ವರುಣನ ಕೃಪೆ ಮತ್ತು ಪಾಶ ವಿಮೋಚನೆ - Rigveda Maṇḍala 1, Sūkta 25

ಯಚ್ಚಿ॒ದ್ಧಿ ತೇ॒ ವಿಶೋ॑ ಯಥಾ॒ ಪ್ರ ದೇ॑ವ ವರುಣ ವ್ರ॒ತಂ । ಮಿ॒ನೀ॒ಮಸಿ॒ ದ್ಯವಿ॑ದ್ಯವಿ ॥

यच्चि॒द्धि ते॒ विशो॑ यथा॒ प्र दे॑व वरुण व्र॒तं । मि॒नी॒मसि॒ द्यवि॑द्यवि ॥

ಮಾ ನೋ॑ ವ॒ಧಾಯ॑ ಹ॒ತ್ನವೇ॑ ಜಿಹೀಳಾ॒ನಸ್ಯ॑ ರೀರಧಃ । ಮಾ ಹೃ॑ಣಾ॒ನಸ್ಯ॑ ಮ॒ನ್ಯವೇ॑ ॥

मा नो॑ व॒धाय॑ ह॒त्नवे॑ जिहीळा॒नस्य॑ रीरधः । मा हृ॑णा॒नस्य॑ म॒न्यवे॑ ॥

ವಿ ಮೃ॑ಳೀ॒ಕಾಯ॑ ತೇ॒ ಮನೋ॑ ರ॒ಥೀರಶ್ವಂ॒ ನ ಸಂದಿ॑ತಂ । ಗೀ॒ರ್ಭಿರ್ವ॑ರುಣ ಸೀಮಹಿ ॥

वि मृ॑ळी॒काय॑ ते॒ मनो॑ र॒थीरश्वं॒ न संदि॑तं । गी॒र्भिर्व॑रुण सीमहि ॥

ಪರಾ॒ ಹಿ ಮೇ॒ ವಿಮ॑ನ್ಯವಃ॒ ಪತಂ॑ತಿ॒ ವಸ್ಯ॑ಇಷ್ಟಯೇ । ವಯೋ॒ ನ ವ॑ಸ॒ತೀರುಪ॑ ॥

परा॒ हि मे॒ विम॑न्यवः॒ पतं॑ति॒ वस्य॑इष्टये । वयो॒ न व॑स॒तीरुप॑ ॥

ಕ॒ದಾ ಕ್ಷ॑ತ್ರ॒ಶ್ರಿಯಂ॒ ನರ॒ಮಾ ವರು॑ಣಂ ಕರಾಮಹೇ । ಮೃ॒ಳೀ॒ಕಾಯೋ॑ರು॒ಚಕ್ಷ॑ಸಂ ॥

क॒दा क्ष॑त्र॒श्रियं॒ नर॒मा वरु॑णं करामहे । मृ॒ळी॒कायो॑रु॒चक्ष॑सं ॥

ತದಿತ್ಸ॑ಮಾ॒ನಮಾ॑ಶಾತೇ॒ ವೇನಂ॑ತಾ॒ ನ ಪ್ರ ಯು॑ಚ್ಛತಃ । ಧೃ॒ತವ್ರ॑ತಾಯ ದಾ॒ಶುಷೇ॑ ॥

तदित्स॑मा॒नमा॑शाते॒ वेनं॑ता॒ न प्र यु॑च्छतः । धृ॒तव्र॑ताय दा॒शुषे॑ ॥

ವೇದಾ॒ ಯೋ ವೀ॒ನಾಂ ಪ॒ದಮಂ॒ತರಿ॑ಕ್ಷೇಣ॒ ಪತ॑ತಾಂ । ವೇದ॑ ನಾ॒ವಃ ಸ॑ಮು॒ದ್ರಿಯಃ॑ ॥

वेदा॒ यो वी॒नां प॒दमं॒तरि॑क्षेण॒ पत॑तां । वेद॑ ना॒वः स॑मु॒द्रियः॑ ॥

ವೇದ॑ ಮಾ॒ಸೋ ಧೃ॒ತವ್ರ॑ತೋ॒ ದ್ವಾದ॑ಶ ಪ್ರ॒ಜಾವ॑ತಃ । ವೇದಾ॒ ಯ ಉ॑ಪ॒ಜಾಯ॑ತೇ ॥

वेद॑ मा॒सो धृ॒तव्र॑तो॒ द्वाद॑श प्र॒जाव॑तः । वेदा॒ य उ॑प॒जाय॑ते ॥

ವೇದ॒ ವಾತ॑ಸ್ಯ ವರ್ತ॒ನಿಮು॒ರೋರ್ಋ॒ಷ್ವಸ್ಯ॑ ಬೃಹ॒ತಃ । ವೇದಾ॒ ಯೇ ಅ॒ಧ್ಯಾಸ॑ತೇ ॥

वेद॒ वात॑स्य वर्त॒निमु॒रोर्ऋ॒ष्वस्य॑ बृह॒तः । वेदा॒ ये अ॒ध्यास॑ते ॥

ನಿ ಷ॑ಸಾದ ಧೃ॒ತವ್ರ॑ತೋ॒ ವರು॑ಣಃ ಪ॒ಸ್ತ್ಯಾ॒೩॒॑ಸ್ವಾ । ಸಾಮ್ರಾ॑ಜ್ಯಾಯ ಸು॒ಕ್ರತುಃ॑ ॥

नि ष॑साद धृ॒तव्र॑तो॒ वरु॑णः प॒स्त्या॒३॒॑स्वा । साम्रा॑ज्याय सु॒क्रतुः॑ ॥

ಅತೋ॒ ವಿಶ್ವಾ॒ನ್ಯದ್ಭು॑ತಾ ಚಿಕಿ॒ತ್ವಾಁ ಅ॒ಭಿ ಪ॑ಶ್ಯತಿ । ಕೃ॒ತಾನಿ॒ ಯಾ ಚ॒ ಕರ್ತ್ವಾ॑ ॥

अतो॒ विश्वा॒न्यद्भु॑ता चिकि॒त्वाँ अ॒भि प॑श्यति । कृ॒तानि॒ या च॒ कर्त्वा॑ ॥

ಸ ನೋ॑ ವಿ॒ಶ್ವಾಹಾ॑ ಸು॒ಕ್ರತು॑ರಾದಿ॒ತ್ಯಃ ಸು॒ಪಥಾ॑ ಕರತ್ । ಪ್ರ ಣ॒ ಆಯೂಂ॑ಷಿ ತಾರಿಷತ್ ॥

स नो॑ वि॒श्वाहा॑ सु॒क्रतु॑रादि॒त्यः सु॒पथा॑ करत् । प्र ण॒ आयूं॑षि तारिषत् ॥

ಬಿಭ್ರ॑ದ್ದ್ರಾ॒ಪಿಂ ಹಿ॑ರ॒ಣ್ಯಯಂ॒ ವರು॑ಣೋ ವಸ್ತ ನಿ॒ರ್ಣಿಜಂ॑ । ಪರಿ॒ ಸ್ಪಶೋ॒ ನಿ ಷೇ॑ದಿರೇ ॥

बिभ्र॑द्द्रा॒पिं हि॑र॒ण्ययं॒ वरु॑णो वस्त नि॒र्णिजं॑ । परि॒ स्पशो॒ नि षे॑दिरे ॥

ನ ಯಂ ದಿಪ್ಸಂ॑ತಿ ದಿ॒ಪ್ಸವೋ॒ ನ ದ್ರುಹ್ವಾ॑ಣೋ॒ ಜನಾ॑ನಾಂ । ನ ದೇ॒ವಮ॒ಭಿಮಾ॑ತಯಃ ॥

न यं दिप्सं॑ति दि॒प्सवो॒ न द्रुह्वा॑णो॒ जना॑नां । न दे॒वम॒भिमा॑तयः ॥

ಉ॒ತ ಯೋ ಮಾನು॑ಷೇ॒ಷ್ವಾ ಯಶ॑ಶ್ಚ॒ಕ್ರೇ ಅಸಾ॒ಮ್ಯಾ । ಅ॒ಸ್ಮಾಕ॑ಮು॒ದರೇ॒ಷ್ವಾ ॥

उ॒त यो मानु॑षे॒ष्वा यश॑श्च॒क्रे असा॒म्या । अ॒स्माक॑मु॒दरे॒ष्वा ॥

ಪರಾ॑ ಮೇ ಯಂತಿ ಧೀ॒ತಯೋ॒ ಗಾವೋ॒ ನ ಗವ್ಯೂ॑ತೀ॒ರನು॑ । ಇ॒ಚ್ಛಂತೀ॑ರುರು॒ಚಕ್ಷ॑ಸಂ ॥

परा॑ मे यंति धी॒तयो॒ गावो॒ न गव्यू॑ती॒रनु॑ । इ॒च्छंती॑रुरु॒चक्ष॑सं ॥

ಸಂ ನು ವೋ॑ಚಾವಹೈ॒ ಪುನ॒ರ್ಯತೋ॑ ಮೇ॒ ಮಧ್ವಾಭೃ॑ತಂ । ಹೋತೇ॑ವ॒ ಕ್ಷದ॑ಸೇ ಪ್ರಿ॒ಯಂ ॥

सं नु वो॑चावहै॒ पुन॒र्यतो॑ मे॒ मध्वाभृ॑तं । होते॑व॒ क्षद॑से प्रि॒यं ॥

ದರ್ಶಂ॒ ನು ವಿ॒ಶ್ವದ॑ರ್ಶತಂ॒ ದರ್ಶಂ॒ ರಥ॒ಮಧಿ॒ ಕ್ಷಮಿ॑ । ಏ॒ತಾ ಜು॑ಷತ ಮೇ॒ ಗಿರಃ॑ ॥

दर्शं॒ नु वि॒श्वद॑र्शतं॒ दर्शं॒ रथ॒मधि॒ क्षमि॑ । ए॒ता जु॑षत मे॒ गिरः॑ ॥

ಇ॒ಮಂ ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಳಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥

इ॒मं मे॑ वरुण श्रुधी॒ हव॑म॒द्या च॑ मृळय । त्वाम॑व॒स्युरा च॑के ॥

ತ್ವಂ ವಿಶ್ವ॑ಸ್ಯ ಮೇಧಿರ ದಿ॒ವಶ್ಚ॒ ಗ್ಮಶ್ಚ॑ ರಾಜಸಿ । ಸ ಯಾಮ॑ನಿ॒ ಪ್ರತಿ॑ ಶ್ರುಧಿ ॥

त्वं विश्व॑स्य मेधिर दि॒वश्च॒ ग्मश्च॑ राजसि । स याम॑नि॒ प्रति॑ श्रुधि ॥

ಉದು॑ತ್ತ॒ಮಂ ಮು॑ಮುಗ್ಧಿ ನೋ॒ ವಿ ಪಾಶಂ॑ ಮಧ್ಯ॒ಮಂ ಚೃ॑ತ । ಅವಾ॑ಧ॒ಮಾನಿ॑ ಜೀ॒ವಸೇ॑ ॥

उदु॑त्त॒मं मु॑मुग्धि नो॒ वि पाशं॑ मध्य॒मं चृ॑त । अवा॑ध॒मानि॑ जी॒वसे॑ ॥