ಬ್ರಹ್ಮಣಸ್ಪತಿಯ ಆವಾಹನೆ: ದೈವಿಕ ಜ್ಞಾನ ಮತ್ತು ರಕ್ಷಣೆ

ಸೋ॒ಮಾನಂ॒ ಸ್ವರ॑ಣಂ ಕೃಣು॒ಹಿ ಬ್ರ॑ಹ್ಮಣಸ್ಪತೇ । ಕ॒ಕ್ಷೀವಂ॑ತಂ॒ ಯ ಔ॑ಶಿ॒ಜಃ ॥

सो॒मानं॒ स्वर॑णं कृणु॒हि ब्र॑ह्मणस्पते । क॒क्षीवं॑तं॒ य औ॑शि॒जः ॥

ಯೋ ರೇ॒ವಾನ್ಯೋ ಅ॑ಮೀವ॒ಹಾ ವ॑ಸು॒ವಿತ್ಪು॑ಷ್ಟಿ॒ವರ್ಧ॑ನಃ । ಸ ನಃ॑ ಸಿಷಕ್ತು॒ ಯಸ್ತು॒ರಃ ॥

यो रे॒वान्यो अ॑मीव॒हा व॑सु॒वित्पु॑ष्टि॒वर्ध॑नः । स नः॑ सिषक्तु॒ यस्तु॒रः ॥

ಮಾ ನಃ॒ ಶಂಸೋ॒ ಅರ॑ರುಷೋ ಧೂ॒ರ್ತಿಃ ಪ್ರಣ॒ಙ್ಮರ್ತ್ಯ॑ಸ್ಯ । ರಕ್ಷಾ॑ ಣೋ ಬ್ರಹ್ಮಣಸ್ಪತೇ ॥

मा नः॒ शंसो॒ अर॑रुषो धू॒र्तिः प्रण॒ङ्मर्त्य॑स्य । रक्षा॑ णो ब्रह्मणस्पते ॥

ಸ ಘಾ॑ ವೀ॒ರೋ ನ ರಿ॑ಷ್ಯತಿ॒ ಯಮಿಂದ್ರೋ॒ ಬ್ರಹ್ಮ॑ಣ॒ಸ್ಪತಿಃ॑ । ಸೋಮೋ॑ ಹಿ॒ನೋತಿ॒ ಮರ್ತ್ಯಂ॑ ॥

स घा॑ वी॒रो न रि॑ष्यति॒ यमिंद्रो॒ ब्रह्म॑ण॒स्पतिः॑ । सोमो॑ हि॒नोति॒ मर्त्यं॑ ॥

ತ್ವಂ ತಂ ಬ್ರ॑ಹ್ಮಣಸ್ಪತೇ॒ ಸೋಮ॒ ಇಂದ್ರ॑ಶ್ಚ॒ ಮರ್ತ್ಯಂ॑ । ದಕ್ಷಿ॑ಣಾ ಪಾ॒ತ್ವಂಹ॑ಸಃ ॥

त्वं तं ब्र॑ह्मणस्पते॒ सोम॒ इंद्र॑श्च॒ मर्त्यं॑ । दक्षि॑णा पा॒त्वंह॑सः ॥

ಸದ॑ಸ॒ಸ್ಪತಿ॒ಮದ್ಭು॑ತಂ ಪ್ರಿ॒ಯಮಿಂದ್ರ॑ಸ್ಯ॒ ಕಾಮ್ಯಂ॑ । ಸ॒ನಿಂ ಮೇ॒ಧಾಮ॑ಯಾಸಿಷಂ ॥

सद॑स॒स्पति॒मद्भु॑तं प्रि॒यमिंद्र॑स्य॒ काम्यं॑ । स॒निं मे॒धाम॑यासिषं ॥

ಯಸ್ಮಾ॑ದೃ॒ತೇ ನ ಸಿಧ್ಯ॑ತಿ ಯ॒ಜ್ಞೋ ವಿ॑ಪ॒ಶ್ಚಿತ॑ಶ್ಚ॒ನ । ಸ ಧೀ॒ನಾಂ ಯೋಗ॑ಮಿನ್ವತಿ ॥

यस्मा॑दृ॒ते न सिध्य॑ति य॒ज्ञो वि॑प॒श्चित॑श्च॒न । स धी॒नां योग॑मिन्वति ॥

ಆದೃ॑ಧ್ನೋತಿ ಹ॒ವಿಷ್ಕೃ॑ತಿಂ॒ ಪ್ರಾಂಚಂ॑ ಕೃಣೋತ್ಯಧ್ವ॒ರಂ । ಹೋತ್ರಾ॑ ದೇ॒ವೇಷು॑ ಗಚ್ಛತಿ ॥

आदृ॑ध्नोति ह॒विष्कृ॑तिं॒ प्रांचं॑ कृणोत्यध्व॒रं । होत्रा॑ दे॒वेषु॑ गच्छति ॥

ನರಾ॒ಶಂಸಂ॑ ಸು॒ಧೃಷ್ಟ॑ಮ॒ಮಪ॑ಶ್ಯಂ ಸ॒ಪ್ರಥ॑ಸ್ತಮಂ । ದಿ॒ವೋ ನ ಸದ್ಮ॑ಮಖಸಂ ॥

नरा॒शंसं॑ सु॒धृष्ट॑म॒मप॑श्यं स॒प्रथ॑स्तमं । दि॒वो न सद्म॑मखसं ॥