Sūkta 18

सो॒मानं॒ स्वर॑णं कृणु॒हि ब्र॑ह्मणस्पते । क॒क्षीवं॑तं॒ य औ॑शि॒जः ॥

somā́nam sváraṇam kṛṇuhí brahmaṇaspate ǀ kakṣī́vantam yá auśijáḥ ǁ

यो रे॒वान्यो अ॑मीव॒हा व॑सु॒वित्पु॑ष्टि॒वर्ध॑नः । स नः॑ सिषक्तु॒ यस्तु॒रः ॥

yó revā́nyó amīvahā́ vasuvítpuṣṭivárdhanaḥ ǀ sá naḥ siṣaktu yásturáḥ ǁ

मा नः॒ शंसो॒ अर॑रुषो धू॒र्तिः प्रण॒ङ्मर्त्य॑स्य । रक्षा॑ णो ब्रह्मणस्पते ॥

mā́ naḥ śáṃso áraruṣo dhūrtíḥ práṇaṅmártyasya ǀ rákṣā ṇo brahmaṇaspate ǁ

स घा॑ वी॒रो न रि॑ष्यति॒ यमिंद्रो॒ ब्रह्म॑ण॒स्पतिः॑ । सोमो॑ हि॒नोति॒ मर्त्यं॑ ॥

sá ghā vīró ná riṣyati yámíndro bráhmaṇaspátiḥ ǀ sómo hinóti mártyam ǁ

त्वं तं ब्र॑ह्मणस्पते॒ सोम॒ इंद्र॑श्च॒ मर्त्यं॑ । दक्षि॑णा पा॒त्वंह॑सः ॥

tvám tám brahmaṇaspate sóma índraśca mártyam ǀ dákṣiṇā pātváṃhasaḥ ǁ

सद॑स॒स्पति॒मद्भु॑तं प्रि॒यमिंद्र॑स्य॒ काम्यं॑ । स॒निं मे॒धाम॑यासिषं ॥

sádasaspátimádbhutam priyámíndrasya kā́myam ǀ saním medhā́mayāsiṣam ǁ

यस्मा॑दृ॒ते न सिध्य॑ति य॒ज्ञो वि॑प॒श्चित॑श्च॒न । स धी॒नां योग॑मिन्वति ॥

yásmādṛté ná sídhyati yajñó vipaścítaścaná ǀ sá dhīnā́m yógaminvati ǁ

आदृ॑ध्नोति ह॒विष्कृ॑तिं॒ प्रांचं॑ कृणोत्यध्व॒रं । होत्रा॑ दे॒वेषु॑ गच्छति ॥

ā́dṛdhnoti havíṣkṛtim prā́ñcam kṛṇotyadhvarám ǀ hótrā devéṣu gacchati ǁ

नरा॒शंसं॑ सु॒धृष्ट॑म॒मप॑श्यं स॒प्रथ॑स्तमं । दि॒वो न सद्म॑मखसं ॥

nárāśáṃsam sudhṛ́ṣṭamamápaśyam sapráthastamam ǀ divó ná sádmamakhasam ǁ