Sūkta 27

अश्वं॒ न त्वा॒ वार॑वंतं वं॒दध्या॑ अ॒ग्निं नमो॑भिः । स॒म्राजं॑तमध्व॒राणां॑ ॥

áśvam ná tvā vā́ravantam vandádhyā agním námobhiḥ ǀ samrā́jantamadhvarā́ṇām ǁ

स घा॑ नः सू॒नुः शव॑सा पृ॒थुप्र॑गामा सु॒शेवः॑ । मी॒ढ्वाँ अ॒स्माकं॑ बभूयात् ॥

sá ghā naḥ sūnúḥ śávasā pṛthúpragāmā suśévaḥ ǀ mīḍhvā́m̐ asmā́kam babhūyāt ǁ

स नो॑ दू॒राच्चा॒साच्च॒ नि मर्त्या॑दघा॒योः । पा॒हि सद॒मिद्वि॒श्वायुः॑ ॥

sá no dūrā́ccāsā́cca ní mártyādaghāyóḥ ǀ pāhí sádamídviśvā́yuḥ ǁ

इ॒ममू॒ षु त्वम॒स्माकं॑ स॒निं गा॑य॒त्रं नव्यां॑सं । अग्ने॑ दे॒वेषु॒ प्र वो॑चः ॥

imámū ṣú tvámasmā́kam saním gāyatrám návyāṃsam ǀ ágne devéṣu prá vocaḥ ǁ

आ नो॑ भज पर॒मेष्वा वाजे॑षु मध्य॒मेषु॑ । शिक्षा॒ वस्वो॒ अंत॑मस्य ॥

ā́ no bhaja paraméṣvā́ vā́jeṣu madhyaméṣu ǀ śíkṣā vásvo ántamasya ǁ

वि॒भ॒क्तासि॑ चित्रभानो॒ सिंधो॑रू॒र्मा उ॑पा॒क आ । स॒द्यो दा॒शुषे॑ क्षरसि ॥

vibhaktā́si citrabhāno síndhorūrmā́ upāká ā́ ǀ sadyó dāśúṣe kṣarasi ǁ

यम॑ग्ने पृ॒त्सु मर्त्य॒मवा॒ वाजे॑षु॒ यं जु॒नाः । स यंता॒ शश्व॑ती॒रिषः॑ ॥

yámagne pṛtsú mártyamávā vā́jeṣu yám junā́ḥ ǀ sá yántā śáśvatīríṣaḥ ǁ

नकि॑रस्य सहंत्य पर्ये॒ता कय॑स्य चित् । वाजो॑ अस्ति श्र॒वाय्यः॑ ॥

nákirasya sahantya paryetā́ káyasya cit ǀ vā́jo asti śravā́yyaḥ ǁ

स वाजं॑ वि॒श्वच॑र्षणि॒रर्व॑द्भिरस्तु॒ तरु॑ता । विप्रे॑भिरस्तु॒ सनि॑ता ॥

sá vā́jam viśvácarṣaṇirárvadbhirastu tárutā ǀ víprebhirastu sánitā ǁ

जरा॑बोध॒ तद्वि॑विड्ढि वि॒शेवि॑शे य॒ज्ञिया॑य । स्तोमं॑ रु॒द्राय॒ दृशी॑कं ॥

járābodha tádviviḍḍhi viśéviśe yajñíyāya ǀ stómam rudrā́ya dṛ́śīkam ǁ

स नो॑ म॒हाँ अ॑निमा॒नो धू॒मके॑तुः पुरुश्चं॒द्रः । धि॒ये वाजा॑य हिन्वतु ॥

sá no mahā́m̐ animānó dhūmáketuḥ puruścandráḥ ǀ dhiyé vā́jāya hinvatu ǁ

स रे॒वाँ इ॑व वि॒श्पति॒र्दैव्यः॑ के॒तुः शृ॑णोतु नः । उ॒क्थैर॒ग्निर्बृ॒हद्भा॑नुः ॥

sá revā́m̐ iva viśpátirdáivyaḥ ketúḥ śṛṇotu naḥ ǀ uktháiragnírbṛhádbhānuḥ ǁ

नमो॑ म॒हद्भ्यो॒ नमो॑ अर्भ॒केभ्यो॒ नमो॒ युव॑भ्यो॒ नम॑ आशि॒नेभ्यः॑ । यजा॑म दे॒वान्यदि॑ श॒क्नवा॑म॒ मा ज्याय॑सः॒ शंस॒मा वृ॑क्षि देवाः ॥

námo mahádbhyo námo arbhakébhyo námo yúvabhyo náma āśinébhyaḥ ǀ yájāma devā́nyádi śaknávāma mā́ jyā́yasaḥ śáṃsamā́ vṛkṣi devāḥ ǁ