Sūkta 26

वसि॑ष्वा॒ हि मि॑येध्य॒ वस्त्रा॑ण्यूर्जां पते । सेमं नो॑ अध्व॒रं य॑ज ॥

vásiṣvā hí miyedhya vástrāṇyūrjām pate ǀ sémám no adhvarám yaja ǁ

नि नो॒ होता॒ वरे॑ण्यः॒ सदा॑ यविष्ठ॒ मन्म॑भिः । अग्ने॑ दि॒वित्म॑ता॒ वचः॑ ॥

ní no hótā váreṇyaḥ sádā yaviṣṭha mánmabhiḥ ǀ ágne divítmatā vácaḥ ǁ

आ हि ष्मा॑ सू॒नवे॑ पि॒तापिर्यज॑त्या॒पये॑ । सखा॒ सख्ये॒ वरे॑ण्यः ॥

ā́ hí ṣmā sūnáve pitā́píryájatyāpáye ǀ sákhā sákhye váreṇyaḥ ǁ

आ नो॑ ब॒र्ही रि॒शाद॑सो॒ वरु॑णो मि॒त्रो अ॑र्य॒मा । सीदं॑तु॒ मनु॑षो यथा ॥

ā́ no barhī́ riśā́daso váruṇo mitró aryamā́ ǀ sī́dantu mánuṣo yathā ǁ

पूर्व्य॑ होतर॒स्य नो॒ मंद॑स्व स॒ख्यस्य॑ च । इ॒मा उ॒ षु श्रु॑धी॒ गिरः॑ ॥

pū́rvya hotarasyá no mándasva sakhyásya ca ǀ imā́ u ṣú śrudhī gíraḥ ǁ

यच्चि॒द्धि शश्व॑ता॒ तना॑ दे॒वंदे॑वं॒ यजा॑महे । त्वे इद्धू॑यते ह॒विः ॥

yácciddhí śáśvatā tánā deváṃdevam yájāmahe ǀ tvé íddhūyate havíḥ ǁ

प्रि॒यो नो॑ अस्तु वि॒श्पति॒र्होता॑ मं॒द्रो वरे॑ण्यः । प्रि॒याः स्व॒ग्नयो॑ व॒यं ॥

priyó no astu viśpátirhótā mandró váreṇyaḥ ǀ priyā́ḥ svagnáyo vayám ǁ

स्व॒ग्नयो॒ हि वार्यं॑ दे॒वासो॑ दधि॒रे च॑ नः । स्व॒ग्नयो॑ मनामहे ॥

svagnáyo hí vā́ryam devā́so dadhiré ca naḥ ǀ svagnáyo manāmahe ǁ

अथा॑ न उ॒भये॑षा॒ममृ॑त॒ मर्त्या॑नां । मि॒थः सं॑तु॒ प्रश॑स्तयः ॥

áthā na ubháyeṣāmámṛta mártyānām ǀ mitháḥ santu práśastayaḥ ǁ

विश्वे॑भिरग्ने अ॒ग्निभि॑रि॒मं य॒ज्ञमि॒दं वचः॑ । चनो॑ धाः सहसो यहो ॥

víśvebhiragne agníbhirimám yajñámidám vácaḥ ǀ cáno dhāḥ sahaso yaho ǁ