ಉಲೂಖಲ ಮತ್ತು ಇಂದ್ರನ ಆವಾಹನೆ - ದೈವಿಕ ಸೋಮ ತಯಾರಿಕೆಯ ದೃಶ್ಯ

ಯತ್ರ॒ ಗ್ರಾವಾ॑ ಪೃ॒ಥುಬು॑ಧ್ನ ಊ॒ರ್ಧ್ವೋ ಭವ॑ತಿ॒ ಸೋತ॑ವೇ । ಉ॒ಲೂಖ॑ಲಸುತಾನಾ॒ಮವೇದ್ವಿಂ॑ದ್ರ ಜಲ್ಗುಲಃ ॥

यत्र॒ ग्रावा॑ पृ॒थुबु॑ध्न ऊ॒र्ध्वो भव॑ति॒ सोत॑वे । उ॒लूख॑लसुताना॒मवेद्विं॑द्र जल्गुलः ॥

ಯತ್ರ॒ ದ್ವಾವಿ॑ವ ಜ॒ಘನಾ॑ಧಿಷವ॒ಣ್ಯಾ॑ ಕೃ॒ತಾ । ಉ॒ಲೂಖ॑ಲಸುತಾನಾ॒ಮವೇದ್ವಿಂ॑ದ್ರ ಜಲ್ಗುಲಃ ॥

यत्र॒ द्वावि॑व ज॒घना॑धिषव॒ण्या॑ कृ॒ता । उ॒लूख॑लसुताना॒मवेद्विं॑द्र जल्गुलः ॥

ಯತ್ರ॒ ನಾರ್ಯ॑ಪಚ್ಯ॒ವಮು॑ಪಚ್ಯ॒ವಂ ಚ॒ ಶಿಕ್ಷ॑ತೇ । ಉ॒ಲೂಖ॑ಲಸುತಾನಾ॒ಮವೇದ್ವಿಂ॑ದ್ರ ಜಲ್ಗುಲಃ ॥

यत्र॒ नार्य॑पच्य॒वमु॑पच्य॒वं च॒ शिक्ष॑ते । उ॒लूख॑लसुताना॒मवेद्विं॑द्र जल्गुलः ॥

ಯತ್ರ॒ ಮಂಥಾಂ॑ ವಿಬ॒ಧ್ನತೇ॑ ರ॒ಶ್ಮೀನ್ಯಮಿ॑ತ॒ವಾ ಇ॑ವ । ಉ॒ಲೂಖ॑ಲಸುತಾನಾ॒ಮವೇದ್ವಿಂ॑ದ್ರ ಜಲ್ಗುಲಃ ॥

यत्र॒ मंथां॑ विब॒ध्नते॑ र॒श्मीन्यमि॑त॒वा इ॑व । उ॒लूख॑लसुताना॒मवेद्विं॑द्र जल्गुलः ॥

ಯಚ್ಚಿ॒ದ್ಧಿ ತ್ವಂ ಗೃ॒ಹೇಗೃ॑ಹ॒ ಉಲೂ॑ಖಲಕ ಯು॒ಜ್ಯಸೇ॑ । ಇ॒ಹ ದ್ಯು॒ಮತ್ತ॑ಮಂ ವದ॒ ಜಯ॑ತಾಮಿವ ದುಂದು॒ಭಿಃ ॥

यच्चि॒द्धि त्वं गृ॒हेगृ॑ह॒ उलू॑खलक यु॒ज्यसे॑ । इ॒ह द्यु॒मत्त॑मं वद॒ जय॑तामिव दुंदु॒भिः ॥

ಉ॒ತ ಸ್ಮ॑ ತೇ ವನಸ್ಪತೇ॒ ವಾತೋ॒ ವಿ ವಾ॒ತ್ಯಗ್ರ॒ಮಿತ್ । ಅಥೋ॒ ಇಂದ್ರಾ॑ಯ॒ ಪಾತ॑ವೇ ಸು॒ನು ಸೋಮ॑ಮುಲೂಖಲ ॥

उ॒त स्म॑ ते वनस्पते॒ वातो॒ वि वा॒त्यग्र॒मित् । अथो॒ इंद्रा॑य॒ पात॑वे सु॒नु सोम॑मुलूखल ॥

ಆ॒ಯ॒ಜೀ ವಾ॑ಜ॒ಸಾತ॑ಮಾ॒ ತಾ ಹ್ಯು೧॒॑ಚ್ಚಾ ವಿ॑ಜರ್ಭೃ॒ತಃ । ಹರೀ॑ ಇ॒ವಾಂಧಾಂ॑ಸಿ॒ ಬಪ್ಸ॑ತಾ ॥

आ॒य॒जी वा॑ज॒सात॑मा॒ ता ह्यु१॒॑च्चा वि॑जर्भृ॒तः । हरी॑ इ॒वांधां॑सि॒ बप्स॑ता ॥

ತಾ ನೋ॑ ಅ॒ದ್ಯ ವ॑ನಸ್ಪತೀ ಋ॒ಷ್ವಾವೃ॒ಷ್ವೇಭಿಃ॑ ಸೋ॒ತೃಭಿಃ॑ । ಇಂದ್ರಾ॑ಯ॒ ಮಧು॑ಮತ್ಸುತಂ ॥

ता नो॑ अ॒द्य व॑नस्पती ऋ॒ष्वावृ॒ष्वेभिः॑ सो॒तृभिः॑ । इंद्रा॑य॒ मधु॑मत्सुतं ॥

ಉಚ್ಛಿ॒ಷ್ಟಂ ಚ॒ಮ್ವೋ॑ರ್ಭರ॒ ಸೋಮಂ॑ ಪ॒ವಿತ್ರ॒ ಆ ಸೃ॑ಜ । ನಿ ಧೇ॑ಹಿ॒ ಗೋರಧಿ॑ ತ್ವ॒ಚಿ ॥

उच्छि॒ष्टं च॒म्वो॑र्भर॒ सोमं॑ प॒वित्र॒ आ सृ॑ज । नि धे॑हि॒ गोरधि॑ त्व॒चि ॥