ದೈವಿಕ ಆಹ್ವಾನ ಮತ್ತು ಪವಿತ್ರ ನೀರಿನ ಗುಣಪಡಿಸುವಿಕೆ (Rigveda Maṇḍala 1, Sūkta 23)

ತೀ॒ವ್ರಾಃ ಸೋಮಾ॑ಸ॒ ಆ ಗ॑ಹ್ಯಾ॒ಶೀರ್ವಂ॑ತಃ ಸು॒ತಾ ಇ॒ಮೇ । ವಾಯೋ॒ ತಾನ್ಪ್ರಸ್ಥಿ॑ತಾನ್ಪಿಬ ॥

ती॒व्राः सोमा॑स॒ आ ग॑ह्या॒शीर्वं॑तः सु॒ता इ॒मे । वायो॒ तान्प्रस्थि॑तान्पिब ॥

ಉ॒ಭಾ ದೇ॒ವಾ ದಿ॑ವಿ॒ಸ್ಪೃಶೇಂ॑ದ್ರವಾ॒ಯೂ ಹ॑ವಾಮಹೇ । ಅ॒ಸ್ಯ ಸೋಮ॑ಸ್ಯ ಪೀ॒ತಯೇ॑ ॥

उ॒भा दे॒वा दि॑वि॒स्पृशें॑द्रवा॒यू ह॑वामहे । अ॒स्य सोम॑स्य पी॒तये॑ ॥

ಇಂ॒ದ್ರ॒ವಾ॒ಯೂ ಮ॑ನೋ॒ಜುವಾ॒ ವಿಪ್ರಾ॑ ಹವಂತ ಊ॒ತಯೇ॑ । ಸ॒ಹ॒ಸ್ರಾ॒ಕ್ಷಾ ಧಿ॒ಯಸ್ಪತೀ॑ ॥

इं॒द्र॒वा॒यू म॑नो॒जुवा॒ विप्रा॑ हवंत ऊ॒तये॑ । स॒ह॒स्रा॒क्षा धि॒यस्पती॑ ॥

ಮಿ॒ತ್ರಂ ವ॒ಯಂ ಹ॑ವಾಮಹೇ॒ ವರು॑ಣಂ॒ ಸೋಮ॑ಪೀತಯೇ । ಜ॒ಜ್ಞಾ॒ನಾ ಪೂ॒ತದ॑ಕ್ಷಸಾ ॥

मि॒त्रं व॒यं ह॑वामहे॒ वरु॑णं॒ सोम॑पीतये । ज॒ज्ञा॒ना पू॒तद॑क्षसा ॥

ಋ॒ತೇನ॒ ಯಾವೃ॑ತಾ॒ವೃಧಾ॑ವೃ॒ತಸ್ಯ॒ ಜ್ಯೋತಿ॑ಷ॒ಸ್ಪತೀ॑ । ತಾ ಮಿ॒ತ್ರಾವರು॑ಣಾ ಹುವೇ ॥

ऋ॒तेन॒ यावृ॑ता॒वृधा॑वृ॒तस्य॒ ज्योति॑ष॒स्पती॑ । ता मि॒त्रावरु॑णा हुवे ॥

ವರು॑ಣಃ ಪ್ರಾವಿ॒ತಾ ಭು॑ವನ್ಮಿ॒ತ್ರೋ ವಿಶ್ವಾ॑ಭಿರೂ॒ತಿಭಿಃ॑ । ಕರ॑ತಾಂ ನಃ ಸು॒ರಾಧ॑ಸಃ ॥

वरु॑णः प्रावि॒ता भु॑वन्मि॒त्रो विश्वा॑भिरू॒तिभिः॑ । कर॑तां नः सु॒राध॑सः ॥

ಮ॒ರುತ್ವಂ॑ತಂ ಹವಾಮಹ॒ ಇಂದ್ರ॒ಮಾ ಸೋಮ॑ಪೀತಯೇ । ಸ॒ಜೂರ್ಗ॒ಣೇನ॑ ತೃಂಪತು ॥

म॒रुत्वं॑तं हवामह॒ इंद्र॒मा सोम॑पीतये । स॒जूर्ग॒णेन॑ तृंपतु ॥

ಇಂದ್ರ॑ಜ್ಯೇಷ್ಠಾ॒ ಮರು॑ದ್ಗಣಾ॒ ದೇವಾ॑ಸಃ॒ ಪೂಷ॑ರಾತಯಃ । ವಿಶ್ವೇ॒ ಮಮ॑ ಶ್ರುತಾ॒ ಹವಂ॑ ॥

इंद्र॑ज्येष्ठा॒ मरु॑द्गणा॒ देवा॑सः॒ पूष॑रातयः । विश्वे॒ मम॑ श्रुता॒ हवं॑ ॥

ಹ॒ತ ವೃ॒ತ್ರಂ ಸು॑ದಾನವ॒ ಇಂದ್ರೇ॑ಣ॒ ಸಹ॑ಸಾ ಯು॒ಜಾ । ಮಾ ನೋ॑ ದುಃ॒ಶಂಸ॑ ಈಶತ ॥

ह॒त वृ॒त्रं सु॑दानव॒ इंद्रे॑ण॒ सह॑सा यु॒जा । मा नो॑ दुः॒शंस॑ ईशत ॥

ವಿಶ್ವಾ॑ನ್ದೇ॒ವಾನ್ಹ॑ವಾಮಹೇ ಮ॒ರುತಃ॒ ಸೋಮ॑ಪೀತಯೇ । ಉ॒ಗ್ರಾ ಹಿ ಪೃಶ್ನಿ॑ಮಾತರಃ ॥

विश्वा॑न्दे॒वान्ह॑वामहे म॒रुतः॒ सोम॑पीतये । उ॒ग्रा हि पृश्नि॑मातरः ॥

ಜಯ॑ತಾಮಿವ ತನ್ಯ॒ತುರ್ಮ॒ರುತಾ॑ಮೇತಿ ಧೃಷ್ಣು॒ಯಾ । ಯಚ್ಛುಭಂ॑ ಯಾ॒ಥನಾ॑ ನರಃ ॥

जय॑तामिव तन्य॒तुर्म॒रुता॑मेति धृष्णु॒या । यच्छुभं॑ या॒थना॑ नरः ॥

ಹ॒ಸ್ಕಾ॒ರಾದ್ವಿ॒ದ್ಯುತ॒ಸ್ಪರ್ಯತೋ॑ ಜಾ॒ತಾ ಅ॑ವಂತು ನಃ । ಮ॒ರುತೋ॑ ಮೃಳಯಂತು ನಃ ॥

ह॒स्का॒राद्वि॒द्युत॒स्पर्यतो॑ जा॒ता अ॑वंतु नः । म॒रुतो॑ मृळयंतु नः ॥

ಆ ಪೂ॑ಷಞ್ಚಿ॒ತ್ರಬ॑ರ್ಹಿಷ॒ಮಾಘೃ॑ಣೇ ಧ॒ರುಣಂ॑ ದಿ॒ವಃ । ಆಜಾ॑ ನ॒ಷ್ಟಂ ಯಥಾ॑ ಪ॒ಶುಂ ॥

आ पू॑षञ्चि॒त्रब॑र्हिष॒माघृ॑णे ध॒रुणं॑ दि॒वः । आजा॑ न॒ष्टं यथा॑ प॒शुं ॥

ಪೂ॒ಷಾ ರಾಜಾ॑ನ॒ಮಾಘೃ॑ಣಿ॒ರಪ॑ಗೂಳ್ಹಂ॒ ಗುಹಾ॑ ಹಿ॒ತಂ । ಅವಿಂ॑ದಚ್ಚಿ॒ತ್ರಬ॑ರ್ಹಿಷಂ ॥

पू॒षा राजा॑न॒माघृ॑णि॒रप॑गूळ्हं॒ गुहा॑ हि॒तं । अविं॑दच्चि॒त्रब॑र्हिषं ॥

ಉ॒ತೋ ಸ ಮಹ್ಯ॒ಮಿಂದು॑ಭಿಃ॒ ಷಡ್ಯು॒ಕ್ತಾಁ ಅ॑ನು॒ಸೇಷಿ॑ಧತ್ । ಗೋಭಿ॒ರ್ಯವಂ॒ ನ ಚ॑ರ್ಕೃಷತ್ ॥

उ॒तो स मह्य॒मिंदु॑भिः॒ षड्यु॒क्ताँ अ॑नु॒सेषि॑धत् । गोभि॒र्यवं॒ न च॑र्कृषत् ॥

ಅಂ॒ಬಯೋ॑ ಯಂ॒ತ್ಯಧ್ವ॑ಭಿರ್ಜಾ॒ಮಯೋ॑ ಅಧ್ವರೀಯ॒ತಾಂ । ಪೃಂ॒ಚ॒ತೀರ್ಮಧು॑ನಾ॒ ಪಯಃ॑ ॥

अं॒बयो॑ यं॒त्यध्व॑भिर्जा॒मयो॑ अध्वरीय॒तां । पृं॒च॒तीर्मधु॑ना॒ पयः॑ ॥

ಅ॒ಮೂರ್ಯಾ ಉಪ॒ ಸೂರ್ಯೇ॒ ಯಾಭಿ॑ರ್ವಾ॒ ಸೂರ್ಯಃ॑ ಸ॒ಹ । ತಾ ನೋ॑ ಹಿನ್ವಂತ್ವಧ್ವ॒ರಂ ॥

अ॒मूर्या उप॒ सूर्ये॒ याभि॑र्वा॒ सूर्यः॑ स॒ह । ता नो॑ हिन्वंत्वध्व॒रं ॥

ಅ॒ಪೋ ದೇ॒ವೀರುಪ॑ ಹ್ವಯೇ॒ ಯತ್ರ॒ ಗಾವಃ॒ ಪಿಬಂ॑ತಿ ನಃ । ಸಿಂಧು॑ಭ್ಯಃ॒ ಕರ್ತ್ವಂ॑ ಹ॒ವಿಃ ॥

अ॒पो दे॒वीरुप॑ ह्वये॒ यत्र॒ गावः॒ पिबं॑ति नः । सिंधु॑भ्यः॒ कर्त्वं॑ ह॒विः ॥

ಅ॒ಪ್ಸ್ವಂ೧॒॑ತರ॒ಮೃತ॑ಮ॒ಪ್ಸು ಭೇ॑ಷ॒ಜಮ॒ಪಾಮು॒ತ ಪ್ರಶ॑ಸ್ತಯೇ । ದೇವಾ॒ ಭವ॑ತ ವಾ॒ಜಿನಃ॑ ॥

अ॒प्स्वं१॒॑तर॒मृत॑म॒प्सु भे॑ष॒जम॒पामु॒त प्रश॑स्तये । देवा॒ भव॑त वा॒जिनः॑ ॥

ಅ॒ಪ್ಸು ಮೇ॒ ಸೋಮೋ॑ ಅಬ್ರವೀದಂ॒ತರ್ವಿಶ್ವಾ॑ನಿ ಭೇಷ॒ಜಾ । ಅ॒ಗ್ನಿಂ ಚ॑ ವಿ॒ಶ್ವಶಂ॑ಭುವ॒ಮಾಪ॑ಶ್ಚ ವಿ॒ಶ್ವಭೇ॑ಷಜೀಃ ॥

अ॒प्सु मे॒ सोमो॑ अब्रवीदं॒तर्विश्वा॑नि भेष॒जा । अ॒ग्निं च॑ वि॒श्वशं॑भुव॒माप॑श्च वि॒श्वभे॑षजीः ॥

ಆಪಃ॑ ಪೃಣೀ॒ತ ಭೇ॑ಷ॒ಜಂ ವರೂ॑ಥಂ ತ॒ನ್ವೇ॒೩॒॑ ಮಮ॑ । ಜ್ಯೋಕ್ ಚ॒ ಸೂರ್ಯಂ॑ ದೃ॒ಶೇ ॥

आपः॑ पृणी॒त भे॑ष॒जं वरू॑थं त॒न्वे॒३॒॑ मम॑ । ज्योक् च॒ सूर्यं॑ दृ॒शे ॥

ಇ॒ದಮಾ॑ಪಃ॒ ಪ್ರ ವ॑ಹತ॒ ಯತ್ಕಿಂ ಚ॑ ದುರಿ॒ತಂ ಮಯಿ॑ । ಯದ್ವಾ॒ಹಮ॑ಭಿದು॒ದ್ರೋಹ॒ ಯದ್ವಾ॑ ಶೇ॒ಪ ಉ॒ತಾನೃ॑ತಂ ॥

इ॒दमा॑पः॒ प्र व॑हत॒ यत्किं च॑ दुरि॒तं मयि॑ । यद्वा॒हम॑भिदु॒द्रोह॒ यद्वा॑ शे॒प उ॒तानृ॑तं ॥

ಆಪೋ॑ ಅ॒ದ್ಯಾನ್ವ॑ಚಾರಿಷಂ॒ ರಸೇ॑ನ॒ ಸಮ॑ಗಸ್ಮಹಿ । ಪಯ॑ಸ್ವಾನಗ್ನ॒ ಆ ಗ॑ಹಿ॒ ತಂ ಮಾ॒ ಸಂ ಸೃ॑ಜ॒ ವರ್ಚ॑ಸಾ ॥

आपो॑ अ॒द्यान्व॑चारिषं॒ रसे॑न॒ सम॑गस्महि । पय॑स्वानग्न॒ आ ग॑हि॒ तं मा॒ सं सृ॑ज॒ वर्च॑सा ॥

ಸಂ ಮಾ॑ಗ್ನೇ॒ ವರ್ಚ॑ಸಾ ಸೃಜ॒ ಸಂ ಪ್ರ॒ಜಯಾ॒ ಸಮಾಯು॑ಷಾ । ವಿ॒ದ್ಯುರ್ಮೇ॑ ಅಸ್ಯ ದೇ॒ವಾ ಇಂದ್ರೋ॑ ವಿದ್ಯಾತ್ಸ॒ಹ ಋಷಿ॑ಭಿಃ ॥

सं मा॑ग्ने॒ वर्च॑सा सृज॒ सं प्र॒जया॒ समायु॑षा । वि॒द्युर्मे॑ अस्य दे॒वा इंद्रो॑ विद्यात्स॒ह ऋषि॑भिः ॥