ಅಶ್ವಿನಿ, ಸವಿತೃ ಮತ್ತು ವಿಷ್ಣುವಿನ ಪರಮ ಪದದ ಸ್ತುತಿ

ಪ್ರಾ॒ತ॒ರ್ಯುಜಾ॒ ವಿ ಬೋ॑ಧಯಾ॒ಶ್ವಿನಾ॒ವೇಹ ಗ॑ಚ್ಛತಾಂ । ಅ॒ಸ್ಯ ಸೋಮ॑ಸ್ಯ ಪೀ॒ತಯೇ॑ ॥

प्रा॒त॒र्युजा॒ वि बो॑धया॒श्विना॒वेह ग॑च्छतां । अ॒स्य सोम॑स्य पी॒तये॑ ॥

ಯಾ ಸು॒ರಥಾ॑ ರ॒ಥೀತ॑ಮೋ॒ಭಾ ದೇ॒ವಾ ದಿ॑ವಿ॒ಸ್ಪೃಶಾ॑ । ಅ॒ಶ್ವಿನಾ॒ ತಾ ಹ॑ವಾಮಹೇ ॥

या सु॒रथा॑ र॒थीत॑मो॒भा दे॒वा दि॑वि॒स्पृशा॑ । अ॒श्विना॒ ता ह॑वामहे ॥

ಯಾ ವಾಂ॒ ಕಶಾ॒ ಮಧು॑ಮ॒ತ್ಯಶ್ವಿ॑ನಾ ಸೂ॒ನೃತಾ॑ವತೀ । ತಯಾ॑ ಯ॒ಜ್ಞಂ ಮಿ॑ಮಿಕ್ಷತಂ ॥

या वां॒ कशा॒ मधु॑म॒त्यश्वि॑ना सू॒नृता॑वती । तया॑ य॒ज्ञं मि॑मिक्षतं ॥

ನ॒ಹಿ ವಾ॒ಮಸ್ತಿ॑ ದೂರ॒ಕೇ ಯತ್ರಾ॒ ರಥೇ॑ನ॒ ಗಚ್ಛ॑ಥಃ । ಅಶ್ವಿ॑ನಾ ಸೋ॒ಮಿನೋ॑ ಗೃ॒ಹಂ ॥

न॒हि वा॒मस्ति॑ दूर॒के यत्रा॒ रथे॑न॒ गच्छ॑थः । अश्वि॑ना सो॒मिनो॑ गृ॒हं ॥

ಹಿರ॑ಣ್ಯಪಾಣಿಮೂ॒ತಯೇ॑ ಸವಿ॒ತಾರ॒ಮುಪ॑ ಹ್ವಯೇ । ಸ ಚೇತ್ತಾ॑ ದೇ॒ವತಾ॑ ಪ॒ದಂ ॥

हिर॑ण्यपाणिमू॒तये॑ सवि॒तार॒मुप॑ ह्वये । स चेत्ता॑ दे॒वता॑ प॒दं ॥

ಅ॒ಪಾಂ ನಪಾ॑ತ॒ಮವ॑ಸೇ ಸವಿ॒ತಾರ॒ಮುಪ॑ ಸ್ತುಹಿ । ತಸ್ಯ॑ ವ್ರ॒ತಾನ್ಯು॑ಶ್ಮಸಿ ॥

अ॒पां नपा॑त॒मव॑से सवि॒तार॒मुप॑ स्तुहि । तस्य॑ व्र॒तान्यु॑श्मसि ॥

ವಿ॒ಭ॒ಕ್ತಾರಂ॑ ಹವಾಮಹೇ॒ ವಸೋ॑ಶ್ಚಿ॒ತ್ರಸ್ಯ॒ ರಾಧ॑ಸಃ । ಸ॒ವಿ॒ತಾರಂ॑ ನೃ॒ಚಕ್ಷ॑ಸಂ ॥

वि॒भ॒क्तारं॑ हवामहे॒ वसो॑श्चि॒त्रस्य॒ राध॑सः । स॒वि॒तारं॑ नृ॒चक्ष॑सं ॥

ಸಖಾ॑ಯ॒ ಆ ನಿ ಷೀ॑ದತ ಸವಿ॒ತಾ ಸ್ತೋಮ್ಯೋ॒ ನು ನಃ॑ । ದಾತಾ॒ ರಾಧಾಂ॑ಸಿ ಶುಂಭತಿ ॥

सखा॑य॒ आ नि षी॑दत सवि॒ता स्तोम्यो॒ नु नः॑ । दाता॒ राधां॑सि शुंभति ॥

ಅಗ್ನೇ॒ ಪತ್ನೀ॑ರಿ॒ಹಾ ವ॑ಹ ದೇ॒ವಾನಾ॑ಮುಶ॒ತೀರುಪ॑ । ತ್ವಷ್ಟಾ॑ರಂ॒ ಸೋಮ॑ಪೀತಯೇ ॥

अग्ने॒ पत्नी॑रि॒हा व॑ह दे॒वाना॑मुश॒तीरुप॑ । त्वष्टा॑रं॒ सोम॑पीतये ॥

ಆ ಗ್ನಾ ಅ॑ಗ್ನ ಇ॒ಹಾವ॑ಸೇ॒ ಹೋತ್ರಾಂ॑ ಯವಿಷ್ಠ॒ ಭಾರ॑ತೀಂ । ವರೂ॑ತ್ರೀಂ ಧಿ॒ಷಣಾಂ॑ ವಹ ॥

आ ग्ना अ॑ग्न इ॒हाव॑से॒ होत्रां॑ यविष्ठ॒ भार॑तीं । वरू॑त्रीं धि॒षणां॑ वह ॥

ಅ॒ಭಿ ನೋ॑ ದೇ॒ವೀರವ॑ಸಾ ಮ॒ಹಃ ಶರ್ಮ॑ಣಾ ನೃ॒ಪತ್ನೀಃ॑ । ಅಚ್ಛಿ॑ನ್ನಪತ್ರಾಃ ಸಚಂತಾಂ ॥

अ॒भि नो॑ दे॒वीरव॑सा म॒हः शर्म॑णा नृ॒पत्नीः॑ । अच्छि॑न्नपत्राः सचंतां ॥

ಇ॒ಹೇಂದ್ರಾ॒ಣೀಮುಪ॑ ಹ್ವಯೇ ವರುಣಾ॒ನೀಂ ಸ್ವ॒ಸ್ತಯೇ॑ । ಅ॒ಗ್ನಾಯೀಂ॒ ಸೋಮ॑ಪೀತಯೇ ॥

इ॒हेंद्रा॒णीमुप॑ ह्वये वरुणा॒नीं स्व॒स्तये॑ । अ॒ग्नायीं॒ सोम॑पीतये ॥

ಮ॒ಹೀ ದ್ಯೌಃ ಪೃ॑ಥಿ॒ವೀ ಚ॑ ನ ಇ॒ಮಂ ಯ॒ಜ್ಞಂ ಮಿ॑ಮಿಕ್ಷತಾಂ । ಪಿ॒ಪೃ॒ತಾಂ ನೋ॒ ಭರೀ॑ಮಭಿಃ ॥

म॒ही द्यौः पृ॑थि॒वी च॑ न इ॒मं य॒ज्ञं मि॑मिक्षतां । पि॒पृ॒तां नो॒ भरी॑मभिः ॥

ತಯೋ॒ರಿದ್ಘೃ॒ತವ॒ತ್ಪಯೋ॒ ವಿಪ್ರಾ॑ ರಿಹಂತಿ ಧೀ॒ತಿಭಿಃ॑ । ಗಂ॒ಧ॒ರ್ವಸ್ಯ॑ ಧ್ರು॒ವೇ ಪ॒ದೇ ॥

तयो॒रिद्घृ॒तव॒त्पयो॒ विप्रा॑ रिहंति धी॒तिभिः॑ । गं॒ध॒र्वस्य॑ ध्रु॒वे प॒दे ॥

ಸ್ಯೋ॒ನಾ ಪೃ॑ಥಿವಿ ಭವಾನೃಕ್ಷ॒ರಾ ನಿ॒ವೇಶ॑ನೀ । ಯಚ್ಛಾ॑ ನಃ॒ ಶರ್ಮ॑ ಸ॒ಪ್ರಥಃ॑ ॥

स्यो॒ना पृ॑थिवि भवानृक्ष॒रा नि॒वेश॑नी । यच्छा॑ नः॒ शर्म॑ स॒प्रथः॑ ॥

ಅತೋ॑ ದೇ॒ವಾ ಅ॑ವಂತು ನೋ॒ ಯತೋ॒ ವಿಷ್ಣು॑ರ್ವಿಚಕ್ರ॒ಮೇ । ಪೃ॒ಥಿ॒ವ್ಯಾಃ ಸ॒ಪ್ತ ಧಾಮ॑ಭಿಃ ॥

अतो॑ दे॒वा अ॑वंतु नो॒ यतो॒ विष्णु॑र्विचक्र॒मे । पृ॒थि॒व्याः स॒प्त धाम॑भिः ॥

ಇ॒ದಂ ವಿಷ್ಣು॒ರ್ವಿ ಚ॑ಕ್ರಮೇ ತ್ರೇ॒ಧಾ ನಿ ದ॑ಧೇ ಪ॒ದಂ । ಸಮೂ॑ಳ್ಹಮಸ್ಯ ಪಾಂಸು॒ರೇ ॥

इ॒दं विष्णु॒र्वि च॑क्रमे त्रे॒धा नि द॑धे प॒दं । समू॑ळ्हमस्य पांसु॒रे ॥

ತ್ರೀಣಿ॑ ಪ॒ದಾ ವಿ ಚ॑ಕ್ರಮೇ॒ ವಿಷ್ಣು॑ರ್ಗೋ॒ಪಾ ಅದಾ॑ಭ್ಯಃ । ಅತೋ॒ ಧರ್ಮಾ॑ಣಿ ಧಾ॒ರಯ॑ನ್ ॥

त्रीणि॑ प॒दा वि च॑क्रमे॒ विष्णु॑र्गो॒पा अदा॑भ्यः । अतो॒ धर्मा॑णि धा॒रय॑न् ॥

ವಿಷ್ಣೋಃ॒ ಕರ್ಮಾ॑ಣಿ ಪಶ್ಯತ॒ ಯತೋ॑ ವ್ರ॒ತಾನಿ॑ ಪಸ್ಪ॒ಶೇ । ಇಂದ್ರ॑ಸ್ಯ॒ ಯುಜ್ಯಃ॒ ಸಖಾ॑ ॥

विष्णोः॒ कर्मा॑णि पश्यत॒ यतो॑ व्र॒तानि॑ पस्प॒शे । इंद्र॑स्य॒ युज्यः॒ सखा॑ ॥

ತದ್ವಿಷ್ಣೋಃ॑ ಪರ॒ಮಂ ಪ॒ದಂ ಸದಾ॑ ಪಶ್ಯಂತಿ ಸೂ॒ರಯಃ॑ । ದಿ॒ವೀ॑ವ॒ ಚಕ್ಷು॒ರಾತ॑ತಂ ॥

तद्विष्णोः॑ पर॒मं प॒दं सदा॑ पश्यंति सू॒रयः॑ । दि॒वी॑व॒ चक्षु॒रात॑तं ॥

ತದ್ವಿಪ್ರಾ॑ಸೋ ವಿಪ॒ನ್ಯವೋ॑ ಜಾಗೃ॒ವಾಂಸಃ॒ ಸಮಿಂ॑ಧತೇ । ವಿಷ್ಣೋ॒ರ್ಯತ್ಪ॑ರ॒ಮಂ ಪ॒ದಂ ॥

तद्विप्रा॑सो विप॒न्यवो॑ जागृ॒वांसः॒ समिं॑धते । विष्णो॒र्यत्प॑र॒मं प॒दं ॥