Sūkta 19

प्रति॒ त्यं चारु॑मध्व॒रं गो॑पी॒थाय॒ प्र हू॑यसे । म॒रुद्भि॑रग्न॒ आ ग॑हि ॥

práti tyám cā́rumadhvarám gopīthā́ya prá hūyase ǀ marúdbhiragna ā́ gahi ǁ

न॒हि दे॒वो न मर्त्यो॑ म॒हस्तव॒ क्रतुं॑ प॒रः । म॒रुद्भि॑रग्न॒ आ ग॑हि ॥

nahí devó ná mártyo mahástáva krátum paráḥ ǀ marúdbhiragna ā́ gahi ǁ

ये म॒हो रज॑सो वि॒दुर्विश्वे॑ दे॒वासो॑ अ॒द्रुहः॑ । म॒रुद्भि॑रग्न॒ आ ग॑हि ॥

yé mahó rájaso vidúrvíśve devā́so adrúhaḥ ǀ marúdbhiragna ā́ gahi ǁ

य उ॒ग्रा अ॒र्कमा॑नृ॒चुरना॑धृष्टास॒ ओज॑सा । म॒रुद्भि॑रग्न॒ आ ग॑हि ॥

yá ugrā́ arkámānṛcúránādhṛṣṭāsa ójasā ǀ marúdbhiragna ā́ gahi ǁ

ये शु॒भ्रा घो॒रव॑र्पसः सुक्ष॒त्रासो॑ रि॒शाद॑सः । म॒रुद्भि॑रग्न॒ आ ग॑हि ॥

yé śubhrā́ ghorávarpasaḥ sukṣatrā́so riśā́dasaḥ ǀ marúdbhiragna ā́ gahi ǁ

ये नाक॒स्याधि॑ रोच॒ने दि॒वि दे॒वास॒ आस॑ते । म॒रुद्भि॑रग्न॒ आ ग॑हि ॥

yé nā́kasyā́dhi rocané diví devā́sa ā́sate ǀ marúdbhiragna ā́ gahi ǁ

य ईं॒खयं॑ति॒ पर्व॑तान् ति॒रः स॑मु॒द्रम॑र्ण॒वं । म॒रुद्भि॑रग्न॒ आ ग॑हि ॥

yá īṅkháyanti párvatāntiráḥ samudrámarṇavám ǀ marúdbhiragna ā́ gahi ǁ

आ ये त॒न्वंति॑ र॒श्मिभि॑स्ति॒रः स॑मु॒द्रमोज॑सा । म॒रुद्भि॑रग्न॒ आ ग॑हि ॥

ā́ yé tanvánti raśmíbhistiráḥ samudrámójasā ǀ marúdbhiragna ā́ gahi ǁ

अ॒भि त्वा॑ पू॒र्वपी॑तये सृ॒जामि॑ सो॒म्यं मधु॑ । म॒रुद्भि॑रग्न॒ आ ग॑हि ॥

abhí tvā pūrvápītaye sṛjā́mi somyám mádhu ǀ marúdbhiragna ā́ gahi ǁ