Sūkta 28

यत्र॒ ग्रावा॑ पृ॒थुबु॑ध्न ऊ॒र्ध्वो भव॑ति॒ सोत॑वे । उ॒लूख॑लसुताना॒मवेद्विं॑द्र जल्गुलः ॥

yátra grā́vā pṛthúbudhna ūrdhvó bhávati sótave ǀ ulū́khalasutānāmávédvindra jalgulaḥ ǁ

यत्र॒ द्वावि॑व ज॒घना॑धिषव॒ण्या॑ कृ॒ता । उ॒लूख॑लसुताना॒मवेद्विं॑द्र जल्गुलः ॥

yátra dvā́viva jaghánādhiṣavaṇyā́ kṛtā́ ǀ ulū́khalasutānāmávédvindra jalgulaḥ ǁ

यत्र॒ नार्य॑पच्य॒वमु॑पच्य॒वं च॒ शिक्ष॑ते । उ॒लूख॑लसुताना॒मवेद्विं॑द्र जल्गुलः ॥

yátra nā́ryapacyavámupacyavám ca śíkṣate ǀ ulū́khalasutānāmávédvindra jalgulaḥ ǁ

यत्र॒ मंथां॑ विब॒ध्नते॑ र॒श्मीन्यमि॑त॒वा इ॑व । उ॒लूख॑लसुताना॒मवेद्विं॑द्र जल्गुलः ॥

yátra mánthām vibadhnáte raśmī́nyámitavā́ iva ǀ ulū́khalasutānāmávédvindra jalgulaḥ ǁ

यच्चि॒द्धि त्वं गृ॒हेगृ॑ह॒ उलू॑खलक यु॒ज्यसे॑ । इ॒ह द्यु॒मत्त॑मं वद॒ जय॑तामिव दुंदु॒भिः ॥

yácciddhí tvám gṛhégṛha úlūkhalaka yujyáse ǀ ihá dyumáttamam vada jáyatāmiva dundubhíḥ ǁ

उ॒त स्म॑ ते वनस्पते॒ वातो॒ वि वा॒त्यग्र॒मित् । अथो॒ इंद्रा॑य॒ पात॑वे सु॒नु सोम॑मुलूखल ॥

utá sma te vanaspate vā́to ví vātyágramít ǀ átho índrāya pā́tave sunú sómamulūkhala ǁ

आ॒य॒जी वा॑ज॒सात॑मा॒ ता ह्यु१॒॑च्चा वि॑जर्भृ॒तः । हरी॑ इ॒वांधां॑सि॒ बप्स॑ता ॥

āyajī́ vājasā́tamā tā́ hyúccā́ vijarbhṛtáḥ ǀ hárī ivā́ndhāṃsi bápsatā ǁ

ता नो॑ अ॒द्य व॑नस्पती ऋ॒ष्वावृ॒ष्वेभिः॑ सो॒तृभिः॑ । इंद्रा॑य॒ मधु॑मत्सुतं ॥

tā́ no adyá vanaspatī ṛṣvā́vṛṣvébhiḥ sotṛ́bhiḥ ǀ índrāya mádhumatsutam ǁ

उच्छि॒ष्टं च॒म्वो॑र्भर॒ सोमं॑ प॒वित्र॒ आ सृ॑ज । नि धे॑हि॒ गोरधि॑ त्व॒चि ॥

úcchiṣṭám camvórbhara sómam pavítra ā́ sṛja ǀ ní dhehi górádhi tvací ǁ