Sūkta 20

अ॒यं दे॒वाय॒ जन्म॑ने॒ स्तोमो॒ विप्रे॑भिरास॒या । अका॑रि रत्न॒धात॑मः ॥

ayám devā́ya jánmane stómo víprebhirāsayā́ ǀ ákāri ratnadhā́tamaḥ ǁ

य इंद्रा॑य वचो॒युजा॑ तत॒क्षुर्मन॑सा॒ हरी॑ । शमी॑भिर्य॒ज्ञमा॑शत ॥

yá índrāya vacoyújā tatakṣúrmánasā hárī ǀ śámībhiryajñámāśata ǁ

तक्ष॒न्नास॑त्याभ्यां॒ परि॑ज्मानं सु॒खं रथं॑ । तक्ष॑न्धे॒नुं स॑ब॒र्दुघां॑ ॥

tákṣannā́satyābhyām párijmānam sukhám rátham ǀ tákṣandhenúm sabardúghām ǁ

युवा॑ना पि॒तरा॒ पुनः॑ स॒त्यमं॑त्रा ऋजू॒यवः॑ । ऋ॒भवो॑ वि॒ष्ट्य॑क्रत ॥

yúvānā pitárā púnaḥ satyámantrā ṛjūyávaḥ ǀ ṛbhávo viṣṭyákrata ǁ

सं वो॒ मदा॑सो अग्म॒तेंद्रे॑ण च म॒रुत्व॑ता । आ॒दि॒त्येभि॑श्च॒ राज॑भिः ॥

sám vo mádāso agmaténdreṇa ca marútvatā ǀ ādityébhiśca rā́jabhiḥ ǁ

उ॒त त्यं च॑म॒सं नवं॒ त्वष्टु॑र्दे॒वस्य॒ निष्कृ॑तं । अक॑र्त च॒तुरः॒ पुनः॑ ॥

utá tyám camasám návam tváṣṭurdevásya níṣkṛtam ǀ ákarta catúraḥ púnaḥ ǁ

ते नो॒ रत्ना॑नि धत्तन॒ त्रिरा साप्ता॑नि सुन्व॒ते । एक॑मेकं सुश॒स्तिभिः॑ ॥

té no rátnāni dhattana trírā́ sā́ptāni sunvaté ǀ ékamekam suśastíbhiḥ ǁ

अधा॑रयंत॒ वह्न॒योऽभ॑जंत सुकृ॒त्यया॑ । भा॒गं दे॒वेषु॑ य॒ज्ञियं॑ ॥

ádhārayanta váhnayó’bhajanta sukṛtyáyā ǀ bhāgám devéṣu yajñíyam ǁ