Sūkta 25

यच्चि॒द्धि ते॒ विशो॑ यथा॒ प्र दे॑व वरुण व्र॒तं । मि॒नी॒मसि॒ द्यवि॑द्यवि ॥

yácciddhí te víśo yathā prá deva varuṇa vratám ǀ minīmási dyávidyavi ǁ

मा नो॑ व॒धाय॑ ह॒त्नवे॑ जिहीळा॒नस्य॑ रीरधः । मा हृ॑णा॒नस्य॑ म॒न्यवे॑ ॥

mā́ no vadhā́ya hatnáve jihīḷānásya rīradhaḥ ǀ mā́ hṛṇānásya manyáve ǁ

वि मृ॑ळी॒काय॑ ते॒ मनो॑ र॒थीरश्वं॒ न संदि॑तं । गी॒र्भिर्व॑रुण सीमहि ॥

ví mṛḷīkā́ya te máno rathī́ráśvam ná sáṃditam ǀ gīrbhírvaruṇa sīmahi ǁ

परा॒ हि मे॒ विम॑न्यवः॒ पतं॑ति॒ वस्य॑इष्टये । वयो॒ न व॑स॒तीरुप॑ ॥

párā hí me vímanyavaḥ pátanti vásya-iṣṭaye ǀ váyo ná vasatī́rúpa ǁ

क॒दा क्ष॑त्र॒श्रियं॒ नर॒मा वरु॑णं करामहे । मृ॒ळी॒कायो॑रु॒चक्ष॑सं ॥

kadā́ kṣatraśríyam náramā́ váruṇam karāmahe ǀ mṛḷīkā́yorucákṣasam ǁ

तदित्स॑मा॒नमा॑शाते॒ वेनं॑ता॒ न प्र यु॑च्छतः । धृ॒तव्र॑ताय दा॒शुषे॑ ॥

tádítsamānámāśāte vénantā ná prá yucchataḥ ǀ dhṛtávratāya dāśúṣe ǁ

वेदा॒ यो वी॒नां प॒दमं॒तरि॑क्षेण॒ पत॑तां । वेद॑ ना॒वः स॑मु॒द्रियः॑ ॥

védā yó vīnā́m padámantárikṣeṇa pátatām ǀ véda nāváḥ samudríyaḥ ǁ

वेद॑ मा॒सो धृ॒तव्र॑तो॒ द्वाद॑श प्र॒जाव॑तः । वेदा॒ य उ॑प॒जाय॑ते ॥

véda māsó dhṛtávrato dvā́daśa prajā́vataḥ ǀ védā yá upajā́yate ǁ

वेद॒ वात॑स्य वर्त॒निमु॒रोर्ऋ॒ष्वस्य॑ बृह॒तः । वेदा॒ ये अ॒ध्यास॑ते ॥

véda vā́tasya vartanímurórṛṣvásya bṛhatáḥ ǀ védā yé adhyā́sate ǁ

नि ष॑साद धृ॒तव्र॑तो॒ वरु॑णः प॒स्त्या॒३॒॑स्वा । साम्रा॑ज्याय सु॒क्रतुः॑ ॥

ní ṣasāda dhṛtávrato váruṇaḥ pastyā́svā́ ǀ sā́mrājyāya sukrátuḥ ǁ

अतो॒ विश्वा॒न्यद्भु॑ता चिकि॒त्वाँ अ॒भि प॑श्यति । कृ॒तानि॒ या च॒ कर्त्वा॑ ॥

áto víśvānyádbhutā cikitvā́m̐ abhí paśyati ǀ kṛtā́ni yā́ ca kártvā ǁ

स नो॑ वि॒श्वाहा॑ सु॒क्रतु॑रादि॒त्यः सु॒पथा॑ करत् । प्र ण॒ आयूं॑षि तारिषत् ॥

sá no viśvā́hā sukráturādityáḥ supáthā karat ǀ prá ṇa ā́yūṃṣi tāriṣat ǁ

बिभ्र॑द्द्रा॒पिं हि॑र॒ण्ययं॒ वरु॑णो वस्त नि॒र्णिजं॑ । परि॒ स्पशो॒ नि षे॑दिरे ॥

bíbhraddrāpím hiraṇyáyam váruṇo vasta nirṇíjam ǀ pári spáśo ní ṣedire ǁ

न यं दिप्सं॑ति दि॒प्सवो॒ न द्रुह्वा॑णो॒ जना॑नां । न दे॒वम॒भिमा॑तयः ॥

ná yám dípsanti dipsávo ná drúhvāṇo jánānām ǀ ná devámabhímātayaḥ ǁ

उ॒त यो मानु॑षे॒ष्वा यश॑श्च॒क्रे असा॒म्या । अ॒स्माक॑मु॒दरे॒ष्वा ॥

utá yó mā́nuṣeṣvā́ yáśaścakré ásāmyā́ ǀ asmā́kamudáreṣvā́ ǁ

परा॑ मे यंति धी॒तयो॒ गावो॒ न गव्यू॑ती॒रनु॑ । इ॒च्छंती॑रुरु॒चक्ष॑सं ॥

párā me yanti dhītáyo gā́vo ná gávyūtīránu ǀ icchántīrurucákṣasam ǁ

सं नु वो॑चावहै॒ पुन॒र्यतो॑ मे॒ मध्वाभृ॑तं । होते॑व॒ क्षद॑से प्रि॒यं ॥

sám nú vocāvahai púnaryáto me mádhvā́bhṛtam ǀ hóteva kṣádase priyám ǁ

दर्शं॒ नु वि॒श्वद॑र्शतं॒ दर्शं॒ रथ॒मधि॒ क्षमि॑ । ए॒ता जु॑षत मे॒ गिरः॑ ॥

dárśam nú viśvádarśatam dárśam ráthamádhi kṣámi ǀ etā́ juṣata me gíraḥ ǁ

इ॒मं मे॑ वरुण श्रुधी॒ हव॑म॒द्या च॑ मृळय । त्वाम॑व॒स्युरा च॑के ॥

imám me varuṇa śrudhī hávamadyā́ ca mṛḷaya ǀ tvā́mavasyúrā́ cake ǁ

त्वं विश्व॑स्य मेधिर दि॒वश्च॒ ग्मश्च॑ राजसि । स याम॑नि॒ प्रति॑ श्रुधि ॥

tvám víśvasya medhira diváśca gmáśca rājasi ǀ sá yā́mani práti śrudhi ǁ

उदु॑त्त॒मं मु॑मुग्धि नो॒ वि पाशं॑ मध्य॒मं चृ॑त । अवा॑ध॒मानि॑ जी॒वसे॑ ॥

úduttamám mumugdhi no ví pā́śam madhyamám cṛta ǀ ávādhamā́ni jīváse ǁ