Sūkta 21

इ॒हेंद्रा॒ग्नी उप॑ ह्वये॒ तयो॒रित्स्तोम॑मुश्मसि । ता सोमं॑ सोम॒पात॑मा ॥

ihéndrāgnī́ úpa hvaye táyorítstómamuśmasi ǀ tā́ sómam somapā́tamā ǁ

ता य॒ज्ञेषु॒ प्र शं॑सतेंद्रा॒ग्नी शुं॑भता नरः । ता गा॑य॒त्रेषु॑ गायत ॥

tā́ yajñéṣu prá śaṃsatendrāgnī́ śumbhatā naraḥ ǀ tā́ gāyatréṣu gāyata ǁ

ता मि॒त्रस्य॒ प्रश॑स्तय इंद्रा॒ग्नी ता ह॑वामहे । सो॒म॒पा सोम॑पीतये ॥

tā́ mitrásya práśastaya indrāgnī́ tā́ havāmahe ǀ somapā́ sómapītaye ǁ

उ॒ग्रा संता॑ हवामह॒ उपे॒दं सव॑नं सु॒तं । इं॒द्रा॒ग्नी एह ग॑च्छतां ॥

ugrā́ sántā havāmaha úpedám sávanam sutám ǀ indrāgnī́ éhá gacchatām ǁ

ता म॒हांता॒ सद॒स्पती॒ इंद्रा॑ग्नी॒ रक्ष॑ उब्जतं । अप्र॑जाः संत्व॒त्रिणः॑ ॥

tā́ mahā́ntā sádaspátī índrāgnī rákṣa ubjatam ǀ áprajāḥ santvatríṇaḥ ǁ

तेन॑ स॒त्येन॑ जागृत॒मधि॑ प्रचे॒तुने॑ प॒दे । इंद्रा॑ग्नी॒ शर्म॑ यच्छतं ॥

téna satyéna jāgṛtamádhi pracetúne padé ǀ índrāgnī śárma yacchatam ǁ