Sūkta 17

इंद्रा॒वरु॑णयोर॒हं स॒म्राजो॒रव॒ आ वृ॑णे । ता नो॑ मृळात ई॒दृशे॑ ॥

índrāváruṇayorahám samrā́joráva ā́ vṛṇe ǀ tā́ no mṛḷāta īdṛ́śe ǁ

गंता॑रा॒ हि स्थोऽव॑से॒ हवं॒ विप्र॑स्य॒ माव॑तः । ध॒र्तारा॑ चर्षणी॒नां ॥

gántārā hí sthó’vase hávam víprasya mā́vataḥ ǀ dhartā́rā carṣaṇīnā́m ǁ

अ॒नु॒का॒मं त॑र्पयेथा॒मिंद्रा॑वरुण रा॒य आ । ता वां॒ नेदि॑ष्ठमीमहे ॥

anukāmám tarpayethāmíndrāvaruṇa rāyá ā́ ǀ tā́ vām nédiṣṭhamīmahe ǁ

यु॒वाकु॒ हि शची॑नां यु॒वाकु॑ सुमती॒नां । भू॒याम॑ वाज॒दाव्नां॑ ॥

yuvā́ku hí śácīnām yuvā́ku sumatīnā́m ǀ bhūyā́ma vājadā́vnām ǁ

इंद्रः॑ सहस्र॒दाव्नां॒ वरु॑णः॒ शंस्या॑नां । क्रतु॑र्भवत्यु॒क्थ्यः॑ ॥

índraḥ sahasradā́vnām váruṇaḥ śáṃsyānām ǀ kráturbhavatyukthyáḥ ǁ

तयो॒रिदव॑सा व॒यं स॒नेम॒ नि च॑ धीमहि । स्यादु॒त प्र॒रेच॑नं ॥

táyorídávasā vayám sanéma ní ca dhīmahi ǀ syā́dutá prarécanam ǁ

इंद्रा॑वरुण वाम॒हं हु॒वे चि॒त्राय॒ राध॑से । अ॒स्मान्त्सु जि॒ग्युष॑स्कृतं ॥

índrāvaruṇa vāmahám huvé citrā́ya rā́dhase ǀ asmā́ntsú jigyúṣaskṛtam ǁ

इंद्रा॑वरुण॒ नू नु वां॒ सिषा॑संतीषु धी॒ष्वा । अ॒स्मभ्यं॒ शर्म॑ यच्छतं ॥

índrāvaruṇa nū́ nú vām síṣāsantīṣu dhīṣvā́ ǀ asmábhyam śárma yacchatam ǁ

प्र वा॑मश्नोतु सुष्टु॒तिरिंद्रा॑वरुण॒ यां हु॒वे । यामृ॒धाथे॑ स॒धस्तु॑तिं ॥

prá vāmaśnotu suṣṭutíríndrāvaruṇa yā́m huvé ǀ yā́mṛdhā́the sadhástutim ǁ