ಅಗ್ನಿಯ ಆವಾಹನೆ ಮತ್ತು ದೈವಿಕ ರಕ್ಷಣೆ: ಋಗ್ವೇದ ಮಂಡಲ ೧, ಸೂಕ್ತ ೨೭

ಅಶ್ವಂ॒ ನ ತ್ವಾ॒ ವಾರ॑ವಂತಂ ವಂ॒ದಧ್ಯಾ॑ ಅ॒ಗ್ನಿಂ ನಮೋ॑ಭಿಃ । ಸ॒ಮ್ರಾಜಂ॑ತಮಧ್ವ॒ರಾಣಾಂ॑ ॥

अश्वं॒ न त्वा॒ वार॑वंतं वं॒दध्या॑ अ॒ग्निं नमो॑भिः । स॒म्राजं॑तमध्व॒राणां॑ ॥

ಸ ಘಾ॑ ನಃ ಸೂ॒ನುಃ ಶವ॑ಸಾ ಪೃ॒ಥುಪ್ರ॑ಗಾಮಾ ಸು॒ಶೇವಃ॑ । ಮೀ॒ಢ್ವಾಁ ಅ॒ಸ್ಮಾಕಂ॑ ಬಭೂಯಾತ್ ॥

स घा॑ नः सू॒नुः शव॑सा पृ॒थुप्र॑गामा सु॒शेवः॑ । मी॒ढ्वाँ अ॒स्माकं॑ बभूयात् ॥

ಸ ನೋ॑ ದೂ॒ರಾಚ್ಚಾ॒ಸಾಚ್ಚ॒ ನಿ ಮರ್ತ್ಯಾ॑ದಘಾ॒ಯೋಃ । ಪಾ॒ಹಿ ಸದ॒ಮಿದ್ವಿ॒ಶ್ವಾಯುಃ॑ ॥

स नो॑ दू॒राच्चा॒साच्च॒ नि मर्त्या॑दघा॒योः । पा॒हि सद॒मिद्वि॒श्वायुः॑ ॥

ಇ॒ಮಮೂ॒ ಷು ತ್ವಮ॒ಸ್ಮಾಕಂ॑ ಸ॒ನಿಂ ಗಾ॑ಯ॒ತ್ರಂ ನವ್ಯಾಂ॑ಸಂ । ಅಗ್ನೇ॑ ದೇ॒ವೇಷು॒ ಪ್ರ ವೋ॑ಚಃ ॥

इ॒ममू॒ षु त्वम॒स्माकं॑ स॒निं गा॑य॒त्रं नव्यां॑सं । अग्ने॑ दे॒वेषु॒ प्र वो॑चः ॥

ಆ ನೋ॑ ಭಜ ಪರ॒ಮೇಷ್ವಾ ವಾಜೇ॑ಷು ಮಧ್ಯ॒ಮೇಷು॑ । ಶಿಕ್ಷಾ॒ ವಸ್ವೋ॒ ಅಂತ॑ಮಸ್ಯ ॥

आ नो॑ भज पर॒मेष्वा वाजे॑षु मध्य॒मेषु॑ । शिक्षा॒ वस्वो॒ अंत॑मस्य ॥

ವಿ॒ಭ॒ಕ್ತಾಸಿ॑ ಚಿತ್ರಭಾನೋ॒ ಸಿಂಧೋ॑ರೂ॒ರ್ಮಾ ಉ॑ಪಾ॒ಕ ಆ । ಸ॒ದ್ಯೋ ದಾ॒ಶುಷೇ॑ ಕ್ಷರಸಿ ॥

वि॒भ॒क्तासि॑ चित्रभानो॒ सिंधो॑रू॒र्मा उ॑पा॒क आ । स॒द्यो दा॒शुषे॑ क्षरसि ॥

ಯಮ॑ಗ್ನೇ ಪೃ॒ತ್ಸು ಮರ್ತ್ಯ॒ಮವಾ॒ ವಾಜೇ॑ಷು॒ ಯಂ ಜು॒ನಾಃ । ಸ ಯಂತಾ॒ ಶಶ್ವ॑ತೀ॒ರಿಷಃ॑ ॥

यम॑ग्ने पृ॒त्सु मर्त्य॒मवा॒ वाजे॑षु॒ यं जु॒नाः । स यंता॒ शश्व॑ती॒रिषः॑ ॥

ನಕಿ॑ರಸ್ಯ ಸಹಂತ್ಯ ಪರ್ಯೇ॒ತಾ ಕಯ॑ಸ್ಯ ಚಿತ್ । ವಾಜೋ॑ ಅಸ್ತಿ ಶ್ರ॒ವಾಯ್ಯಃ॑ ॥

नकि॑रस्य सहंत्य पर्ये॒ता कय॑स्य चित् । वाजो॑ अस्ति श्र॒वाय्यः॑ ॥

ಸ ವಾಜಂ॑ ವಿ॒ಶ್ವಚ॑ರ್ಷಣಿ॒ರರ್ವ॑ದ್ಭಿರಸ್ತು॒ ತರು॑ತಾ । ವಿಪ್ರೇ॑ಭಿರಸ್ತು॒ ಸನಿ॑ತಾ ॥

स वाजं॑ वि॒श्वच॑र्षणि॒रर्व॑द्भिरस्तु॒ तरु॑ता । विप्रे॑भिरस्तु॒ सनि॑ता ॥

ಜರಾ॑ಬೋಧ॒ ತದ್ವಿ॑ವಿಡ್ಢಿ ವಿ॒ಶೇವಿ॑ಶೇ ಯ॒ಜ್ಞಿಯಾ॑ಯ । ಸ್ತೋಮಂ॑ ರು॒ದ್ರಾಯ॒ ದೃಶೀ॑ಕಂ ॥

जरा॑बोध॒ तद्वि॑विड्ढि वि॒शेवि॑शे य॒ज्ञिया॑य । स्तोमं॑ रु॒द्राय॒ दृशी॑कं ॥

ಸ ನೋ॑ ಮ॒ಹಾಁ ಅ॑ನಿಮಾ॒ನೋ ಧೂ॒ಮಕೇ॑ತುಃ ಪುರುಶ್ಚಂ॒ದ್ರಃ । ಧಿ॒ಯೇ ವಾಜಾ॑ಯ ಹಿನ್ವತು ॥

स नो॑ म॒हाँ अ॑निमा॒नो धू॒मके॑तुः पुरुश्चं॒द्रः । धि॒ये वाजा॑य हिन्वतु ॥

ಸ ರೇ॒ವಾಁ ಇ॑ವ ವಿ॒ಶ್ಪತಿ॒ರ್ದೈವ್ಯಃ॑ ಕೇ॒ತುಃ ಶೃ॑ಣೋತು ನಃ । ಉ॒ಕ್ಥೈರ॒ಗ್ನಿರ್ಬೃ॒ಹದ್ಭಾ॑ನುಃ ॥

स रे॒वाँ इ॑व वि॒श्पति॒र्दैव्यः॑ के॒तुः शृ॑णोतु नः । उ॒क्थैर॒ग्निर्बृ॒हद्भा॑नुः ॥

ನಮೋ॑ ಮ॒ಹದ್ಭ್ಯೋ॒ ನಮೋ॑ ಅರ್ಭ॒ಕೇಭ್ಯೋ॒ ನಮೋ॒ ಯುವ॑ಭ್ಯೋ॒ ನಮ॑ ಆಶಿ॒ನೇಭ್ಯಃ॑ । ಯಜಾ॑ಮ ದೇ॒ವಾನ್ಯದಿ॑ ಶ॒ಕ್ನವಾ॑ಮ॒ ಮಾ ಜ್ಯಾಯ॑ಸಃ॒ ಶಂಸ॒ಮಾ ವೃ॑ಕ್ಷಿ ದೇವಾಃ ॥

नमो॑ म॒हद्भ्यो॒ नमो॑ अर्भ॒केभ्यो॒ नमो॒ युव॑भ्यो॒ नम॑ आशि॒नेभ्यः॑ । यजा॑म दे॒वान्यदि॑ श॒क्नवा॑म॒ मा ज्याय॑सः॒ शंस॒मा वृ॑क्षि देवाः ॥