॒ह्यांता॒दा प॑रा॒कात् । अश्वे॒ न चि॑त्रे अरुषि ॥

ತ್ವಂ ತ್ಯೇಭಿ॒ರಾ ಗ॑ಹಿ॒ ವಾಜೇ॑ಭಿರ್ದುಹಿತರ್ದಿವಃ । ಅ॒ಸ್ಮೇ ರ॒ಯಿಂ ನಿ ಧಾ॑ರಯ ॥

त्वं त्येभि॒रा ग॑हि॒ वाजे॑भिर्दुहितर्दिवः । अ॒स्मे र॒यिं नि धा॑रय ॥