Sūkta 22

प्रा॒त॒र्युजा॒ वि बो॑धया॒श्विना॒वेह ग॑च्छतां । अ॒स्य सोम॑स्य पी॒तये॑ ॥

prātaryújā ví bodhayāśvínāvéhá gacchatām ǀ asyá sómasya pītáye ǁ

या सु॒रथा॑ र॒थीत॑मो॒भा दे॒वा दि॑वि॒स्पृशा॑ । अ॒श्विना॒ ता ह॑वामहे ॥

yā́ suráthā rathī́tamobhā́ devā́ divispṛ́śā ǀ aśvínā tā́ havāmahe ǁ

या वां॒ कशा॒ मधु॑म॒त्यश्वि॑ना सू॒नृता॑वती । तया॑ य॒ज्ञं मि॑मिक्षतं ॥

yā́ vām káśā mádhumatyáśvinā sūnṛ́tāvatī ǀ táyā yajñám mimikṣatam ǁ

न॒हि वा॒मस्ति॑ दूर॒के यत्रा॒ रथे॑न॒ गच्छ॑थः । अश्वि॑ना सो॒मिनो॑ गृ॒हं ॥

nahí vāmásti dūraké yátrā ráthena gácchathaḥ ǀ áśvinā somíno gṛhám ǁ

हिर॑ण्यपाणिमू॒तये॑ सवि॒तार॒मुप॑ ह्वये । स चेत्ता॑ दे॒वता॑ प॒दं ॥

híraṇyapāṇimūtáye savitā́ramúpa hvaye ǀ sá céttā devátā padám ǁ

अ॒पां नपा॑त॒मव॑से सवि॒तार॒मुप॑ स्तुहि । तस्य॑ व्र॒तान्यु॑श्मसि ॥

apā́m nápātamávase savitā́ramúpa stuhi ǀ tásya vratā́nyuśmasi ǁ

वि॒भ॒क्तारं॑ हवामहे॒ वसो॑श्चि॒त्रस्य॒ राध॑सः । स॒वि॒तारं॑ नृ॒चक्ष॑सं ॥

vibhaktā́ram havāmahe vásościtrásya rā́dhasaḥ ǀ savitā́ram nṛcákṣasam ǁ

सखा॑य॒ आ नि षी॑दत सवि॒ता स्तोम्यो॒ नु नः॑ । दाता॒ राधां॑सि शुंभति ॥

sákhāya ā́ ní ṣīdata savitā́ stómyo nú naḥ ǀ dā́tā rā́dhāṃsi śumbhati ǁ

अग्ने॒ पत्नी॑रि॒हा व॑ह दे॒वाना॑मुश॒तीरुप॑ । त्वष्टा॑रं॒ सोम॑पीतये ॥

ágne pátnīrihā́ vaha devā́nāmuśatī́rúpa ǀ tváṣṭāram sómapītaye ǁ

आ ग्ना अ॑ग्न इ॒हाव॑से॒ होत्रां॑ यविष्ठ॒ भार॑तीं । वरू॑त्रीं धि॒षणां॑ वह ॥

ā́ gnā́ agna ihā́vase hótrām yaviṣṭha bhā́ratīm ǀ várūtrīm dhiṣáṇām vaha ǁ

अ॒भि नो॑ दे॒वीरव॑सा म॒हः शर्म॑णा नृ॒पत्नीः॑ । अच्छि॑न्नपत्राः सचंतां ॥

abhí no devī́rávasā maháḥ śármaṇā nṛpátnīḥ ǀ ácchinnapatrāḥ sacantām ǁ

इ॒हेंद्रा॒णीमुप॑ ह्वये वरुणा॒नीं स्व॒स्तये॑ । अ॒ग्नायीं॒ सोम॑पीतये ॥

ihéndrāṇī́múpa hvaye varuṇānī́m svastáye ǀ agnā́yīm sómapītaye ǁ

म॒ही द्यौः पृ॑थि॒वी च॑ न इ॒मं य॒ज्ञं मि॑मिक्षतां । पि॒पृ॒तां नो॒ भरी॑मभिः ॥

mahī́ dyáuḥ pṛthivī́ ca na imám yajñám mimikṣatām ǀ pipṛtā́m no bhárīmabhiḥ ǁ

तयो॒रिद्घृ॒तव॒त्पयो॒ विप्रा॑ रिहंति धी॒तिभिः॑ । गं॒ध॒र्वस्य॑ ध्रु॒वे प॒दे ॥

táyorídghṛtávatpáyo víprā rihanti dhītíbhiḥ ǀ gandharvásya dhruvé padé ǁ

स्यो॒ना पृ॑थिवि भवानृक्ष॒रा नि॒वेश॑नी । यच्छा॑ नः॒ शर्म॑ स॒प्रथः॑ ॥

syonā́ pṛthivi bhavānṛkṣarā́ nivéśanī ǀ yácchā naḥ śárma sapráthaḥ ǁ

अतो॑ दे॒वा अ॑वंतु नो॒ यतो॒ विष्णु॑र्विचक्र॒मे । पृ॒थि॒व्याः स॒प्त धाम॑भिः ॥

áto devā́ avantu no yáto víṣṇurvicakramé ǀ pṛthivyā́ḥ saptá dhā́mabhiḥ ǁ

इ॒दं विष्णु॒र्वि च॑क्रमे त्रे॒धा नि द॑धे प॒दं । समू॑ळ्हमस्य पांसु॒रे ॥

idám víṣṇurví cakrame tredhā́ ní dadhe padám ǀ sámūḷhamasya pāṃsuré ǁ

त्रीणि॑ प॒दा वि च॑क्रमे॒ विष्णु॑र्गो॒पा अदा॑भ्यः । अतो॒ धर्मा॑णि धा॒रय॑न् ॥

trī́ṇi padā́ ví cakrame víṣṇurgopā́ ádābhyaḥ ǀ áto dhármāṇi dhāráyan ǁ

विष्णोः॒ कर्मा॑णि पश्यत॒ यतो॑ व्र॒तानि॑ पस्प॒शे । इंद्र॑स्य॒ युज्यः॒ सखा॑ ॥

víṣṇoḥ kármāṇi paśyata yáto vratā́ni paspaśé ǀ índrasya yújyaḥ sákhā ǁ

तद्विष्णोः॑ पर॒मं प॒दं सदा॑ पश्यंति सू॒रयः॑ । दि॒वी॑व॒ चक्षु॒रात॑तं ॥

tádvíṣṇoḥ paramám padám sádā paśyanti sūráyaḥ ǀ divī́va cákṣurā́tatam ǁ

तद्विप्रा॑सो विप॒न्यवो॑ जागृ॒वांसः॒ समिं॑धते । विष्णो॒र्यत्प॑र॒मं प॒दं ॥

tádvíprāso vipanyávo jāgṛvā́ṃsaḥ sámindhate ǀ víṣṇoryátparamám padám ǁ